ខេត្តព្រះវិហារ ៖ នៅវេលាម៉ោង៥និង៣០នាទីព្រឹកថ្ងៃទី១៧ សីហា នេះ ទាហានកម្ពុជាឈរជើងនៅលើខ្នងភ្នំដងរែក ជាប់ព្រំប្រទល់កម្ពុជា-ថៃ ចំណុចខាងលិចប្រាសាទព្រះវិហារចម្ងាយប្រហែល៨គីឡូម៉ែត្រ បានធ្វើការឃាត់ខ្លួនទាហានឈុតខ្មៅសៀមបានម្នាក់ប្រដាប់ដោយអាវុធ១ដើម អាវក្រោះ និងទុសៀគ្រាប់មួយកំប្លេរ ។
ទាហានឈុតខ្មៅសៀមរូបនោះ បានចូលក្នុងទឹកដីកម្ពុជាត្រង់ចំណុចខាងលើដោយខុសច្បាប់ ខណៈនោះត្រូវទាហានកម្ពុជាក្នុងកងពលតូចអន្តរាគមន៍លេខ៨ ធ្វើការចាប់ខ្លួនដោយដកយកអាវុធ១ដើម អាវក្រោះ១ និងគ្រាប់១ទុសៀ ហើយបម្រុងបញ្ជូនទៅកាន់ទីបញ្ជាការជួរមុខរបស់កម្ពុជា តែពេលនោះត្រូវបានទាហានឈុតខ្មៅរូបនោះលួចរត់ ដោយលោតទម្លាក់ខ្លួនទៅក្នុងជ្រោះលើខ្នងភ្នំ គេចចូលទៅក្នុងទឹកដីសៀមបាត់ ។
មេបញ្ជាការជួរមុខរបស់កម្ពុជាកំពុងទាក់ទងសួរពីមូលហេតុដែលទាហានឈុតខ្មៅសៀមរូបនោះចូលមកក្នុងទឹកដីកម្ពុជា ដោយគ្មានការអនុញ្ញាតបែបនេះ ។ ដោយឡែកអាវុធ គ្រាប់ និងអាវក្រោះដែលទ័ពខ្មែរដកហូតបាននោះមិនបានប្រគល់ឱ្យទាហានសៀមវិញទេ ដោយរក្សាទុកនៅក្នុងទីបញ្ជាការដ្ឋានជួរមុខ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ