លទ្ធផលស្រាវជ្រាវ និងអង្កេតការណ៍បានបញ្ជាក់ថា អាស៊ីជាភូមិភាគដែលប្រឈមមុខនឹងគ្រោះវិបត្តិផ្នែកធម្មជាតិដូចជារញ្ជួយដី ទឹកជំនន់ ព្យុះ និងវិបត្តិផ្សេងៗទៀត។ តាមរបាយការណ៍ស្តីពី «ទីតាំងការប្រឈមមុខនឹងគ្រោះធម្មជាតិ» របស់មេផលក្រូហ្វ (Mapecroft) ក្រុមហ៊ុនទីប្រឹក្សានៃភាពប្រថុយប្រថានរបស់អង់គ្លេស បានប៉ាន់ប្រមាណលើផលប៉ះពាល់នៃវិបត្តិធម្មជាតិចំពោះសេដ្ឋកិច្ចចំនួន១៩៧ប្រទេស ដោយសង្កត់ធ្ងន់លើការទប់ទល់ និងលទ្ធផលសង្គមក្នុងការស្រោចស្រង់ប្រសិនបើមូលដ្ឋានគ្រឹះរបស់ប្រទេសទន់ជ្រាយ និងរដ្ឋាភិបាលទន់ខ្សោយ ផលប៉ះពាល់លើសេដ្ឋកិច្ចនឹងមានសភាពកាន់តែធ្ងន់ ។
លទ្ធផលនៃការប៉ាន់ប្រមាណឃើញថាមាន១០ប្រទេសត្រូវប្រឈមមុខច្រើនបំផុត ក្នុងនោះប្រទេសនៅអាស៊ីមានចំនួន៦ប្រទេស រួមមាន បង់ក្លាដេស ហ្វ៊ីលីពីន ភូមា ដូមីនីក ឥណ្ឌា វៀតណាម ឡាវ ហៃទី និងនីការ៉ាហ្គា ។មេផលក្រូហ្វ បានបញ្ជាក់នៅក្នុងរបាយការណ៍ថា បង់ក្លាដេស ហ្វ៊ីលីពីន ភូមា ឥណ្ឌា និងវៀតណាម គឺជាប្រទេសដែលមានសមិទ្ធផល សេដ្ឋកិច្ច បានទទួលផលប៉ះពាល់ពីគ្រោះធម្មជាតិយ៉ាងច្រើន និងជាប្រទេសដែលខ្វះខាតសមត្ថភាពក្នុងការស្រោចស្រង់ក្រោយពីរងគ្រោះ ធ្វើឱ្យប៉ះពាល់ដល់បញ្ហាសង្គម សុវត្ថិភាពផ្នែកម្ហូបអាហារ អំពើពុករលួយ និងការប្រើច្បាប់ រួមទាំងអាចឈានទៅរកភាពចលាចលផ្នែកនយោបាយបាន ។
ក្រៅពីនេះមេផលក្រូហ្វ បញ្ជាក់ថា ជប៉ុន អាមេរិក ចិន តៃវ៉ាន់ និងមិចស៊ិក ចាត់ទុកថា ជាប្រទេសដែលសេដ្ឋកិច្ចជារួមបានទទួលផលប៉ះពាល់ពីគ្រោះធម្មជាតិ ដោយទទួលការខូចខាតពីវិបត្តិធម្មជាតិ Munich Re កាលពីឆ្នាំ២០១១ មានតម្លៃសរុប៣,៨សែនលានដុល្លារ ក្នុងហេតុការណ៍រញ្ជួយដី និងស៊ូណាមី នៅជប៉ុន មានតម្លៃប្រហែល៥៥% នៃចំនួនការខូចខាតនោះ ។
នៅក្នុងរបាយការណ៍បានក្រើនរំលឹកថា សេដ្ឋកិច្ចទើបកើតថ្មីនៅអាស៊ីមានឥទ្ធិពលនៅលើពិភពលោក កាន់តែច្រើន ចំពោះគ្រោះវិបត្តិធម្មជាតិដែលកើតឡើងនៅក្នុងប្រទេសទាំងនេះ ទើបផ្តល់ផលប៉ះពាល់ដល់ពិភពលោកក្នុងទ្រង់ទ្រាយធំ និងធ្ងន់ ។ ដូច្នេះត្រូវបង្កើនសក្តានុពលដើម្បីកែសម្រួលបរិស្ថានដែលប្រឈមមុខនឹងគ្រោះធម្មជាតិ ព្រោះគ្រោះធម្មជាតិជាវត្ថុដែលមិនអាចចៀសផុតប្រសិនបើមិនបានដំណើរការកែទម្រង់បទដ្ឋានឱ្យរឹងមាំគឺមានន័យថា នឹងមានវិបត្តិផ្នែកសេដ្ឋកិច្ច ៕
ចែករំលែកព័តមាននេះ