រាជធានីភ្នំពេញ ៖ ក្រុមនិស្សិតស្ម័គ្រចិត្ត ចុះវាស់វែងដីធ្លីជូនប្រជាពលរដ្ឋ ចំនួន៤២០នាក់មកពីខេត្តគោលដៅចំនួន៨ក្នុងនោះមាន ខេត្តកែបចំនួន២ក្រុម កោះកុង៤ក្រុម ព្រះសីហនុ៤ក្រុម សៀមរាប៣ក្រុម ព្រះវិហារ៥ក្រុម ពោធិ៍សាត់៦ក្រុម ឧត្តរមានជ័យ៨ក្រុម និងខេត្តតាកែវចំនួន៣ក្រុម បានវិលត្រឡប់មកជួបជុំក្រុមគ្រួសារវិញ ខណៈទទួលបានការឈប់សម្រាករយៈពេល៥ថ្ងៃក្រោយពីបំពេញការងារចំនួន១ខែពេញ ។
ការវិលត្រឡប់របស់និស្សិតស្ម័គ្រចិត្តវាស់វែងដីធ្លីជូនប្រជាពលរដ្ឋជំហានទី៣នេះត្រូវបានទទួលស្វាគមន៍ពីសំណាក់មន្ត្រីក្រសួងរៀបចំដែនដីនគរូបនីយកម្ម និងសំណង់ នៅទីស្តីការក្រសួង កាលពីថ្ងៃទី១៥ សីហា ឆ្នាំ២០១២ ។ យុវតី ម៉ៅ វឌ្ឍនាជាប្រធានក្រុមនិស្សិតស្ម័គ្រចិត្តទី៩៣ក្នុងខេត្តតាកែវ និយាយថា ក្នុងរយៈពេលបំពេញបេសកកម្មវាស់វែងដីធ្លីពេញមួយខែកន្លងមកនេះ គឺទទួលបានលទ្ធផលផ្លែផ្កាជាច្រើន ដោយមិនមានជួបឧបសគ្គអ្វីធ្ងន់ធ្ងរឡើយ។ ការទទួលបានជោគជ័យគួរឲ្យកត់សម្គាល់នេះ គឺដោយសារមានការរួមសហការយ៉ាងល្អពីសំណាក់អាជ្ញាធរដែនដី ជាពិសេសបានការទទួលរាក់ទាក់ពីប្រជាពលរដ្ឋដែលរស់នៅទីនោះផងដែរ ។ ក្នុងការបំពេញបេសកកម្មវាស់វែងដីធ្លីរយៈពេលមួយខែនេះ ក្រុមការងាររបស់កញ្ញា មិនមានបញ្ហាអ្វីចោទឡើយ ទាំងការស្នាក់នៅ និងការហូបចុក ព្រោះបានការយកចិត្តទុកដាក់ពីអាជ្ញាធរនៅក្នុងតំបន់នោះ ជាពិសេសគឺការយកចិត្តទុកដាក់យ៉ាងខ្លាំងពីសម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ។
ចំណែកនិស្សិតឈ្មោះសុខ វណ្ណា ជាប្រធានក្រុមទី៩៩ចុះបំពេញបេសកកកម្មនៅឃុំជើងគោ ស្រុកព្រៃនប់ ខេត្តព្រះសីហនុ និយាយថា ក្នុងរយៈពេលមួយខែនៃបេសកកម្ម ក្រុមរបស់ប្អូនទទួលបានលទ្ធផលល្អប្រសើរ ពោលគឺបានចំនួន ៩៥ភាគរយ ។ បេសកកម្មរបស់ក្រុមប្អូន គឺនៅសល់តែ៥ភាគរយប៉ុណ្ណោះ នឹងសម្រេចបានទាំងស្រុងហើយទាំងការផ្តល់សាលាកប័ត្រ និងក្បាលដីជូនដល់ប្រជាពលរដ្ឋ ។ និស្សិតស្ម័គ្រចិត្តរូបនេះបានបន្តទៀតថា បេសកកម្មរបស់ពួកគេពុំមានឧបសគ្គអ្វីជាដុំកំភួនឡើយក្រៅពីអាកាសធាតុបន្តិចបន្តួច ហើយទាំងប្រជាពលរដ្ឋ អាជ្ញាធរមូលដ្ឋាន រហូតដល់ថ្នាក់ខេត្ត គឺទទួលស្វាគមន៍ និងយកចិត្តទុកដាក់ដល់ពួកគេជានិច្ច ។ ក្នុងនាមជាប្រធានក្រុម និស្សិត សុខ វណ្ណា បានប្តេជ្ញាចិត្តខិតខំបំពេញបេសកកម្មដ៏ថ្លៃថ្លានេះឲ្យសម្រេចបានជាផ្លែផ្កាជូនប្រមុខរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា ក្នុងការកែទម្រង់ដីធ្លីជូនប្រជាពលរដ្ឋ ។
យោងតាមរបាយការណ៍របស់ក្រសួងរៀបចំដែនដីនគរូបនីយកម្ម និងសំណង់ រហូតមកដល់ថ្ងៃទី១០ សីហា ឆ្នាំ២០១២ លទ្ធផលបច្ចេកទេសក្រុមវាស់វែងដីធ្លី ដែលមានក្រុមនិស្សិតស្ម័គ្រចិត្តចូលរួមនេះ គឺសម្រេចបាន ប្រកាសឃុំគោលដៅជាតំបន់វិនិច្ឆ័យបានចំនួន១៥៨ឃុំ វាស់វែងនិងគូរផែនទីដើម្បីឆ្វៀលចេញទំហំជាង១៧ម៉ឺនហិកតា បំពេញសាលាកប័ត្រអ្នកកាន់កាប់ក្បាលដីបានចំនួនជិត១៥ម៉ឺនក្បាលដី បានស្រង់ស្ថិតិប្រជាជនដែលបានកាន់កាប់ដីចំនួនជាង៨ម៉ឺនគ្រួសារ កំណត់ព្រំ និងវាស់វែងក្បាលដី បានចំនួនជាង៧,៦ម៉ឺនក្បាលដី គូរក្បាលដីបានចំនួនជាង៥,២ម៉ឺនក្បាលដី និងបំពេញទម្រង់បែបបទទិន្នន័យក្បាលដីបានចំនួនជាង៣ម៉ឺនក្បាលដី ៕
ចែករំលែកព័តមាននេះ