រាជធានីភ្នំពេញ ៖ ដើម្បីបង្កើនការយល់ដឹងទាក់ទងនឹងការប្រើប្រាស់អីុនធើរណេតឱ្យមានអត្ថប្រយោជន៍កាន់តែប្រសើរក្រុមហ៊ុនអីុនធើរណេតឌីជីបាននិងកំពុងបន្តបេសកកម្មរបស់ខ្លួនក្នុងការរៀបចំសិក្ខាសាលាមួយស្តីអំពី «អីុនធើរណេតសម័យទំនើប ៖ យល់ដឹង ដើម្បីអាជីព» នៅតាមគ្រឹះស្ថានឧត្តមសិក្សានានានៅក្នុងរាជធានីភ្នំពេញ។ ក្នុងចំណោមនោះផងដែរ នាព្រឹកថ្ងៃទី១៦ សីហា ឌីជីបានរៀបចំសិក្ខាសិលានេះឡើងនៅសកលវិទ្យាល័យឯកទេសនៃកម្ពុជាដែលមានវត្តមានពីចូលរួមសំណាក់សិស្ស និសិ្សត ព្រមទាំងសាស្ត្រាចារ្យយ៉ាងច្រើនកុះករ។ គួបញ្ជាក់ឱ្យដឹងផងដែរថា វិស័យព័ត៌មានវិទ្យានៅព្រះរាជាណាចក្រកម្ពុជា កំពុងតែមានការរីក ចំរើន គួរ ឱ្យកត់សម្គាល់។ វិស័យនេះបានដើរតួនាទីយ៉ាងសំខាន់ក្នុងការប្រកបការងារការសិក្សាស្រាវជ្រាវ ការទំនាក់ទំនង ព្រមទាំងការកម្សាន្ត ផ្សេងៗ។ ប៉ុន្តែអ្វីដែលអ្នកប្រើប្រាស់អីុនធើរណេតនៅកម្ពុជាដែលភាគច្រើន គឺជាសិស្ស និស្សិតមិនទាន់សូវបាននឹកគិតដល់នោះ គឺការយកប្រព័ន្ធអីុនធើរណេតមកធ្វើជាមធ្យោបាយមួយក្នុងការរកប្រាក់ចំណូល។
ប្រធានផ្នែកទីផ្សារនៃក្រុមហ៊ុនឌីជី លោកនាក់ ឡុងឃាង បានមានប្រសាសន៍ថា «គោលដៅចម្បងនៃសិក្ខាសាលានេះ គឺផ្លាស់ប្តូរ និងបំផុសទស្សនៈរបស់សិស្ស និសិ្សតដែលធ្លាប់តែយល់ថា អីុនធើរណេត គឺអាចប្រើប្រាស់បានសម្រាប់តែធ្វើការស្រាវជ្រាវសិក្សា ប្រាស្រ័យទាក់ទង និងកម្សាន្ត ឱ្យបែរមកប្រើប្រាស់អីុនធើរណេត ដើម្បីធ្វើអាជីវកម្មរកប្រាក់ចំណូលវិញម្តង។ ខណៈពេលនេះយើងកំពុងតែណែនាំពួកគាត់អំពីអាជីវកម្មមួយដែលពួកគាត់មិនចាំបាច់ចំណាយទុនអ្វីច្រើនឡើយ គឺពួកគាត់ពឹងផ្អែកសំខាន់ទៅលើភាពប៉ិនប្រសប់របស់ពួកគាត់ប៉ុណ្ណោះ នោះគឺអាជីវកម្មតាមប្រព័ន្ធអីុនធើរណេត។ ម្យ៉ាងទៀតពួកគាត់អាចបង្កើតការងារ ដោយខ្លួនឯងស្របពេលជាមួយនឹងការប្រកួតប្រជែងនៃទីផ្សារការងារនៅកម្ពុជាទៀតផង។
តាមរយៈសិក្ខាសាលានេះ ឌីជីបានជំរុញ ផ្តួចផ្តើមគំនិតក៏ដូចជាផ្តល់ឱកាសដល់សិស្ស និសិ្សតដែលមានគំនិតល្អលើអាជីវកម្មតាមប្រព័ន្ធអីុនធើរណេតធ្វើការអនុវត្ត និងបញ្ចេញភាពប៉ិនប្រសប់របស់ខ្លួនផងដែរ។ ដោយក្នុងនោះ ឌីជី នឹងធ្វើការគាំទ្រ ព្រមទាំងផ្ដល់ជំនួយលើផ្នែកហិរញ្ញវត្ថុ ក៏ដូចជាគំនិតចំពោះអ្នកដែលនឹងត្រូវជ្រើសរើសក្នុងការចាប់ផ្ដើមគម្រោងអាជីវកម្មនេះ ហើយពួកគាត់អាចដាក់ពាក្យជាមួយនឹងគម្រោងអាជីវកម្មរបស់គាត់តាមរយៈគេហទំព័រ http://www.digi.com.kh/education។ បន្ថែមពីនេះ ឌីជី នឹងត្រូវបានផ្តល់ឱកាសការងារនៅក្រុមហ៊ុនរបស់ខ្លួនចំពោះអ្នកដែលមានភាពប៉ិនប្រសប់ជាងគេទៀតផង៕
ចែករំលែកព័តមាននេះ