រាជធានីភ្នំពេញ ៖ ក្រុមហ៊ុនម៉ូធ័រ អីុមេជ ខេមបូឌា ដែលជាតំណាងចែកចាយផ្តាច់មុខរថយន្តស៊ូបារុ តែមួយគត់ ប្រចាំនៅព្រះរាជាណាចក្រកម្ពុជា បានរៀបចំកម្មវិធីការប្រកួតដាក់បាតដៃលើរថយន្តស៊ូបារុ ជាលើកទី២នៅរាជធានីភ្នំពេញ ថ្ងៃទី១១ សីហា ២០១២ នៅមុខផ្សារទំនើបសូរិយា ។
កម្មវិធីប្រកួតដាក់បាតដៃលើរថយន្តស៊ូបារុ ក្នុងឆ្នាំនេះមានការឧបត្ថម្ភដោយ Nescafe Smart mobile និង Grand Phnom Penh Golf club។ ការប្រកួតដាក់បាតុដៃលើរថយន្តនេះ គឺជាការប្រកួតដ៏លំបាក និងទាមទារឱ្យមានភាពអំណត់អត់ធន់ដែលបេក្ខជនទាំងអស់តម្រូវឱ្យដាក់បាតដៃស្តាំលើរូបបាតដៃដែលបានបិទរួចជាស្រេចនៅលើរថយន្ត ។ បេក្ខជនដែលដាក់បាតដៃបានយូរជាងគេនឹងទទួលបានជ័យជម្នះ និងមានឱកាសចូលរួមក្នុងការប្រកួតយករង្វាន់ធំ គឺរថយន្ត Subaru Forester 2.5 XT ស៊េរីឆ្នាំ២០១២ ថ្មីសន្លាងមួយគ្រឿងដែលមានតម្លៃ៦៣.០០០ដុល្លារសហរដ្ឋអាមេរិក ។ កាលពីឆ្នាំ២០១១ លោកឈុង គាឆី (Mr. Chong Kia Chi) អាយុ៤២ឆ្នាំ ជនជាតិសិង្ហបុរី គឺជាបេក្ខជនឈរបានយូរជាងគេក្នុងថេរវេលា៧៥ម៉ោងនិង៣៦នាទីដែលធ្វើឱ្យគាត់ទទួលបានជ័យជម្នះលើបេក្ខជន៣៩៩នាក់ផ្សេងទៀត ហើយទទួលបានរថយន្តស៊ូបារុ ដ៏ថ្មីសន្លាងមួយគ្រឿង ។
យើងរំពឹងថានឹងមានបេក្ខជន៨០រូប ចុះឈ្មោះចូលរួមប្រកួតក្នុងឆ្នាំនេះ ។ បេក្ខជនមានសមត្ថភាពចំនួន១០រូប ត្រូវធ្វើដំណើរទៅកាន់ប្រទេសសិង្ហបុរី ជាកន្លែងដែលពួកគេត្រូវប្រកួតជាមួយនឹងបេក្ខជនដែលឈ្នះមកពីបណ្តាប្រទេសផ្សេងៗក្នុងអាស៊ាន ដើម្បីប្រកួតប្រជែងយករង្វាន់ធំ ក្រុមហ៊ុននឹងទទួលខុសត្រូវរាល់ការចំណាយលើការធ្វើដំណើរ និងការស្នាក់នៅឯប្រទេសសិង្ហបុរី ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ