ខេត្តកំពង់ធំ ៖ នៅសាលប្រជុំស្នងការដ្ឋាននគរបាលខេត្តវេលាម៉ោង៨ព្រឹកថ្ងៃទី១៦ សីហា ២០១២ មានបើកកិច្ចប្រជុំត្រួតពិនិត្យលទ្ធផលការអនុវត្តច្បាប់ចរាចរណ៍ផ្លូវគោកប្រចាំត្រីមាសទី៣ ឆ្នាំ២០១២ ក្រោមអធិបតីភាពលោកឧត្តមសេនីយ៍ត្រី ផាន់ សុផេង ស្នងការនគរបាលខេត្ត លោកវរសេនីយ៍ឯក កែវ ហួរ ស្នងការរងនគរបាលខេត្តជាប្រធានការិយាល័យកណ្តាលសណ្តាប់ធ្នាប់ និងចរាចរណ៍ផ្លូវគោក លោកម៉ៅ ឡាំង ប្រធានមន្ទីរសាធារណការខេត្ត ព្រមទាំងមានការចូលរួមពីលោកមេបញ្ជាការរងកងរាជអាវុធហត្ថខេត្ត លោកអធិការ-អធិការរងគ្រប់ក្រុង-ស្រុក និងមន្ត្រីនគរបាលចរាចរផ្លូវគោកជាច្រើនរូបទៀត ។
ក្នុងកិច្ចប្រជុំនេះលទ្ធផលការងាររបស់គណៈបញ្ជាការដឹកនាំត្រួតពិនិត្យច្បាប់ចរាចរណ៍ផ្លូវគោកត្រីមាសទី៣ គិតចាប់ពីថ្ងៃទី១០ មិថុនា ២០១២ ដល់ថ្ងៃទី៥ សីហា ២០១២ ករណីគ្រោះថ្នាក់ចរាចរណ៍មានការកើនឡើងចំនួន៣៤លើក បើប្រៀបធៀបទៅនឹងត្រីមាសទី៣ ឆ្នាំ២០១១ មានមនុស្សស្លាប់ចំនួន៤៤នាក់ លើ១៧នាក់ កើនឡើងចំនួន២៧នាក់ ស្រី១៨នាក់ ជនបរទេសចំនួន៣នាក់ រងរបួសធ្ងន់ចំនួន៦០នាក់ លើ២៦នាក់ កើនឡើង៣៤នាក់ ស្រី៣១នាក់ ជនបរទេសចំនួន១០នាក់ និងរបួសស្រាលចំនួន៣៥នាក់ លើ១៧នាក់ កើនឡើង១៨នាក់ ស្រីចំនួន១៩នាក់ ខូចខាតម៉ូតូចំនួន១៨គ្រឿង រថយន្តតូចចំនួន១៣គ្រឿង រថយន្តធំចំនួន១៥គ្រឿង និងយានផ្សេងៗចំនួន១០គ្រឿង ។ ករណីគ្រោះថ្នាក់ចរាចរណ៍ទាំងអស់នេះបណ្តាលមកពីការបើកបរមិនគោរពសិទ្ធិអាទិភាពគ្នា បើកបរមានល្បឿនលឿនហួសការកំណត់ បើកបរក្រោមជាតិស្រវឹង និងបើកបរមិនគោរពស្លាកសញ្ញាចរាចរណ៍។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ