ប្រភពព័ត៌មានប៉ូលិសរាយការណ៍ថា មនុស្សយ៉ាងតិច៤៧នាក់បានត្រូវស្លាប់ហើយ១០៥នាក់ទៀតត្រូវរបួសកាលពីយប់ថ្ងៃទី១៦ សីហាក្នុងការវាយប្រហារដោយរថយន្តបង្កប់គ្រឿងផ្ទុះ២និងការផ្ទុះគ្រាប់បែក១គ្រាប់ដាក់នៅចិញ្ចើមថ្នល់ក្នុងទីក្រុងបាដាដ ។
ប្រភពដដែលបន្តថា រថយន្តបង្កប់គ្រឿងផ្ទុះមួយនិងគ្រាប់បែក១គ្រាប់ដាក់នៅចិញ្ចើមថ្នល់បានផ្ទុះជិតហាងកាហ្វេមួយក្នុងសង្កាត់ហ្សាវហ្វារ៉ានី ភាគអគ្នេយ៍រដ្ឋធានីអុីរ៉ាក់ដោយសម្លាប់មនុស្ស៣១នាក់និងធ្វើឱ្យរបួស៥៦នាក់ទៀត ។ ការវាយប្រហារដោយរថយន្តបង្កប់គ្រឿងផ្ទុះមួយទៀតកើតមាននៅជិតភោជនីយដ្ឋានមួយក្នុងសង្កាត់សាដ្រស៊ីធីភាគខាងកើតក្រុងបាដាដបណ្តាលឱ្យមនុស្សស្លាប់១៦នាក់និងរបួស៤៩នាក់ ។
ប្រជាជនក្នុងសង្កាត់ទាំង២ដែលកើតមានការវាយប្រហារទាំងនោះភាគច្រើនជាពួកស៊ីអុីត។ ពួកស៊ីអុីតជាគោលដៅនៃការវាយប្រហារដែលអ្នកប្រព្រឹត្តជាពួកបះបោរស៊ុននីត ។ការវាយប្រហារទាំងនេះកើតមានក្រោយទិវាយ៉ាងបង្ហូរឈាមមួយដែលកើតមាននៅទីក្រុងដទៃៗទៀតរបស់អុីរ៉ាក់ ។ សរុបនាថ្ងៃទី១៦ សីហា នោះមានការវាយប្រហារដល់ទៅប្រមាណជា១៥លើកនៅអុីរ៉ាក់បណ្តាលឱ្យមនុស្សស្លាប់សរុប៥៣នាក់ ៕
ចែករំលែកព័តមាននេះ