ខេត្តបន្ទាយមានជ័យ ៖ នៅព្រឹកថ្ងៃទី១៥ ខែសីហា ឆ្នាំ២០១២ លោកនាយឧត្តមសេនីយ៍ ចាយ សាំងយុន រដ្ឋលេខាធិការក្រសួងការពារជាតិ បានអញ្ជើញទៅសួរសុខទុក្ខនិងនាំយកអំណោយទៅផ្តល់ជូនដល់យុវជនទទួលការអប់រំផ្ដាច់សារធាតុញៀននៅបញ្ជាការដ្ឋានកងរាជអាវុធហត្ថខេត្ត និងអមដំណើរដោយលោកឧត្តមសេនីយ៍ឯកឡាញ់ កៅ មេបញ្ជាការទ័ពរថក្រោះនិងលោកឧត្តមសេនីយ៍ត្រី ភ្លន់ តារា មេបញ្ជាការតំបន់ប្រតិបត្តិការសឹករងខេត្ត ។
លោកឧត្តមសេនីយ៍ទោ រ័ត្ន ស្រា៊ង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថខេត្ត មានប្រសាសន៍ថា ទន្ទឹមនឹងការខិតខំអនុវត្តតួនាទីភារកិច្ចស្នូលឱ្យបានជោគជ័យ និងប្រសិទ្ធភាពនោះ អង្គភាពលោកក៏បានបំពេញការងារមនុស្សធម៌ជាច្រើនទៀតចាប់តាំងពីឆ្នាំ២០០២មកម្លេ៉ះ ដោយបានទទួលការអប់រំផ្ដាច់សារធាតុញៀនដល់យុវជនប្រើប្រាស់បំពានសារធាតុញៀន ដើម្បីស្ដារនីតិសម្បទាពួកគេឡើងវិញ ។ រហូតមកដល់បច្ចុប្បន្នមានយុវជនមកទទួលសេវានេះ២.១០០នាក់ បានជាសះស្បើយ ហើយវិលត្រឡប់ទៅសហគមន៍របស់ពួកគេវិញចំនួន១.៩៣៧នាក់កំពុងនៅបន្ត១៧១នាក់ ហើយនឹងទទួលបន្តបន្ទាប់ទៀត ។
លោកឧត្តមសេនីយ៍ទោរ័ត្ន ស្រ៊ាង បានបន្តថា ការងារមនុស្សធម៌នេះ កងរាជអាវុធហត្ថពុំអាចធ្វើតែឯកឯងបានទេ គឺដោយបានការជួយឧបត្ថម្ភគាំទ្រពីសម្ដេចតេជោ ហ៊ុន សែន នាយករដ្ឋមន្ត្រី និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ពីលោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេសអាណាព្យាបាល និងសប្បុរសជនជាតិ-អន្តរជាតិជាច្រើនទៀត ។ យុវជន និងកុមារ៣ប្រភេទមកពីទូទាំងប្រទេសរហូតពីក្រៅប្រទេស បានមកទទួលសេវានេះដែលវិធីព្យាបាលតាមលក្ខណៈធម្មជាតិប៉ុណ្ណោះ ជារួមមានការអប់រំកាយសម្បទាដោយហ្វឹកហាត់បញ្ចេញអស់សារធាតុញៀន និងអប់រំចិត្តសាស្ត្រ មានច្បាប់រដ្ឋ ច្បាប់សីលធម៌ សាសនាជាដើម ។
លោកនាយឧត្តមសេនីយ៍ ចាយ សាំងយុន មានប្រសាសន៍ថា កងរាជអាវុធហត្ថខេត្តបន្ទាយមានជ័យបានចាប់ផ្ដើមទទួលអប់រំយុវជនញៀនគ្រឿងញៀនមុនគេបង្អស់នៅក្នុងប្រទេស និងបានបន្តជួយការងារមនុស្សធម៌ដ៏សំខាន់ ហេតុនេះហើយធ្វើឱ្យយុវជនដែលមកទទួលសេវាព្យាបាលនៅទីនេះត្រូវអនុវត្តតាមគ្រូបង្វឹកបន្សាបសារធាតុញៀន ដើម្បីបានស្ដារកាយសម្បទាវិលមកជាកូនល្អ ពលរដ្ឋល្អឡើងវិញ ។ លើសពីនេះទៀត សុំជួយទប់ស្កាត់ខ្លួនឯង និងមិត្តភិក្តកុំឱ្យធ្លាក់ខ្លួនញៀនថ្នាំញៀនជាថ្មី កសាងខ្លួននិងកសាងសង្គមគ្រួសារតូចឱ្យបាន ល្អ ។
លោករដ្ឋលេខាធិការ បានបញ្ជាក់ថា នៅពេលក្មួយៗទទួលអប់រំផ្ដាច់សារធាតុញៀន ត្រូវអនុវត្តតាមកម្មវិធីរបស់កងរាជអាវុធហត្ថខេត្តបន្ទាយមានជ័យតាមរយៈគ្រូបង្វឹក ក៏ដូចជា ក្មួយៗបានជួយខ្លួនឯង ជួយក្រុមគ្រួសារនិងសង្គមជាតិ ដែលជាគោលដៅអនុសាសន៍របស់សម្ដេចតេជោហ៊ុន សែន និងលោកជំទាវបានលើកឡើងផងដែរ ។ ក្នុងឱកាសនោះ លោករដ្ឋលេខាធិការបានឧបត្ថម្ភអំណោយដល់យុវជនអប់រំផ្ដាច់សារធាតុញៀននៅបញ្ជាការដ្ឋានកងរាជអាវុធហត្ថបន្ទាយមានជ័យ មានអង្ករចំនួន២,៥តោន មី៥០កេស នំ២០ធុង និងលុយចំនួន៣លានរៀល គ្រាន់ជួយទុកឱ្យក្មួយៗសម្រាប់ការហូបចុក ៕
ចែករំលែកព័តមាននេះ