ខេត្តតាកែវ ៖ ប៉ូលិសស្រុកគិរីវង់បានឃាត់ខ្លួនបុរសម្នាក់រួចបញ្ជូនមកកាន់ការិយាល័យព្រហ្មទណ្ឌកម្រិតស្រាលខេត្ត ដើម្បីចាត់ការបន្តដោយចោទប្រកាន់ពីបទវាយជនរងគ្រោះម្នាក់បណ្តាលឱ្យរងរបួសធ្ងន់ ខណៈមានទំនាស់ជជែកគ្នាប្រកាន់គណបក្សនយោបាយរៀងៗខ្លួន។ ហេតុការណ៍នេះបានកើតឡើងកាលពីថ្ងៃទី១៤ សីហា វេលាម៉ោង១១និង៣០នាទីថ្ងៃត្រង់នៅភូមិថ្នល់លោក ឃុំព្រៃអំពក ស្រុកគិរីវង់ ។ បើតាមបញ្ហាខាងលើនេះពិតជាគួរឱ្យហួសចិត្តពេកណាស់ ដែលមានការវាយតប់គ្នាព្រោះតែប្រកាន់គណបក្សនយោបាយ តើមានប្រយោជន៍អ្វីដែលនាំគ្នាផ្ទុះជម្លោះបែបនេះ ។
លោកវរសេនីយ៍ត្រីយ៉ុក សារ៉ាត់ អធិការប៉ូលិសស្រុកគិរីវង់បានឱ្យដឹងថា បុរសដែលត្រូវឃាត់ខ្លួននេះឈ្មោះវ៉ាន់ ថូ ហៅជួង អាយុ៣៤ឆ្នាំ រស់នៅក្នុងភូមិ-ឃុំខាងលើ បានយកចបកាប់ទៅលើជនរងគ្រោះឈ្មោះជួង ញ៉ុន ភេទប្រុស អាយុ៦៤ឆ្នាំ រស់នៅភូមិជាមួយគ្នាបណ្តាលឱ្យរបួសធ្ងន់ក្រោមភ្នែកខាងឆ្វេងមុតដល់ឆ្អឹង លើត្រចៀកខាងឆ្វេង និងក្បាលពីខាងក្រោយ ហើយត្រូវបានសាច់ញាតិបញ្ជូនទៅសង្គ្រោះនៅមន្ទីរពេទ្យបង្អែកស្រុក ។ លោកអធិការប៉ូលិសស្រុកបន្តថា មុនពេលកើតហេតុ ភាគីទាំង២បានអង្គុយនិយាយគ្នាលេងនៅផ្ទះបងប្អូនក្នុងភូមិ ។ ពេលអង្គុយនិយាយគ្នាលេងនោះ ស្រាប់តែជនរងគ្រោះនិយាយដល់រឿងគណបក្សនយោបាយតាមបែបកាន់ជើងគណបក្សដែលខ្លួនស្រឡាញ់ ក៏ប៉ះពាល់ដល់ម្នាក់ទៀតដែលកាន់ជើងបក្សមួយទៀត ពេលនោះជនរងគ្រោះបាននិយាយបង្អាប់គណបក្សដែលជនដៃដល់ស្រឡាញ់ ហើយដោយសារក្តៅចិតុ្តជនដៃដល់ក៏យកចបនៅក្បែរនោះកាប់ទៅលើជនរងគ្រោះបណ្តាលឱ្យរងរបួសធ្ងន់ ។
នៅចំពោះមុខប៉ូលិស បុរសឈ្មោះវ៉ាន់ ថូ ហៅជួង និយាយថា រូបគេពិតជាបានកាប់ជនរងគ្រោះឱ្យរបួសប្រាកដមែន មូលហេតុដោយសារអ្នកនោះបានបង្អាប់គណបក្សដែលខ្លួនស្រឡាញ់ទើបរូបគេកាប់ជាការព្រមាន។ លោកយ៉ុង ញីវ នាយរងការិយាល័យព្រហ្មទណ្ឌកម្រិតស្រាលខេត្តឱ្យដឹងថា ជនដៃដល់ត្រូវបានកសាងសំណុំរឿងបញ្ជូនទៅសាលាដំបូងខេត្តនៅថ្ងៃទី១៥ សីហា ៕
ចែករំលែកព័តមាននេះ