ខេត្តព្រះវិហារ ៖ រថយន្តកាមរីសេ៊រី៩៥មួយគ្រឿងដែលដឹកឈើគ្រញូងលោតឆត្របានក្រឡាប់បណ្តាលឱ្យឆេះសល់តែគ្រោងឆ្អឹងនៅវេលាម៉ោង៥ភ្លឺថ្ងៃទី១៥ សីហា ។ ហេតុការណ៍គួរឱ្យភ្ញាក់ផ្អើលខាងលើនេះ តាមមន្ត្រីអភិរក្សព្រៃឈើរបស់អង្គភាពបរិស្ថានគូលេនព្រហ្មទេពដែលប្រចាំការក្បែរកន្លែងកើតហេតុបានឱ្យដឹងថា រថយន្តមួយគ្រឿងដែលក្រឡាប់ឆេះទាំងរថយន្តទាំងឈើគ្រញូងនេះបានបើកក្នុងទិសដៅពីជើងទៅត្បូងតាមដងផ្លូវជាតិលេខ៦២ លុះមកដល់ចំណុចដំណាក់កណ្តោល ឃុំយាង ស្រុកជាំក្សាន្តបម្រុងឆ្លងកាត់ក្រុងព្រះវិហារ ក៏ក្រឡាប់បណ្តាលឱ្យឆាបឆេះសន្ធោសន្ធៅដែលចំណុចក្រឡាប់ឆេះនេះស្ថិតនៅចម្ងាយពីទីប្រជុំជនក្រុងព្រះវិហារប្រមាណ៦០គីឡូម៉ែត្រ ។
តាមប្រភពពីមន្ត្រីបរិស្ថានមួយរូបបានឱ្យដឹងថា រថយន្ត១គ្រឿងនេះដឹកឈើគ្រញូងលោតឆត្រចេញពីជើងភ្នំដងរែក ក្នុងស្រុកជាំក្សាន្តបើកបរក្នុងល្បឿនលឿន ដោយសារបារម្ភនឹងការចាប់ឃាត់ពីសំណាក់សមត្ថកិច្ចទើបបើកបរលឿនបណ្តាលឱ្យក្រឡាប់បែបនេះ ។ មន្ត្រីដដែលបាននិយាយថា ជាធម្មតាឱ្យតែរថយន្តដឹកឈើគ្រញូងមិនថារថយន្តធំ ឬតូចទេ គឺពួកគេតែងតែបើកលឿន ជាហេតុបង្កឱ្យកើតមានគ្រោះថ្នាក់ចរាចរណ៍ ។ មន្ត្រីបរិស្ថានខាងលើបានបញ្ជាក់ថា នៅកន្លែងកើតហេតុរថយន្តឆេះនោះគេមិនបានឃើញអ្នកបើកបរទេ តាមការសន្និដ្ឋានប្រហែលជារត់គេចខ្លួន ។ គេឃើញសកម្មភាពរកស៊ីដឹកឈើគ្រញូងនៅតាមជួរភ្នំដងរែកក្នុងស្រុកជាំក្សាន្ត ពេលនេះកំពុងកម្រើកឡើងទៀតហើយ ។
គួរបញ្ជាក់ផងដែរថា នៅវេលាម៉ោងប្រហែល៩យប់ថ្ងៃទី១៤ សីហា គឺមុនមានករណីរថយន្តដឹកឈើគ្រញូងក្រឡាប់ឆេះនេះ មានរថយន្តកាមរីពីរគ្រឿងទៀតដឹកឈើគ្រញូងចេញពីស្រុកជាំក្សាន្តតាមដងផ្លូវជាតិលេខ៦២ មកដល់ចំណុចទីបញ្ជាការកងពលធំ អន្តរាគមន៍លេខ៣ សមត្ថកិច្ចរដ្ឋបាលព្រៃឈើសង្កាត់កន្ទួត សហការជាមួយកងពលធំលេខ៣ ក៏ចាប់បានរថយន្តទាំងពីរគ្រឿងនោះ។
លោកហង្ស សំរិត នាយសង្កាត់ព្រៃឈើកន្ទួតបានឱ្យដឹងថា រថយន្តល្មើសទាំងពីរគ្រឿងត្រូវបានចាប់យកទៅរក្សាទុកក្នុងសង្កាត់រដ្ឋបាលព្រៃឈើកន្ទួត ១យប់ ក្រោយមករថយន្តទាំងពីរគ្រឿងខាងលើ និងឈើគ្រញូងចំនួន៦៨ដុំ នៅព្រឹកនៅថ្ងៃទី១៥ សីហា ត្រូវបានបញ្ជូនយកទៅរក្សាទុកនៅឯស្នាក់ការខណ្ឌរដ្ឋបាលព្រៃឈើព្រះវិហារ ៕
ចែករំលែកព័តមាននេះ