រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីរសៀលថ្ងៃទី១៥ សីហា បានសម្រេចឃុំខ្លួនបុរសខ្មែរអ៊ិស្លាម២នាក់ ដែលពាក់ព័ន្ធនឹងការឆបោកយកប្រាក់ពីប្រជាពលរដ្ឋជាថ្នូរនឹងការប្រគល់ដី នៅឃុំ២ធ្នូ ស្រុកស្នួល ខេត្តក្រចេះ ចាប់ពីបង្គោលគីឡូម៉ែត្រលេខ១០៩ ដល់បង្គោលគីឡូម៉ែត្រលេខ១១១ ដែលបង្កឱ្យមានបាតុកម្មបិទផ្លូវជាតិលេខ៧៦ពីខេត្តក្រចេះ ទៅខេត្តមណ្ឌលគិរី ចំនួន២លើក ដោយដាក់ពន្ឋនាគារបណ្តោះអាសន្នដើម្បីរង់ចាំការស៊ើបអង្កេតរកបក្សពួក៣នាក់ទៀតដែលគេចខ្លួន ។
សំណុំរឿងនេះ សមត្ថកិច្ចកងរាជអាវុធហត្ថខេត្តក្រចេះបានកសាងដោយភ្ជាប់អង្គហេតុមួយចំនួនបញ្ជូនមកអយ្យការអមសាលាដំបូងខេត្តក្រចេះ ដើម្បីចាត់ការតាមច្បាប់ ។ ប៉ុន្តែដោយសារសំណុំរឿងនេះមានភាពស្មុគស្មាញ និងជាប់ជំពាក់បញ្ហាផ្សេងៗច្រើនទៀតនោះ អយ្យការអមសាលាដំបូងខេត្តក្រចេះ បានផ្ទេរសមត្ថកិច្ចមកអយ្យការអមសាលាដំបូងរាជធានីភ្នំពេញវិញ ។ ក្រោយពីបានទទួលនិងពិនិត្យសំណុំរឿងនេះរួចហើយ លោក លី សុផាណា ព្រះរាជអាជ្ញារងអមសាលាដំបូងរាជធានី បានសម្រេចចោទប្រកាន់បុរសខ្មែរអ៊ិស្លាមចំនួន៣នាក់ និងនារីខ្មែរអ៊ិស្លាមចំនួន២នាក់ ពីបទឆបោក រួចបញ្ជូនសំណុំរឿងនេះទៅឱ្យលោកលឹម មករន្ទ ចៅក្រមស៊ើបសួរចាត់ការបន្តតាមនីតិវិធី ។
គួររំលឹកថា កាលពីដើមឆ្នាំ២០១២កន្លងទៅបុរស-ស្ត្រីខ្មែរអ៊ិស្លាមទាំង៥នាក់នេះ បានដើរបំផុសដើម្បីប្រមូលប្រាក់ពីប្រជាពលរដ្ឋចំនួន៨០០គ្រួសារ ក្នុងមួយគ្រួសារពី២០ម៉ឺនរៀលឡើងទៅដោយយកលេសថា ទៅរត់ការសុំច្បាប់ពីរដ្ឋាភិបាលឱ្យប្រជាពលរដ្ឋទាំងនោះមានសិទ្ធិគ្រប់គ្រងដីនៅតំបន់ ក្នុងឃុំ២ធ្នូ ស្រុកស្នួល ខេត្តក្រចេះ ចាប់ពីបង្គោលគីឡូម៉ែត្រលេខ១០៩ ដល់បង្គោលគីឡូម៉ែត្រលេខ១១១ ប៉ុន្តែពួកគេពុំបានយកប្រាក់នេះទៅរត់ការទេ ពោលគឺស៊ីដាច់តែម្តង ។ ដោយសារតែបានបង់ប្រាក់រួចហើយ ទើបប្រជាពលរដ្ឋទាំងអស់នោះនាំគ្នាមកសាងសង់លំនៅឋានជាច្រើននៅតំបន់នោះយ៉ាងអនាធិបតេយ្យ រហូតដល់អាជ្ញាធរមានសមត្ថកិច្ចចាត់វិធានការបណ្តេញចេញ ក៏កើតចេញជាការតវ៉ាតាមរូបភាពបាតុកម្មបិទផ្លូវតែម្តង ។
នៅដំណាក់កាលនេះ ចៅក្រមស៊ើបសួរបានចាត់ការជាបន្តបន្ទាប់តាមនីតិវិធីរហូតចេញដីកាបង្គាប់ឱ្យសមត្ថកិច្ចនគរបាលនាយកដ្ឋានសន្តិសុខផ្ទៃក្នុងក្រសួងមហាផ្ទៃ ចាប់ខ្លួនជនត្រូវចោទទាំង៥នាក់មកសាកសួរពីដំណើររឿងដែលត្រូវចោទប្រកាន់នេះ ។ នៅថ្ងៃទី១៣ សីហា សមត្ថកិច្ចបានឃាត់ខ្លួនបុរសខ្មែរអ៊ិស្លាមទាំងពីរនាក់នេះគឺឈ្មោះ ស្លេះ សិទ្ធ អាយុ៦៧ឆ្នាំ និងឈ្មោះ សា វ៉ាន់ អាយុ៤៤ឆ្នាំ រួចបញ្ជូនមកសាលាដំបូងនៅរសៀលថ្ងៃទី១៤ សីហា ។
នៅចំពោះមុខលោកស្រី គឹម ដានី ចៅក្រមស៊ើបសួរសាលាដំបូងរាជធានីភ្នំពេញ បុរសខ្មែរអ៊ិស្លាមទាំងពីរនាក់នេះសារភាពថា ពួកគេពិតជាបានប្រព្រឹត្តដូចការចោទប្រកាន់នេះមែន ប៉ុន្តែបានទទួលផលត្រឹមតែក្នុងម្នាក់ៗ ១០លានរៀលប៉ុណ្ណោះ ហើយពួកគេសន្យាថានឹងរកប្រាក់សងទៅឱ្យប្រជាពលរដ្ឋវិញ ៕
ចែករំលែកព័តមាននេះ