ខេត្តតាកែវ ៖ ខេត្តតាកែវជាខេត្តដែលល្បីល្បាញផ្នែកសិល្បៈយីកេ និងជាទឹកដីបណ្តុះសិល្បករ-សិល្បការិនីជាច្រើន ពិសេសផ្នែកបុរាណ ។ ជាភស្តុតាងថ្មី និងជាកិត្តិយសក្រអូបសាយសម្រាប់ខេត្តអតីតរាជធានីនៃនគរភ្នំនេះ គឺបានគ្រងតំណែងចំណាត់ថ្នាក់លេខ១រយៈពេលពីរឆ្នាំជាប់គ្នាសម្រាប់ចម្រៀងបុរាណ និងសម័យពីមហោស្រព«សិល្បៈចម្រៀងខ្មែរជាសាកល» ថ្នាក់ជាតិរៀបចំដោយក្រសួងវប្បធម៌ និងវិចិត្រសិល្បៈ សហការជាមួយក្រសួង និងស្ថាប័នមួយចំនួនទៀត ។
ប្រកបដោយទឹកមុខញញឹមស្រស់ស្រាយ ភាយចេញពីបេះដូងរំភើបរីករាយ មោទនភាព និងកិត្តិយស យុវជនចាប វិជាតិ ជែងយកឈ្នះបេក្ខជនជាច្រើនមកពីគ្រប់ខេត្ត-រាជធានី ទូទាំងប្រទេស និងមកពីប្រទេសក្រៅមួយចំនួនផង លើកពានជ័យលាភីគ្រងតំណែងចំណាត់ថ្នាក់លេខ១ ផ្នែកចម្រៀងបុរាណនាឆ្នាំ ២០១០ ។ ក្នុងសភាពដូចគ្នាផងដែរ កញ្ញាអ៊ាង ម៉ាឡា ត្រូវបំពាក់ដោយតំណែងកិត្តិយសចំណាត់ថ្នាក់លេខ១ ផ្នែកចម្រៀងសម័យនាឆ្នាំ២០១១ ។
យុវជនចាប វិជាតិ មានប្រភពចេញពីវង្សត្រកូលម្តាយជាកសិករ និងឪពុកជាអ្នកចម្រៀងប្រពៃណីនៅភូមិត្រពាំងសិលា សង្កាត់រកាក្រៅ ក្រុងដូនកែវ ខេត្តតាកែវ ។ ក្នុងចំណោមបងប្អូន៣នាក់មានតែវិជាតិម្នាក់ប៉ុណ្ណោះ មាននិស្ស័យស្រឡាញ់សិល្បៈចម្រៀងប្រពៃណីកាត់តាមឪពុក ។ គេជាពន្លកថ្មីជាទីសង្ឃឹមរបស់ឪពុក និងក្រុមគ្រួសារ ។និស្ស័យពីធម្មជាតិ គួបផ្សំនឹងការជួយបណ្តុះបណ្តាលរបស់ឪពុក ធ្វើឱ្យជំនាញខាងច្រៀងបទប្រពៃណីរបស់វិជាតិរីកចម្រើនខ្លាំង ។
ទៅទីនេះ ទៅទីនោះ ចាប វិជាតិ និងក្រុមចម្រៀងប្រពៃណីរបស់គេប្រគំសម្រាប់ពិធីមង្គលការ ។ វិជាតិ ថ្នឹកតែនឹងការចូលរួមក្នុងកម្មវិធីបែបនេះ មិនដែលចូលរួមក្នុងកម្មវិធីប្រគំតន្ត្រីអ្វីធំដុំទេ ដូច្នេះការចូលរួមប្រឡងថ្នាក់ជាតិ គឺជារឿងថ្មីលើកទីមួយរបស់គេ ។ ឆ្លងកាត់ការជម្រុះនៅថ្នាក់ខេត្ត ជម្រុះនៅរាជធានី និងឈានទៅវគ្គផ្តាច់ព្រ័ត្រ ឈ្មោះ«ចាប វិជាតិ មកពីខេត្តតាកែវ»ត្រូវគេប្រកាសជាជ័យលាភីចំណាត់ថ្នាក់លេខ១ផ្នែកចម្រៀងបុរាណ ។«ខ្ញុំជាអ្នកចម្រៀងប្រពៃណីនៅក្នុងក្រុមតូចតាច ប្រាក់កម្រៃប្រចាំថ្ងៃសំខាន់ណាស់សម្រាប់ផ្គត់ផ្គង់ជីវភាព តែពេលទទួលបានពានរង្វាន់កិត្តិយសថ្នាក់ជាតិបែបនេះ ខ្ញុំគិតថាសំខាន់ជាងនោះទៅទៀត និងកាត់ថ្លៃមិនបាន។ ពានរង្វាន់នេះខ្ញុំគិតថា លើកមុខមាត់ខ្ញុំ គ្រួសារខ្ញុំ និងខេត្តតាកែវរបស់ខ្ញុំខ្លាំងណាស់»។ វិជាតិ ថ្លែងបែបនេះ កាលពីថ្ងៃទី១៤ សីហា ឆ្នាំ២០១២ ។ក្រោយពេលជាប់ចំណាត់ថ្នាក់កំពូលនោះ ចាប វិជាតិ ត្រូវមន្ទីរវប្បធម៌ និងវិចិត្រសិល្បៈខេត្តតាកែវជ្រើសយកចូលជាបុគ្គលិកបណ្តែតរបស់មន្ទីរ ។
តាមរយៈការបណ្តុះបណ្តាលរបស់មន្ទីរវប្បធម៌ វិជាតិ ចេះសម្តែងយីកេ និងធ្លាប់ចូលរួមសម្តែងនៅរាជធានីចំនួន៣លើក ។ ក្នុងចំណោមការសម្តែងនោះ វិជាតិ សម្តែងជាតួឯកក្នុងរឿង«មាយាស្ត្រី»ប្រកបដោយទេពកោសល្យខ្ពស់រស់រវើក ។ គេជាពន្លកថ្មីគួរជាទីសង្ឃឹមរបស់ក្រុមសិល្បៈខេត្តតាកែវ ។ចំពោះកញ្ញា អ៊ាង ម៉ាឡា វិញ ស្ថិតក្នុងវង្សត្រូវកូលជាអ្នកសិល្បៈបុរាណប្រចាំមន្ទីរវប្បធម៌ និងវិចិត្រសិល្បៈខេត្តតាកែវ ។ នាងម៉ាឡា អាយុ២១ឆ្នាំ ជាកូនទី២ក្នុងចំណោមបងប្អូនចំនួន៦នាក់ ។ ឪពុករបស់កញ្ញាម្ចាស់ជ័យលាភីចំណាត់ថ្នាក់លេខ១រូបនេះ គឺលោកអ៊ាង ច័ន្ទថន ជាសិល្បករនៅមន្ទីរវប្បធម៌ និងវិចិត្រសិល្បៈខេត្ត ពិសេសគឺលោកសម្តែងយីកេជាតួកាចសមឥតខ្ចោះ ។ ម្តាយរបស់ម៉ាឡា គឺអ្នកស្រីឡុង មា៉នី ជាអ្នករបាំក្នុងក្រុមសិល្បៈខេត្ត ។ ដោយឡែកកញ្ញា អា៊ង ច័ន្ទថាវី ជាបងស្រីរបស់កញ្ញាម៉ាឡា ធ្លាប់ទទួលបានចំណាត់ថ្នាក់លេខ១ផ្នែកចម្រៀងបាសាក់ពីស្ថានីយទូរទស្សន៍បាយ័ន ។
កញ្ញាអ៊ាង ម៉ាឡា មានជំនាញខាងសិល្បៈបុរាណជាច្រើនប្រភេទពីការបណ្តុះបណ្តាលរបស់ឪពុកម្តាយនាងតាំងពីតូចមក ។ ទោះបីជាយ៉ាងណាក្តីនាងខិតខំកសាងខ្លួនទៅជាអ្នកចម្រៀងសម័យថែមទៀត ។ នារីវ័យក្មេងនេះ មានទឹកដមសំឡេងពីរោះក្រអួន ។
ខ្លួនមានជំនាញសិល្បៈបុរាណ តែបែរជាចូលប្រឡងផ្នែកចម្រៀងសម័យទៅវិញនេះ ព្រោះតែកញ្ញាអា៊ង ម៉ាឡា ចង់បានបទពិសោធន៍ និងចង់ដឹងថាសមត្ថភាពផ្នែកចម្រៀងសម័យរបស់នាងក្នុងកម្រិតណា ។
តាមរយៈការប្រឡងដ៏តឹងតែងក្នុង«មហោស្រពចម្រៀងខ្មែរជាសាកល»ដែលមានបេក្ខជនរាប់រយនាក់ចម្រាញ់ពីទូទាំងប្រទេស រួមទាំងខ្មែររស់នៅបរទេសចូលរួមផងនោះ កញ្ញាអ៊ាង ម៉ាឡា ក្តោបយកចំណាត់ថ្នាក់លេខ១ប្រកបដោយមោទនភាព និងកិត្តិយស ។ក្នុងទឹកមុខញញឹមស្រស់ កញ្ញាម៉ាឡានិយាយថា «នៅពេលទទួលបានចំណាត់ថ្នាក់លេខ១ នាងខ្ញុំរំភើបរីករាយខ្លាំងណាស់ ។ នេះជាប្រវត្តិសាស្ត្រប្រកបដោយកិត្តិយសសម្រាប់រូបខ្ញុំ»។ កញ្ញាអ៊ាង ម៉ាឡា សម្តែងនូវការអរគុណចំពោះលោកឧបនាយករដ្ឋមន្ត្រី សុខ អាន និងលោកជំទាវ លោកជំទាវ ម៉ែន សំអន ឧបនាយករដ្ឋមន្ត្រីប្រចាំការ និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលបានថ្លែងសរសើរ និងលើកទឹកចិត្តចំពោះរូបនាង និងបងស្រីអ៊ាង ច័ន្ទថាវី របស់នាង ។
មហោស្រពសិល្បៈចម្រៀងខ្មែរជាសាកលថ្នាក់ជាតិរៀបចំដោយក្រសួងវប្បធម៌ និងវិចិត្រសិល្បៈ សហការជាមួយក្រសួងទេសចរណ៍ និងស្ថាប័នមួយចំនួនទៀត លើកទី១នៅឆ្នាំ២០១០ និងលើកទី២ នៅឆ្នាំ ២០១១ ។ បេក្ខជនទូទៅនៅទូទាំងប្រទេស ព្រមទាំងខ្មែរយើងនៅក្រៅប្រទេសផង អាចដាក់ពាក្យចូលរួមប្រឡងក្នុងកម្មវិធីនេះបាន ។
យុវជន ចាប វិជាតិ និងកញ្ញា អ៊ាង ម៉ាឡា គឺជាបេក្ខជនតំណាងខេត្តតាកែវ ប្រកបដោយទេពកោសល្យសិល្បៈខ្ពស់ ទើបអាចប្រឡងយកបានពានរង្វាន់ចំណាត់ថ្នាក់លេខ១ទូទាំងប្រទេស។ កិត្តិយសរបស់អ្នកទាំងពីរនេះ ក៏ជាកិត្តិយសរបស់ក្រុមគ្រួសារ និងរបស់អ្នកខេត្តតាកែវ ដែលមានក្លិនសិល្បៈបុរាណក្រអូបសាយផងដែរ ៕
ចែករំលែកព័តមាននេះ