ខេត្តកំពត ៖ ក្មេងប្រុសអាយុ៧ឆ្នាំម្នាក់ បានត្រូវឃាតករមិនស្គាល់អត្តសញ្ញាណសម្លាប់យ៉ាងសាហាវ ដោយប្រើកាំបិតកាត់ដៃត្រឹមលើ.កដៃ ព្រមទាំងកាប់មួយកាំបិតចំក្រោមដោះ រួចឆូតកាំបិតចុះមកក្រោមប្រវែងមួយតឹក ធ្លាយពោះវៀនមកក្រៅស្លាប់យ៉ាងអាណោចអាធ័មបំផុត ខណៈក្មេងប្រុសនេះទៅចាំសំណាបនៅឯស្រែចម្ងាយប្រមាណជាង១០០ម៉ែត្រពីផ្ទះ ។ ហេតុការណ៍សម្លាប់គួរឱ្យរន្ធត់នេះ បានធ្វើឱ្យមានការភ្ញាក់ផ្អើលកាលពីវេលាម៉ោង៦ល្ងាចថ្ងៃទី១៥ សីហា នៅភូមិត្រពាំងបី ឃុំតាកែន ស្រុកឈូក ។
លោក កឹម វិុត អាយុ៤៣ឆ្នាំ ជាឪពុកកុមាររងគ្រោះបានឱ្យសមត្ថកិច្ចដឹងថា នៅ វេលាម៉ោង២រសៀលថ្ងៃនោះ រូបគាត់និងភរិយា បានឱ្យកូនទៅចាំសំណាបនៅឯស្រែ មានចម្ងាយប្រមាណជាង១០០ម៉ែត្រប៉ុណ្ណោះពីផ្ទះ ។ លុះដល់ម៉ោងជាង៥ល្ងាចមិនឃើញកូនមកផ្ទះ ក៏ទៅតាមរក ស្រាប់តែឃើញកូនស្លាប់បាត់បង់ជីវិតនៅក្បែរថ្នាលសំណាប ដោយមានស្នាមកាប់នឹងកាំបិតចំក្រោមដោះ រួចវះពោះធ្លាយពោះវៀនចេញមកក្រៅ ព្រមទាំងកាត់ដៃឆ្វេងត្រឹមក្រោមកំភួនដៃបន្តិចដាច់បាត់មិនឃើញដៃដែលដាច់នោះទេ ។ ពេលឃើញហេតុការណ៍ដូច្នេះគាត់ក៏រត់ទៅប្តឹងនគរបាលប៉ុស្តិ៍រដ្ឋបាល ហើយនគរបាលប៉ុស្តិ៍រដ្ឋបាលក៏រាយការណ៍ភ្លាមៗមកអធិការនគរបាលស្រុកឈូក ដើម្បីឱ្យនគរបាលជំនាញចុះពិនិត្យសព ។
នៅវេលាម៉ោង៧យប់ថ្ងៃដដែល ទើបកម្លាំងអធិការដ្ឋាននគរបាលស្រុក រួមនឹងសមត្ថកិច្ចបច្ចេកទេសនៃស្នងការដ្ឋាននគរបាលខេត្តចុះពិនិត្យដល់កន្លែងកើតហេតុ ។ ក្រោយពីពិនិត្យភិនភាគ ស្លាកស្នាមសព សមត្ថកិច្ចសង្ស័យថាជារឿងគំនុំរបស់មនុស្សចាស់ ទើបឈានដល់ការសម្លាប់កាត់ដៃ ហើយវះពោះដើម្បីបញ្ឈឺ ប៉ុន្តែពោះវៀនដែលធ្លាយនោះ ត្រូវបានគេញាត់ចូលវិញ មិនបាត់បង់គ្រឿងក្នុងអ្វីទេ បាត់តែដៃមួយកំណាត់ មិនដឹងឃាតករកាត់ហើយគ្រវាត់ចោល ឬយកទៅណាឡើយ ។
ជុំវិញករណីឃាតកម្មបិទមុខខាងលើនេះ សមត្ថកិច្ចបានដាក់ការសង្ស័យលើចំណុចខ្លះៗហើយ ប៉ុន្តែដោយក្រុមគ្រួសារកុមាររងគ្រោះកំពុងមានទុក្ខកង្វល់ សមត្ថកិច្ចពុំទាន់អាចធ្វើការសួរនាំដើម្បីរកប្រភពវែកមុខឃាតករបាននៅឡើយទេ ។ មន្ត្រីសមត្ថកិច្ចអះអាងថា នឹងរកឃើញឃាតករនៅពេលដ៏ខ្លីខាងមុខ ក្រោយពីគ្រួសារកុមាររងគ្រោះចប់ពីពិធីបុណ្យសព ។ សូមបញ្ជាក់ថា កុមាររងគ្រោះឈ្មោះវ៉ែន សុធា អាយុ៧ឆ្នាំ ជាកូនពៅ ក្នុងចំណោមបងប្អូនទាំង៧នាក់ក្នុងបន្ទុកឪពុកម្តាយ ។
ជុំវិញករណីឃាតកម្មសម្លាប់ក្មេងប្រុសអាយុ៧ឆ្នាំម្នាក់ដោយកាត់ដៃមួយកំណាត់ត្រឹមកដៃ និងវះពោះតាម ប្រភពអះអាងពីក្រុមគ្រួសារថា ឱ្យកូនទៅចាំសំណាប រួចត្រូវជនមិនស្គាល់មុខសម្លាប់បំបិទភស្តុតាង ។ ក្រោយពីកើតហេតុ សមត្ថកិច្ចជំនាញចុះទៅស្រាវជ្រាវទើបមានការសង្ស័យទៅលើឪពុកក្មេងនោះតែម្តង ។
ប្រភពមួយឱ្យសមត្ថកិច្ចដឹងថា ពេលហូបបាយថ្ងៃត្រង់រួចឪពុកបានដេញកុមាររងគ្រោះជាកូនឱ្យទៅងូតទឹក រួចឱ្យទៅចាំសំណាបផង ។ ពេលកុមាររងគ្រោះចេញទៅឪពុកក៏ដើរតាមពីក្រោយ ព្រមទាំងកាន់កាំបិតបន្ទោះចុងស្រួចនៅនឹងដៃផង ។ លុះទៅដល់កន្លែងជិតថ្នាលសំណាបដែលនៅក្បែរនោះមានត្រពាំងទឹកមួយឪពុកក៏ចាប់ផ្តើមសម្លាប់កូនដោយចាក់ក្រោមដោះមួយកាំបិត រួចអូសចុងកាំបិតចុះក្រោមរហូតកុមាររងគ្រោះស្លាប់បាត់បង់ជីវិត និងយកចុងកាំបិតឆ្កឹះពោះវៀនហើយកាត់ដៃកូនមួយកំណាត់យកទៅកប់ទុកនៅក្បែរត្រពាំងទឹកមួយ រីឯខ្លួនសាកសពបានបីយកទៅលាក់ក្នុងព្រៃស្បូវមួយកន្លែងនៅក្បែរត្រពាំងទឹកនោះដែរ ហើយក៏ដើរមកផ្ទះជាធម្មតា ។ លុះពេលល្ងាចម៉ោង៥ថ្ងៃទី១៥ សីហា បានដេញកូនប្រុសបងឱ្យទៅតាមរកប្អូន។ ចំណែកកូនប្រុសដែលទៅតាមរកប្អូននោះដោយរកមិនឃើញ ក៏ត្រឡប់មកប្រាប់ឪពុកវិញ ។
ក្រោយមកបុរសជាឪពុកមានចិត្តហាក់ដូចជានឹកអាណិតកូនដែលខ្លួនសម្លាប់ហើយយកទៅលាក់នោះ ក៏ដើរទៅបីសពកូនពីក្នុងព្រៃដែលលាក់ទុកនោះមកផ្ទះ ធ្វើឱ្យសមត្ថកិច្ចដឹងហេតុការណ៍នេះ ទើបមានចំណុចសង្ស័យក៏ឃាត់ខ្លួនរួចសួរនាំទៅទើបឪពុកសារភាពថា កូនប្រុសនេះខ្លួនបានសម្លាប់ដោយផ្ទាល់ដៃមែន ដោយខ្លួនយល់ថា កូននេះជាសត្វទើបខ្លួនសម្លាប់ហើយកាត់ដៃយកទៅកប់ទៀត ។ ក្រោយពេលមកដល់ផ្ទះវិញខ្លួនដូចជាភ្ញាក់ខ្លួនដឹងថា ការសម្លាប់នេះគឺសម្លាប់កូនខ្លួនឯងមិនមែនជាសត្វទេ ។ ក្រោយពីសមត្ថកិច្ចឃាត់ខ្លួនមកសួរនាំ ជននេះបានសារភាពប្រាប់សមត្ថកិច្ចដូចខាងលើ ព្រមទាំងនាំសមត្ថកិច្ចទៅកាយកន្លែងកប់ដៃកូនមកវិញផងដែរ ។ តាមសម្តីអ្នកស្រុករស់នៅភូមិត្រពាំងបី ឃុំតាកែន ស្រុកឈូក នេះបានអះអាងប្រាប់សមត្ថកិច្ចក្រោយពេលមានកើតហេតុខាងលើថា បុរសឈ្មោះកឹម វ៉ិត អាយុ៤៣ឆ្នាំ នេះជាមនុស្សរៀនមន្តអាគមអាបធ្មប់ អ្នកណាក៏ខ្លាចឈ្មោះនេះដែរ ពីព្រោះឈ្មោះនេះច្រើនតែកំរោលចូល វាយប្រពន្ធកូន ជាញឹកញាប់ ។ បច្ចុប្បន្នប្រពន្ធកូនពុំសូវហ៊ាននៅជិតគាត់ទេ ហើយមានថ្ងៃខ្លះបុរសរូបនេះបានសាច់សត្វព្រៃមកស៊ីឆៅមិនបាច់ចម្អិនក៏មានដែរ ។
ក្រោយពីជននេះបានសារភាពពីសកម្មភាពដែលខ្លួនបានប្រព្រឹត្ត សមត្ថកិច្ចការិយាល័យនគរបាលកណ្តាលយុត្តិធម៌នៃស្នងការដ្ឋាននគរបាលខេត្តបានឃាត់ខ្លួនជននេះនាំមកកាន់ស្នងការដ្ឋាននគរបាលខេត្តនៅល្ងាចថ្ងៃទី១៦ សីហា ដើម្បីកសាងសំណុំរឿងបញ្ជូនទៅសាលាដំបូងខេត្ត ផ្តន្ទាទោសតាមច្បាប់ ៕
ចែករំលែកព័តមាននេះ