រាជធានីភ្នំពេញ ៖ កាលពីថ្ងៃទី១៦ សីហា សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា មានប្រសាសន៍ថា «កម្ពុជា-វៀតណាមជំរុញល្បឿនការងារខណ្ឌសីមា និងបោះបង្គោលព្រំដែនគោកឲ្យចប់សព្វគ្រប់នាឆ្នាំ២០១២»។ ប្រសាសន៍របស់សម្តេចពញាចក្រីបែប នេះក្នុងជំនួបជាមួយគណៈប្រតិភូជាន់ខ្ពស់វៀតណាមដឹកនាំដោយលោកង្វៀន ស្វិនហ៊ុក ឧបនាយករដ្ឋមន្ត្រី និងជាសមាជិកការិយាល័យនៃគណៈកម្មាធិការមជ្ឈិមបក្ស និងជាប្រធានគណៈកម្មាធិការជាតិត្រួតពិនិត្យគ្រឿងញៀន អេដស៍ និងពេស្យាចារ វៀតណាម ។
សម្តេចពញាចក្រី មានប្រសាសន៍ថា សភាកម្ពុជា សូមគាំទ្រ និងអបអរសាទរចំពោះការខិតខំអនុវត្តប្រកបដោយជោគជ័យនូវបណ្តាសន្ធិសញ្ញា អនុសញ្ញា និងកិច្ចព្រមព្រៀងនានារវាងរដ្ឋាភិបាលនៃប្រទេសទាំងពីរ ក្នុងនោះមានជាអាទិ៍ ជំរុញកិច្ចអភិវឌ្ឍសេដ្ឋកិច្ច សង្គមកិច្ច បើកទូលាយការវិនិយោគ ការផ្លាស់ប្តូរក្នុងវិស័យពាណិជ្ជកម្ម និងទេសចរណ៍ ។ ពង្រឹងកិច្ចសហប្រតិបត្តិការវិស័យវប្បធម៌ អប់រំ កីឡា វិទ្យាសាស្រ្ត បច្ចេកទេស សុខាភិបាល និងបណ្តុះបណ្តាលធនធានមនុស្ស ជំរុញកិច្ចសហប្រតិបត្តិការក្នុវិស័យថាមពល និងហេដ្ឋារចនាសម្ព័ន្ធ និងធុរកិច្ច ជួយឧបត្ថម្ភគាំទ្រគ្នាក្នុងការការពារគ្រោះមហន្តរាយ និងវិស័យធនធានមនុស្សធម៌ និងជំរុញល្បឿនការងារខណ្ឌសីមា និងការបោះបង្គោលព្រំដែនគោកកម្ពុជា-វៀតណាម ឲ្យចប់សព្វគ្រប់ក្នុងឆ្នាំ២០១២ ដើម្បីកសាងខ្សែបន្ទាត់ព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍប្រកបដោយចីរភាព ។
ក្នុងជំនួបនោះលោកង្វៀន ស្វិនហ៊ុក ថ្លែងអំណរគុណចំពោះសម្តេចពញាចក្រី ហេង សំរិន ដែលបានផ្តល់ភាពកក់ក្តៅដល់ប្រតិភូ ហើយលោកក៏បានសម្តែងការអបអរសាទរកម្ពុជាដែលសម្រេចបានលើគ្រប់វិស័យ ជាអាទិ៍ អបអរសាទរចំពោះការបោះឆ្នោតព្រឹទ្ធសភា និងក្រុមប្រឹក្សាឃុំ-សង្កាត់ ។ ទន្ទឹមនេះលោកបានជូនពរចំពោះកម្ពុជាដែលធ្វើជាម្ចាស់ផ្ទះអាស៊ាននាថ្ងៃខាងមុខឱ្យទទួលបានជោគជ័យ ។
លោកឧបនាយករដ្ឋមន្ត្រីវៀតណាម បានជម្រាបសម្តេចពញាចក្រីថា នៅពេលខាងមុខមានការប្រជុំមួយដែលរំលឹកដល់ទំនាក់ទំនងការទូតរយៈពេល៤៥ឆ្នាំនៃមិត្តភាពកម្ពុជា-វៀតណាមនៅទីក្រុងហូជីមិញចាប់ពីថ្ងៃទី២២ដល់ថ្ងៃទី២៥ សីហា ៕
ចែករំលែកព័តមាននេះ