ខេត្តកណ្តាល ៖ យុវជនម្នាក់ដែលបានភ្ជាប់ពាក្យជាមួយនាងក្រមុំម្នាក់នៅក្នុងភូមិជាមួយគ្នារយៈពេលជិតមួយឆ្នាំមកហើយ តែមិនទាន់កំណត់ថ្ងៃរៀបការនៅឡើយ ស្រាប់តែប៉ុន្មានថ្ងៃមុននេះ ម្តាយខាងស្រីបានទៅផ្តាច់ពាក្យវិញ ធ្វើឲ្យយុវជនរូបនេះខូចចិត្តគិតខ្លីលែងចង់រស់តទៅទៀត ក៏បានផឹកថ្នាំបំពុលកុកស្លាប់បាត់បង់ជីវិតក្រោយពេលក្រុមគ្រួសារនាំទៅសង្គ្រោះដល់មន្ទីរពេទ្យព្រះកុសុមៈ ។ ចំណែកនាងជាគូដណ្តឹងវិញ ដែលស្រលាញ់យុវជននេះខ្លាំងមិនចាញ់គ្នាប៉ុន្មាន មិនដឹងថាត្រូវធ្វើបែបណា ក្រោយពេលដឹងថា យុវជនជាគូដណ្តឹងផឹកថ្នាំពុលសម្លាប់ខ្លួននោះ នាងក៏បានផឹកប្រេងរំអិលម៉ាស៊ីនដេរប៉ុនប៉ងសម្លាប់ខ្លួនដែរ ប៉ុន្តែមិនស្លាប់ទេត្រូវបានក្រុមគ្រួសារនាំទៅសង្គ្រោះទាន់ពេលវេលា នៅមន្ទីរពេទ្យ ។
ហេតុការណ៍នេះបានកើតឡើងកាលពីវេលាម៉ោង៤និង៣០នាទីទៀបភ្លឺថ្ងៃទី១៦ សីហា នៅក្នុងភូមិថ្មី ឃុំបែកចាន ស្រុកអង្គស្នួល ។ យុវជនដែលស្លាប់បាត់បង់ជីវិត ព្រោះតែការផ្តាច់ពាក្យឈ្មោះកើត សាវី អាយុ២២ឆ្នាំ ជាកម្មកររោងចក្រកាត់ដេរ បានផឹកថ្នាំបំពុលកុកអស់ចំនួន២កញ្ចប់ បណ្តាលឲ្យស្លាប់ក្រោយពេលបញ្ជូនទៅសង្គ្រោះដល់មន្ទីរពេទ្យព្រះកុសុមៈ ។ ដោយឡែកនាងជាគូដណ្តឹងឈ្មោះអុល ផល្លី ហៅម៉ាប់ អាយុ២៣ឆ្នាំ មានទីលំនៅក្នុងភូមិជាមួយគ្នា ជាកម្មការិនីរោងចក្រកាត់ដេរ ។ នាងបានផឹកប្រេងរំអិលម៉ាស៊ីនដេរអស់កន្លះកូនដបប៉ុនប៉ងសម្លាប់ខ្លួន តែមិនស្លាប់ព្រោះត្រូវបានក្រុមគ្រួសារនាំយកទៅសង្គ្រោះនៅមន្ទីរពេទ្យព្រះកុសុមៈទាន់ពេលវេលា។
ក្រុមគ្រួសារយុវជនខូចចិត្តរូបនេះ បានឲ្យប៉ូលិសដឹងថា យុវជនកើត សាវី និងនាងអុល ផល្លី បានភ្ជាប់ពាក្យជាមួយគ្នាតាំងពីអំឡុងខែវិច្ឆិកាឆ្នាំ២០១១មកម៉្លេះ តែមិនទាន់បានកំណត់ថ្ងៃរៀបការនៅឡើយ ដែលរហូតមកទល់នឹងពេលនេះមានរយៈពេលជិត១ឆ្នាំហើយ ។ ថ្វីដ្បិតតែមិនទាន់រៀបការក៏ពិតមែន ប៉ុន្តែពួកគេទាំងពីរនាក់ស្រលាញ់គ្នាយ៉ាងប្តូរផ្តាច់បំផុត គឺដើរទៅណាមកណាជាមួយគ្នាដូចលលក
ញីឈ្មោល ។
ប្រភពព័ត៌មានបានឱ្យដឹងថា កាលពីយប់ថ្ងៃទី១១ សីហា រយៈពេល៥ថ្ងៃមុនពេលកើតហេតុ ម្តាយខាងស្រីបានទៅផ្តាច់ពាក្យឈប់ឲ្យពួកគេទាំងពីរនាក់រៀបការ ដោយយកហេតុផលថា យុវជន កើត សាវី គិតតែផឹកស្រាស្រវឹងរាល់ថ្ងៃ ហើយគាត់ស្អប់អ្នកពូកែផឹកស្រាបែបនេះណាស់ ។ បន្ទាប់ពីម្តាយខាងស្រីផ្តាច់ពាក្យ ធ្វើឲ្យយុវជន កើត សាវី ខូចចិត្តយ៉ាងខ្លាំង ហើយរឹតតែផឹកស្រាខ្លាំងឡើងថែមទៀត និងមិនហូបបាយហូបទឹកទេ ព្រោះឈឺចិត្តពេក ទោះបីជាក្រុមគ្រួសារ និងបងប្អូនណែនាំឲ្យកាត់ចិត្តកាត់ថ្លើមបែបណាក៏មិនស្តាប់ដែរ ។ លុះដល់ថ្ងៃកើតហេតុ យុវជនខូចចិត្តបានយកថ្នាំបំពុលសត្វកុក២កញ្ចប់ដាក់ក្នុងកែវលាយជាមួយទឹករួចផឹករហូតដល់អស់ពីកែវដើម្បីសម្លាប់ខ្លួន ហើយភ្លាមៗនោះប្អូនប្រុសរបស់គេម្នាក់ទៅទាន់ក៏ស្រែកឆោឡោបង្កឲ្យមានការភ្ញាក់ផ្អើលឡើង ។
ប្រភពដដែលបានបន្តទៀតថា ខណៈនោះគេបាននាំយកយុវជនរងគ្រោះទៅកាន់គ្លីនិកឯកជនមួយ ដើម្បីសង្គ្រោះបន្ទាន់ដែរ ប៉ុន្តែពេលទៅដល់គ្រូពេទ្យមិនហ៊ានមើលទេ និងបានបញ្ជូនបន្តទៅកាន់មន្ទីរពេទ្យបង្អែកស្រុកអង្គស្នួល ហើយគ្រូពេទ្យបានដាក់សេរ៉ូមរួចបញ្ជូនបន្តយ៉ាងប្រញាប់ប្រញាល់ទៅកាន់មន្ទីរពេទ្យព្រះកុសុមៈ ។ ទោះបីជាបែបណា យឺតពេលទៅហើយគ្រូពេទ្យពុំអាចសង្គ្រោះបានក៏ស្លាប់ទៅ ។
ដោយឡែក នាងជាគូដណ្តឹងបន្ទាប់ពីបានដឹងថា គូកម្មរបស់នាងផឹកថ្នាំពុលសម្លាប់ខ្លួនបែបនេះ នាងខូចចិត្តយ៉ាងខ្លាំង ព្រោះនាងក៏ស្រលាញ់គេខ្លាំងណាស់ដែរ ហើយភ្លាមៗនោះនាងបានយកថ្នាំបំពុលកណ្តុរប៉ុនប៉ងផឹកសម្លាប់ខ្លួនដែរ ប៉ុន្តែម្តាយនាងឃើញទាន់ក៏យកចេញទាន់ ។ លុះពេលម្តាយភ្លេចខ្លួនបន្តិច នាងបានស្ទុះទៅយកប្រេងរំអិលម៉ាស៊ីនដេរមកផឹកអស់កន្លះកូនដប បណ្តាលឲ្យធ្វើទុក្ខយ៉ាងខ្លាំង និងត្រូវបានក្រុមគ្រួសារនាំយកទៅសង្គ្រោះទាន់ពេលវេលា ។
នេះគឺជារឿងមិនគួរឲ្យកើតមាននោះទេ ដែលអាណាព្យាបាលគ្រប់រូបគួរតែចេះពិចារណាមុននឹងទុកដាក់កូនចៅឲ្យមានគូស្រករ និងគួរតែពិនិត្យឲ្យបានច្បាស់លាស់ជាមុនសិន ដើម្បីចៀសវាងការឯកភាពគ្នាហើយ បែរជាមិនពេញចិត្ត រួចក៏ផ្តាច់ពាក្យវិញនាំឲ្យកើតមានរឿងគួរឲ្យសោកសង្រេងបែបនេះ ដែលបង្កើតបាននូវវិប្បដិសារីអស់មួយជីវិត ៕
ចែករំលែកព័តមាននេះ