ខេត្តក្រចេះ ៖ ភ្នាក់ងារកាសែតទូរទស្សន៍ និងវិទ្យុប្រចាំតំបន់ប៉ែកឦសានប្រទេសជាច្រើនរូបទទួលបានវគ្គបណ្តុះបណ្តាលការយកព័ត៌មានពីការប្រែប្រួលអាកាសធាតុ មានរយៈពេល២ថ្ងៃជាប់ៗគ្នាគិតចាប់ពីថ្ងៃទី១៦ សីហា ២០១២ នៅក្នុងសាលប្រជុំសណ្ឋាគារ លីជឺ ក្នុងក្រុងក្រចេះ។
វគ្គបណ្តុះបណ្តាលដែលមានរយៈពេល២ថ្ងៃដល់ភ្នាក់ងារកាសែត ទូរទស្សន៍ និងវិទ្យុក្នុងស្រុកប្រចាំតំបន់ភូមិភាគឦសាននៃប្រទេសកម្ពុជានេះ គឺបានរៀបចំ និងសម្របសម្រួលពីសំណាក់លោកមឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សា ផ្នែកសារព័ត៌មាន និងផ្តល់មូលនិធិដោយបណ្តាញសារព័ត៌មានផែនដី និងអីុនថឺញូស៌ និងវាគ្មិនមកពីបណ្តាមន្ទីរអង្គការពាក់ព័ន្ធនានាជុំវិញខេត្តមួយចំនួនទៀត។
នារីឈ្មោះដានី ជាសហការីអ្នកយកព័ត៌មានវិទ្យុក្នុងស្រុកប្រចាំនៅខេត្តក្រចេះ និយាយថា វគ្គបណ្តុះបណ្តាលមួយពីការប្រែប្រួលអាកាសធាតុ នេះគឺមានគុណប្រយោជន៍សម្រាប់រូបនាង និងអ្នកកាសែត ក៏ដូចជាអ្នកផ្សព្វផ្សាយដែលត្រូវការសរសេរអត្ថបទពាក់ព័ន្ធទៅនឹងការប្រែប្រួសអាកាសធាតុនៅតាមតំបន់រៀងខ្លួនឱ្យកាន់តែស៊ីជំរៅបន្ថែមទៀត ខណៈពេលដែលក្នុងប្រទេសកម្ពុជា ក៏ដូចជានៅលើសកលលោកកំពុង តែមានការប្រឈមទៅនឹងបម្រែបម្រួលអាកាសធាតុនេះ។
លោកពៅ សាវុធ អ្នកគ្រប់គ្រងវគ្គបណ្តុះបណ្តាលមកពីវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មានហៅកាត់ថា (CIMS) បានមានប្រសាសន៍ថា ការបើកវគ្គបណ្តុះបណ្តាលនេះឡើង គឺមានគោលបំណងចង់ឱ្យអ្នកសារព័ត៌មានកាន់តែមានចំណេះដឹងមូលដ្ឋានអំពីបម្រែបម្រួលអាកាសធាតុ ព្រោះកត្តានេះ មិនមែនជារឿងបុគ្គល ឬជារឿងគ្រួសារមួយ ឬសហគមន៍មួយនោះទេ ដែលគេចាត់ទុកថា ជារឿងកង្វល់របស់ពិភពលោកទាំងមូល និងចាត់ទុកថា ជាប្រធានបទដ៏សំខាន់ដែលពិភពលោកមានការព្រួយបារម្ភ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ