តុលាការកំពូលរបស់អូស្ត្រាលី ព្រមព្រៀងលើច្បាប់ថ្មីរបស់រដ្ឋាភិបាល ដែលកំណត់លើកញ្ចប់បារីដែលលក់នៅក្នុងប្រទេស ត្រូវតែជាកញ្ចប់លាត ហាមរំលេចស្លាកយីហោ តែត្រូវបង្ហាញរូបភាពពីផលប៉ះពាល់ពីការជក់បារី ។ កញ្ចប់បារីរូបភាពថ្មីនៅលើផ្ទៃកញ្ចប់ត្រូវមានពណ៌បៃតងដោយមានរូបភាព និងពាក្យដាស់តឿនពីគ្រោះថ្នាក់នៃការជក់បារី ។ ច្បាប់នេះចូលជាធរមានចាប់ពីថ្ងៃទី១ ខែធ្នូ ខាងមុខត
ទៅ ។
តុលាការបញ្ជាក់នៅក្នុងសេចក្តីថ្លែងការណ៍ថា សំឡេងភាគច្រើនរបស់តុលាការបង្ហាញការយល់ស្របថាច្បាប់នោះមិនជំទាស់នឹងរដ្ឋធម្មនុញ្ញរបស់អូស្ត្រាលីទេ ខណៈពេលក្រុមហ៊ុនបារីជាច្រើន រួមមាន ក្រុមហ៊ុនប្រ៊ីធីស អាមេរិក តូបាកូ និងហ្វ៊ីលីប ម័ររីស បានអះអាងថា ច្បាប់នោះល្មើសនឹងកម្មសិទ្ធិបញ្ញា និងប្រឆាំងលើរដ្ឋធម្មនុញ្ញរបស់អូស្ត្រាលី ។
អង្គចៅក្រមតុលាការកំពូលរបស់អូស្ត្រាលីដែលពិភាក្សាលើបណ្តឹងរវាងរដ្ឋាភិបាលអូស្ត្រាលី និងក្រុមហ៊ុនផលិតបារីនៅក្នុងប្រទេស បញ្ជាក់ថា ច្បាប់ដែលចេញដោយរដ្ឋាភិបាលកំណត់ឱ្យកញ្ចប់បារីដែលដាក់លក់ក្នុងប្រទេសហាមបង្ហាញស្លាកយីហោទំនិញគឺជាច្បាប់មិនជំទាស់នឹងរដ្ឋធម្មនុញ្ញ និងមិនចាត់ទុកថា ជាការល្មើសលើកម្មសិទ្ធិបញ្ញា ដូចដែលក្រុមហ៊ុនបារីរួមគ្នាចោទប្រកាន់ទេ ។
ច្បាប់នោះបានឆ្លងកាត់ការយល់ព្រមពីរដ្ឋាភិបាលកាលពីឆ្នាំមុន ដោយអាជ្ញាធរបានបញ្ជាក់ថា កញ្ចប់បារីប្រភេទថ្មីនេះ នឹងជួយកាត់បន្ថយចំនួនអ្នកជក់បារីបាន ខណៈពេលក្រុមហ៊ុនមានអំណះអំណាងថា ច្បាប់នេះនឹងធ្វើឱ្យប្រាក់ចំណូលធ្លាក់ចុះ និងហាក់ដូជាទ្រទ្រង់ឱ្យមានបារីក្លែងបន្លំហូរចូលក្នុងទីផ្សារ ។ រដ្ឋាភិបាលអូស្ត្រាលីបានប៉ាន់ប្រមាណថា ក្នុងមួយឆ្នាំៗមានជនជាតិអូស្ត្រាលីស្លាប់ដោយជំងឺ ទាក់ទងនឹងការជក់បារីជាង១៥.០០០នាក់ ធ្វើឱ្យខាតបង់លើថ្លៃចំណាយក្នុងការព្យាបាលមួយឆ្នាំប្រហែល៣ម៉ឺនលានដុល្លារអូស្ត្រាលី ៕
ចែករំលែកព័តមាននេះ