រាជធានីភ្នំពេញ ៖ ក្រុមយុវជនស្ម័គ្រចិត្តចុះវាស់វែងដីធ្លីជូនប្រជាពលរដ្ឋដែលពុំទាន់មានកម្មសិទ្ធិស្របច្បាប់ចំនួន៤២០នាក់មកពីខេត្តគោលដៅចំនួន៨ ក្នុងនោះខេត្តកែបចំនួន២ក្រុម កោះកុង៤ក្រុម ព្រះសីហនុ៤ក្រុម សៀមរាប៣ក្រុម ព្រះវិហារ៥ក្រុម ពោធិ៍សាត់៦ក្រុម ឧត្តរមានជ័យ៨ក្រុម និងខេត្តតាកែវចំនួន៣ក្រុម បានវិលត្រឡប់មកជួបជុំបងប្អូនក្រុមគ្រួសារវិញ បន្ទាប់ពីទទួលបានការឈប់សម្រាករយៈពេល៥ថ្ងៃក្រោយពេលបំពេញការងារចំនួន១ខែពេញ។
ការវិលត្រឡប់របស់យុវជនស្ម័គ្រចិត្តចុះវាស់វែងដីធ្លីជូនប្រជាពលរដ្ឋជំហានទី៣នេះ ត្រូវបានទទួលស្វាគមន៍ពីសំណាក់មន្ត្រីរបស់ក្រសួងដែនដីនគរូបនីយកម្ម និងសំណង់នៅទីស្តីការក្រសួងកាលពីថ្ងៃទី១៥ សីហា ២០១២។
យុវតី ម៉ៅ វឌ្ឍនា ជាប្រធានក្រុមយុវជនស្ម័គ្រចិត្តចុះវាលទី៩៣ ក្នុងខេត្តតាកែវ បាននិយាយប្រាប់អ្នកសារព័ត៌មាននាឱកាសនោះថា ក្នុងរយៈពេលបំពេញបេសកកម្មវាស់វែងដីធ្លីពេញមួយខែមកនេះ គឺទទួលបានលទ្ធផលផ្លែផ្កាជាច្រើន មិនមានជួបប្រទះនូវឧបសគ្គអ្វីធ្ងន់ធ្ងរឡើយ។ ការទទួលបានជោគជ័យគួរឲ្យកត់សម្គាល់នេះ គឺដោយសារតែមានការចូលរួមសហការយ៉ាងល្អពីសំណាក់អាជ្ញាធរដែនដី ជាពិសេសបានទទួលការរាក់ទាក់ពីប្រជាពលរដ្ឋដែលរស់នៅទីនោះផងដែរ។ ការបំពេញបេសកកម្មវាស់វែងដីធ្លីក្នុងរយៈពេលមួយខែនេះក្រុមការងាររបស់កញ្ញា មិនមានបញ្ហាអ្វីចោទឡើយទាំងការស្នាក់នៅនិងការហូបចុក ព្រោះមានការយកចិត្តទុកដាក់ពីអាជ្ញាធរនៅក្នុងតំបន់នោះ ជាពិសេសគឺទទួលបានការយកចិត្តទុកដាក់យ៉ាងខ្លាំងពីសម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ