រាជធានីភ្នំពេញ ៖ អាចារ្យនិងអាចារិនីចំនួន៣៩៧អង្គ-នាក់ បានជួបជុំគ្នានៅក្រសួងធម្មការ និងសាសនាដើម្បីទទួលចំណេះដឹងបន្ថែមក៏ដូចជាការតម្រង់ទិសអាចារ្យទាំងនោះឲ្យឯកភាពគ្នាក្នុងការដឹកនាំប្រជាពលរដ្ឋនៅតាមមូលដ្ឋានឲ្យយល់ដឹងពីតម្លៃវប្បធម៌ដ៏ល្អផូរផង់របស់ខ្មែរយើង កាលពីរសៀលថ្ងៃទី១៥ សីហា។
លោក មិន ឃិន រដ្ឋមន្ត្រីក្រសួងធម្មការ និងសាសនា មានប្រសាសន៍ថា ការបើកវគ្គបណ្តុះបណ្តាលនេះពិតជាផ្តល់ឱកាសយ៉ាងល្អចំពោះអាចារ្យនិងអាចារិនីទាំងអស់បានជួបជុំផ្លាស់ប្តូរយោបល់ពីគ្នាទៅវិញទៅមក និងបានយល់ដឹងពីវិធីសាស្ត្រក្នុងការដឹកនាំពិធីមង្គលការនិងពិធីបុណ្យផ្សេងៗ ។
លោកមិន ឃិន បានកោតសរសើរដល់លោកអាចារ្យនិងអាចារិនីដែលបានលះបង់ពេលវេលាដ៏មមាញឹកក្នុងរដូវវស្សាមកសិក្សាចំណេះដឹងបន្ថែម ព្រមទាំងបានជំរុញឲ្យគ្រូឧទ្ទេសទាំងអស់ខិតខំពន្យល់ឲ្យបានពិស្តារនូវរាល់មេរៀននីមួយៗ ។លោកឧទ្ទេសាចារ្យ ប៉ុក វណ្ណធីរ មានប្រសាសន៍ថាក្រសួងធម្មការនិងសាសនា បើកវគ្គបណ្តុះបណ្តាលនេះបានចំនួន១០វគ្គ រួចមកហើយ សរុបអាចារ្យទាំងអស់ចំនួន៣.០៨៩ នាក់ ។ តាមរយៈការបណ្តុះបណ្តាលចំនួន១០វគ្គរួចមកហើយនោះឃើញថា អាចារ្យទាំងអស់ចេះសាមគ្គីគ្នា ស្រលាញ់គ្នា និងរាប់អានគ្នា និងបានចងក្រងជាសមាគមអាចារ្យខ្មែរ ។
តាមរយៈការផ្តល់កិច្ចសម្ភាសន៍ លោកតាអាចារ្យនៅវត្តស្អំ ស្ថិតនៅស្រុកពញាក្រែក ខេត្តកំពង់ចាម មានប្រសាសន៍ថា រូបគាត់មានសេចក្តីរីករាយណាស់ដោយបានក្រសួងធម្មការ និងសាសនាបើកវគ្គបណ្តុះបណ្តាលនេះឡើង គឺដើម្បីឲ្យអាចារ្យគ្រប់រូបត្រូវយកចិត្តទុកដាក់ដឹកនាំការងារនេះឲ្យបានឯកភាពគ្នាក្នុងការបំពេញតួនាទីរបស់ខ្លួន ។
លោកតា ជា សុផាន អាចារ្យវត្តត្រពាំង ស្ថិតនៅស្រុកពញាក្រែក ខេត្តកំពង់ចាម ថ្លែងថា ការបណ្តុះបណ្តាលនេះ គឺស្ថិតនៅក្រោមការបង្ហាត់បង្រៀនពីឧទេ្ទសាចារ្យដ៏ល្អ ហើយនៅពេលដែលគាត់ត្រឡប់ទៅកាន់មូលដ្ឋានវិញនឹងយកទៅដឹកនាំពុទ្ធបរិស័ទលើការងារទាក់ទងនឹងប្រពៃណីដ៏ល្អផូរផង់របស់បុព្វបុរសយើង ៕
ចែករំលែកព័តមាននេះ