ខេត្តពោធិ៍សាត់ ៖ កាលពីថ្ងៃទី១៥ សីហា លោករដ្ឋមន្ត្រី ស៊ុយ សែម ប្រធានក្រុមការងារគណបក្សប្រជាជនកម្ពុជា ចុះជួយខេត្តពោធិ៍សាត់ បានអញ្ជើញជាអធិបតីក្នុងពិធីបញ្ចុះបឋមសិលាសាងសង់បណ្ណាល័យចំនួន២ខ្នង នៅវិទ្យាល័យអូរតាប៉ោង និងវិទ្យាល័យបាកាន ។ ក្នុងឱកាសនោះ ក៏មានការអញ្ជើញចូលរួមពីសំណាក់រដ្ឋលេខាធិការ អនុរដ្ឋលេខាធិការ ក្រសួងឧស្សាហកម្ម រ៉ែ និងថាមពល អភិបាលរងខេត្ត ក្រុមការងារ សិស្សានុសិស្ស លោកគ្រូ អ្នកគ្រូ និងប្រជាពលរដ្ឋ សរុបប្រមាណ ១.០០០នាក់។
លោក សៅ ដារឿន អភិបាលស្រុកបាកាន បានថ្លែងថា ឆ្នាំនេះនៅស្រុកបាកានធ្វើស្រែបានគ្រប់ផែនការ ៤៥.០០០ហិកតា ច្រូតកាត់រួច ៨.៥០០ហិកតា ប៉ុន្តែជួបគ្រោះរាំងស្ងួតប្រមាណ ៥.០០០ហិកតា ដែលអាជ្ញាធរ និងមន្ត្រីជំនាញធនធានទឹកកំពុងខិតខំដោះស្រាយផ្តល់ទឹកពីប្រព័ន្ធធារាសាស្ត្រដំណាក់អំពិល ។
លោកឱ្យដឹងថា ឆ្នាំនេះ គ្រឿងចក្ររបស់លោកប្រធានក្រុមការងារនិងលោកឧកញ៉ា វិញ ហួរ កសាងប្រឡាយទឹកបានប្រវែង ៦១.៩៨៤ម៉ែត្រ ផ្លូវលំដីសប្រវែង ១០៧.០១៧ ម៉ែត្រ ស្តារអូរប្រវែង ២.៤០០ម៉ែត្រ ជីកស្រះទឹកបាន ១.៦១១ និងចិញ្ចឹមត្រីបាន ៨៣៥ស្រះ។ ចំពោះ វិស័យអប់រំក៏មានការរីកចម្រើនខ្លាំងដែរ គឺឆ្នាំសិក្សា២០១១-២០១២ នេះ មានសាលាបឋមសិក្សាចំនួន៨២, មត្តេយ្យសិក្សាចំនួន២៨, អនុវិទ្យាល័យចំនួន៨ វិទ្យាល័យចំនួន៥ និងអគារសិក្សាសរុប១៨៤ខ្នង ក្នុងនោះអគារថ្មចំនួន១៤៣ខ្នង ។ ចំណែកការបញ្ចុះបឋមសិលាថ្ងៃនេះគឺសាងសង់បណ្ណាល័យចំនួន២ខ្នង ដែល១ខ្នង នៅក្នុងវិទ្យាល័យអូរតាប៉ោង និង១ខ្នងទៀតនៅវិទ្យាល័យបាកាន មានទំហំ១៦មែ៉ត្រគុណ២០មែ៉ត្រ។
លោករដ្ឋមន្ត្រី ស៊ុយ សែម ថ្លែងថា បណ្ណាល័យទាំងពីរខ្នងនេះជាអំណោយរបស់លោកឧកញ៉ា វិញ ហួរ និងលោកជំទាវ ផ្តល់ជូនជាគុណប្រយោជន៍ដល់កូនចៅយើងទាំងអស់គ្នា ដែលលោកមានស្រុកកំណើតនៅស្រុកបាកាននេះ ។ នៅពេលសាងសង់រួច លោកឧកញ៉ា នឹងបំពាក់សៀវភៅ ឯកសារ រឿងនិទាន ប្រវត្តិផ្សេងៗ កុំព្យូទ័រ និងគ្រឿងសង្ហារិម សម្រាប់សិស្សានុសិស្សស្រាវជ្រាវ និងរៀនសូត្រ ។
លោកបានផ្តាំផ្ញើដល់សិស្សានុសិស្ស ត្រូវខិតខំរៀនសូត្រ កុំធ្វើជាក្មេងទំនើងដែលសង្គមស្អប់ខ្ពើម កុំជក់ថ្នាំញៀន ឬបោះបង់ការសិក្សាទៅធ្វើចំណាកស្រុកជាដើម គឺគ្មានអនាគតល្អទេ ។ ជាមួយគ្នានេះ លោករដ្ឋមន្ត្រីបានអបអរសាទរចំពោះលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៣កន្លងមក ដែលទទួលបានជោគជ័យ លេខ១ទូទាំងប្រទេស គឺដោយសារបងប្អូនយើងទាំងអស់គ្នាស្រឡាញ់គណបក្សប្រជាជនកម្ពុជាហើយសង្ឃឹមថា ការបោះឆ្នោតជ្រើសតាំងតំណាងរាស្រ្តនាឆ្នាំ២០១៣ ខាងមុខនេះ នឹងទទួលបានជោគជ័យខ្លាំងជាងនេះថែមទៀត ។
សព្វថ្ងៃនេះ ដីនៅតំបន់២ក្នុងស្រុកបាកាន និងស្រុកកណ្តៀង មានជនខិលខូចប្រើល្បិចដើរផ្សព្វផ្សាយថា រដ្ឋដកហូតយកទាំងអស់ធ្វើឱ្យប្រជាពលរដ្ឋភិតភ័យលក់ក្នុងតម្លៃថោកៗ ហើយក្រុមជនខិលខួចនោះបានទិញយកដោយសុីឈ្នួលឱ្យក្រុមហ៊ុនណាមួយដើម្បីផលប្រយោជន៍របស់គេ ដែលបញ្ហានេះអាជ្ញាធរភូមិ ឃុំ ស្រុក ត្រូវទប់ស្កាត់ឱ្យបាន កុំចូលដៃចូលជើងជាមួយគេហើយបងប្អូនដឹងហើយ ត្រូវប្រុងប្រយ័ត្នកុំចាញ់បោកគេ ។ ក្នុងឱកាសនោះ លោកឧកញ៉ា វិញ ហួរ បានឧបត្ថម្ភដល់ លោកគ្រូ អ្នកគ្រូ សិស្សានុសិស្ស ប្រជាពលរដ្ឋ និងកងកម្លាំងប្រដាប់អាវុធ សរុប ប្រមាណ១.០០០នាក់ ក្នុងម្នាក់ៗ ១០.០០០រៀលផងដែរ៕
ចែករំលែកព័តមាននេះ