តារាវាយកូនបាល់អេស្ប៉ាញរ៉ាហ្វាអែល ណាដាល់ប្រកាសកាលពីថ្ងៃពុធថា ខ្លួនត្រូវបង្ខំចិត្តមិនទៅចូលរួមការប្រកួតក្របខណ្ឌធំ U.S Openឆ្នាំនេះបន្ទាប់ពីរបួសក្បាលជង្គង់នៅមិនទាន់ជាសះស្បើយ ។ម្ចាស់ជើងឯកក្របខណ្ឌ French Openរូបនេះមាន
ប្រវត្តិឈឺក្បាលជង្គង់ជាយូរមកហើយ។ បន្ទាប់ពីបរាជ័យក្នុងជុំទី២ក្របខណ្ឌ Wimbledonនៅប្រទេសអង់គ្លេស នាខែមិថុនាមក ណាដាល់មិនបានចូលរួមប្រកួតក្នុងកម្មវិធីណាមួយទេ ក្នុងនោះរួមទាំងព្រឹត្តិការណ៍អូឡាំពិកឆ្នាំ ២០១២ផងដែរ ។ ឯកម្មវិធី Rogers Cupនៅប្រទេសកាណាដា គេក៏មិនអាចទៅចូលរួមបានដែរ ។
ណាដាល់វ័យ២៦ឆ្នាំបានថ្លែងថា ៖«ខ្ញុំសោកស្តាយដែលត្រូវប្រកាសថា ខ្ញុំមិនអាចចេញប្រកួតបាននិងត្រូវបង្ខំចិត្តដកខ្លួនពីការប្រកួតក្របខណ្ឌ U.S Openនៅទីក្រុងញូវយ៉ក។ ជាការសោកស្តាយខ្លាំងណាស់ដែលមិនអាចទៅចូលរួមព្រឹត្តិការណ៍ដែលខ្លួនឯងទទួលបានការគាំទ្រយ៉ាងខ្លាំងក្លាក្នុងពេលកន្លងមក ប៉ុន្តែ ខ្ញុំចាំបាច់ត្រូវតែរៀបចំខ្លួនចូលប្រកួតក្នុងលក្ខខណ្ឌសុខភាពពេញបរិបូរ»។ កាលពីសប្តាហ៍កន្លងទៅថ្មីៗនេះ គេបានប្រកាសដកខ្លួនពីកម្មវិធីប្រកួតកំដៅសាច់ដុំ Cincinnati Mastersនៅសហរដ្ឋអាមេរិកផងដែរ ។
អវត្តមានរបស់គេគឺជាការគម្រាមកំហែងធំបំផុតដល់ការចូលរួមក្នុងក្របខណ្ឌ US Openដែលនឹងចាប់ផ្តើមនៅថ្ងៃទី២៧ខែនេះ ។
នៅក្នុងគេហទំព័រ ណាដាល់បានបញ្ជាក់ថា ៖«ខ្ញុំមិនអាចទៅចូលរួមការប្រកួតកម្មវិធី Cincinnati Mastersបានទេ។ ខ្ញុំនៅមិនទាន់រៀបចំខ្លួនបាននៅឡើយ ។ ខ្ញុំមិនអាចបំភ្លេចបាននូវហេតុការណ៍កាលពីឆ្នាំ២០០៨នោះឡើយ» ។ណាដាល់ធ្លាប់បានឈានចូលដល់វគ្គពាក់កណ្តាលផ្តាច់ព្រ័ត្រCincinnati Mastersកាលពីឆ្នាំ២០០៨ និងដណ្តើមបានចំណាត់ថ្នាក់លេខ១ពិភពលោកពីកីឡាករស្វ៊ីសរ៉ូជើហ្វេដឺរ័រ ។
ការដកខ្លួនពីកម្មវិធីប្រកួតដោយសារតែរបួសរបស់ណាដាល់ បានកើតមានជាហូរហែពោលគឺមិនមែនទើបតែឆ្នាំនេះទេ ។ កាលពីប្រកួតក្របខណ្ឌ U.S Openឆ្នាំ២០០៨ និងក្របខណ្ឌ Davis Cupវគ្គផ្តាច់ព្រ័ត្រ ណាដាល់ក៏បានអវត្តមានដោយមូលហេតុរបួសដូចជាពេលនេះដែរ ។ ១ឆ្នាំក្រោយមក គេក៏បានដកខ្លួនពីក្របខណ្ឌ Wimbledonបន្ទាប់ពីមានរបួសក្បាលជង្គង់ទាំងសងខាង ។ ណាដាល់បច្ចុប្បន្នគឺជាកីឡាករលំដាប់ទី៣ពិភពលោក ៕
ចែករំលែកព័តមាននេះ