រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី១៦ សីហា ២០១២ បានសម្រេចធ្វើការចោទប្រកាន់លោកស័ក្តិ៤កន្លះយោធាម្នាក់ពីបទប្រើអាវុធខុសច្បាប់ និងហិង្សាដោយចេតនាមានស្ថានទម្ងន់ទោស បន្ទាប់ពីបាញ់បោះសេរីក្នុងជម្លោះកូនប្រុសលេងបុកប៊ីយ៉ា ហើយប៉ុន្មានម៉ោងក្រោយមកត្រូវចាប់ខ្លួន។ មន្រ្តីយោធារូបនេះមានឈ្មោះមាស ពៅ ភេទប្រុស អាយុ៤២ឆ្នាំ បម្រើការនៅអង្គភាពនាយកដ្ឋានបុគ្គលិកក្រសួងការពារជាតិ បច្ចុប្បន្នកំពុងជាប់កម្មសិក្សាក្នុងសាលាយោធានៅប្រទេសវៀតណាម និងស្នាក់នៅផ្ទះលេខ៧២៣ ផ្លូវលំ ភូមិឫស្សី សង្កាត់ស្ទឹងមានជ័យ ខណ្ឌមានជ័យ រសៀលថ្ងៃនេះអាចនឹងត្រូវបញ្ជូនទៅឃុំខ្លួននៅគុកព្រៃ.ស។
ដើមចមឱ្យមានការឃុំខ្លួនលោកស័ក្តិ៤កន្លះម្នាក់នោះ កាលពីវេលាម៉ោង២រំលងអធ្រាត្រឈានចូលថ្ងៃទី១៤ សីហា ជនដែលត្រូវចោទបានផ្ទុះអាវុធ១គ្រាប់ ដោយកាំភ្លើងខ្លីម៉ាករ៉ូឡូ បណ្តាលឱ្យអ្នកដទៃរងរបួស។ ការផ្ទុះអាវុធនោះផ្តើមចេញមកពីកូនប្រុសរបស់លោកស័ក្តិ៤កន្លះជាម្ចាស់តាប ប៊ីយ៉ា បានមានទំនាស់ជាមួយក្រុមអ្នកមកលេងរឿងភ្នាល់គ្នាបុកប៊ីយ៉ាដាក់លុយ។ ពេលទាស់គ្នាដំបូងនោះភាគីម្ខាងបានចេញពីកន្លែងទំនាស់ទៅបាត់ហើយ ម្ចាស់ផ្ទះក៏បានបិទទ្វារដែរ ប៉ុន្តែមុនពេលបិទទ្វារផ្ទះម្ចាស់តាបប៊ីយ៉ាបានជិះម៉ូតូចេញទៅក្រៅរកទិញបង្អែមឱ្យប្រពន្ធ ខណៈពេលជិះម៉ូតូចេញទៅក៏ឃើញភាគីទំនាស់ម្ខាងនោះមានគ្នា៥នាក់ ប្រដាប់ដោយកាំបិតនឹងដំបងគ្រប់ដៃ កាន់ដើរតម្រង់មកផ្ទះតាបប៊ីយ៉ា ឃើញដូច្នោះម្ចាស់តាបប៊ីយ៉ាបានទូរស័ព្ទប្រាប់ទៅឪពុកជាមន្រ្តីយោធាពាក់ស័ក្តិ៤កន្លះដែលមានផ្ទះនៅក្បែរនោះ ដើម្បីឱ្យមកជួយអន្តរាគមន៍ជាមួយក្រុមកាំបិត និងដំបង ។ លោកមាស ពៅ ដែលជាឪពុកក៏បានមកដល់ភ្លាម ដោយមិននិយាយច្រើនទេ ក៏ដកកាំភ្លើងខ្លីបាញ់១គ្រាប់ប្រាវភ្ជុចដី ជាការគំរាមទៅភាគីម្ខាងនោះកុំឱ្យបង្កបញ្ហាដល់កូនប្រុសរបស់គេ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ