ព្រឹត្តិការណ៍ប្រណាំងកង់ដ៏ធំលំដាប់ទី២ពិភពលោក Tour of Spainឬហៅជាភាសា អេស្ប៉ាញ Vuelta a Españaឆ្នាំ២០១២នេះ នឹងចាប់ផ្តើមការប្រណាំងជាលើកទី៦៧របស់ខ្លួននៅថ្ងៃទី១៨ខែសីហាខាងមុខក្នុងទីក្រុង Pamplona ប្រទេសអេស្ប៉ាញដោយមានកីឡាករអន្តរជាតិចូលរួមប្រមាណជា ២៨៥នាក់ មកពី២២ក្រុម ។
វាជាលើកទី១ហើយចាប់តាំងពីឆ្នាំ១៩៩៤មក ដែលការប្រណាំងបានឆ្លងកាត់ទឹកដីប្រវត្តិសាស្ត្ររបស់អេស្ប៉ាញ Pamplona ។
ការប្រណាំងដែលមាន២១ដំណាក់លើចម្ងាយផ្លូវសរុប ៣.៦៦០គីឡូម៉ែត្រដោយមិនរាប់បញ្ចូលដំណាក់សាកល្បងពេលវេលាជាក្រុមចម្ងាយផ្លូវ១៦,៥គីឡូម៉ែត្រ នឹងបញ្ចប់នៅទីក្រុងម៉ាឌ្រីដថ្ងៃទី៩ខែកញ្ញាបន្ទាប់ពីដំណើរការអស់៣សប្តាហ៍ ។ ខុសពីឆ្នាំមុនៗ ការប្រណាំងឆ្នាំនេះមានវគ្គសាកល្បងពេលវេលាឯកត្តជនតែមួយលើកប៉ុណ្ណោះគឺក្នុងដំណាក់ទី១១ដែលមានចម្ងាយផ្លូវ ៣៩,៤គីឡូម៉ែត្រចេញដំណើរពីទីក្រុងCambadosឆ្ពោះទៅកាន់ទីក្រុង Pontevedra។
ដោយឡែកការប្រណាំងឡើងភ្នំគឺមាន៧ ដំណាក់ដោយក្នុងនោះ៣ដំណាក់(ដំណាក់ទី១៥, ១៦និង ២០ )ពិបាកជាងគេបំផុត ។ នៅដំ ណាក់ទាំង៣នេះ បណ្តាកីឡាករត្រូវធាក់កង់ឡើងភ្នំដែលមានចំណោតខ្លាំងនិងចម្ងាយផ្លូវឆ្ងាយផងដែរ ។ ឯកីឡាករ Juan Jose Coboដែលឈ្នះជើងឯកកាលពីឆ្នាំ ២០១១ក៏នឹងចូលការពារជើងឯករបស់ខ្លួនផងដែរ ។
សូមបញ្ជាក់ថា Juan Jose Coboគឺជាអ្នកជិះកង់ឱ្យក្រុម Movistar Team។ ក្នុងការចូលរួមឆ្នាំនេះ ក្រុម Movistar Teamមានសមាជិក១៣នាក់ក្នុងនោះ ៤នាក់ជាសមាជិកបម្រុង ។ ចំណែកកីឡាករជើងខ្លាំងរបស់អេស្ប៉ាញអាល់បឺតូ កុងតាឌ័រក៏ចូលរួមផងដែរ។ កុងតាឌ័រស្ថិតនៅលេខរៀងលើគេនៃក្រុម Team Saxo Bankដែលមានសមាជិក១៣នាក់ ៕
ចែករំលែកព័តមាននេះ