ខេត្តស្វាយរៀង ៖ កាលពីព្រឹកថ្ងៃទី១៦ សីហា មន្ដ្រីកាំកុងត្រូលខេត្ដមួយក្រុមមានគា្នប្រមាណ៧ទៅ៨នាក់ បានចុះត្រួតពិនិត្យមើលគុណភាពទំនិញ និងគ្រឿងឧបភោគបរិភោគ ដែលក្រុមអាជីវករដាក់តាំងលក់តាមផ្ទះនៅជុំវិញផ្សារវាលយន្ដ និងនៅតាមតូបលក់ដូរនានាក្នុងផ្សារវាលយន្ដ។
មន្ដ្រីកាំកុងត្រូលម្នាក់សុំមិនបញ្ចេញឈ្មោះបានប្រាប់ថា សកម្មភាពចុះត្រួតពិនិត្យគុណភាពទំនិញរបស់មន្ដ្រីកាំកុងត្រូលនាព្រឹកនេះ ធ្វើឡើងគឺដើម្បីស្វែងរកប្រភេទទំនិញដែលខូចគុណភាពផុតកំណត់ថ្ងៃបរិច្ឆេត ទំនិញដែលគ្មានដាក់កាលបរិច្ឆេទ ឬទំនិញគ្មានស្លាកសញ្ញាយីហោត្រឹមត្រូវ ដែលត្រូវបានក្រុមអាជីវករលួចបន្លំដាក់លក់ឱ្យប្រជាពលរដ្ឋ និងជាពិសេស គឺណែនាំដល់ក្រុមអាជីវករកុំឱ្យយកទំនិញទាំងនោះមកដាក់តាំងលក់បន្ដទៅទៀត។ នៅក្នុងសកម្មភាពចុះត្រួតពិនិត្យនេះ គេបានរកឃើញនូវទំនិញមួយចំនួនដែលខូចគុណភាព និងទំនិញមួយចំនួនទៀតដែលគ្មានស្លាកសញ្ញាយីហោត្រឹមត្រូវ ហើយត្រូវបានក្រុមអាជីវករដាក់តាំងលក់យ៉ាងសេរី។ មន្ដ្រីកាំកុងត្រូលដដែលនេះបានបន្ដទៀតថា ក្រោយពីរកឃើញប្រភេទទំនិញដែលខូចគុណភាពនៅតាមតូបលក់ដូររបស់អាជីវករក្រុមរបស់ខ្លួនបានដកហូតទំនិញមួយស្បោងធំជាប្រភេទនំសម្រាប់ហូបលេង ដើម្បីយកទៅពិសោធនៅក្រុងភ្នំពេញ ក្រៅពីនេះក៏បានណែនាំដល់ក្រុមអាជីវករកុំឱ្យដាក់តាំងលក់រាល់ទំនិញដែលខូចគុណភាព និងទំនិញដែលគ្មានស្លាកយីហោច្បាស់លាស់បន្ដទៅទៀតផងដែរ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ