រាជធានីភ្នំពេញ ៖ ក្រុមណាហ្គាខប បានលត់ក្រុមបៀលប្រាយយូណាយធីត ក្នុងលទ្ធផល 2-1 សម្រាប់ការជួបប្រកួតកាលពីថ្ងៃពុធទី១៥ សីហា នៅលើទីលានពហុកីឡដ្ឋានជាតិ ក្នុងព្រឹត្តិការណ៍នៃការប្រកួតបាល់ទាត់ពានរង្វាន់ Metfone Cambodian League 2012 ជុំទី២ ។
កាលពីជុំទី១ ក្រុមណាហ្គាខប ធ្លាប់លត់ក្រុមបៀលប្រាយយូណាយធីត ឱ្យចាញ់ 4-0 រួចម្តងមកហើយ សម្រាប់ឱកាសជួបគ្នាជាលើកទី២ នេះលេងបាន២៩នាទីដំបូងកីឡាករកូបអីសា ពាក់អាវលេខ៧របស់ក្រុមណាហ្គាខប មានឱកាសស៊ុតបាល់បញ្ចូលទីបាន១គ្រាប់នាំមុខមុន បន្ទាប់ពីទទួលបានការបោះបាល់យ៉ាងស្អាតពីស្លាបខាងស្តាំ គឺកីឡាករស៊ុន សុបញ្ញា ពាក់អាវលេខ២៣ ។ ក្រុមណាហ្គាខប នៅតែបន្តរកបានគ្រាប់បាល់នាំមុខ១គ្រាប់បន្ថែមទៀតនៅនាទីទី៤១ រកបានដោយកីឡាករជិន ជុំ ពាក់អាវលេខ ៩ ដែលជាការស៊ុតបាល់ប៉េណាល់ទីចម្ងាយ១១ម៉ែត្រ ។
ចូលដល់តង់ទី២ ក្រុមណាហ្គាខប មិនអាចដាក់សម្ពាធទៅលើក្រុមបៀបប្រាយយូណាយធីត ដូចតង់ទី១ទៀតបានឡើយ ផ្ទុយទៅវិញបែរជាខ្សែប្រយុទ្ធជនជាតិជប៉ុន ITODAN ពាក់អាវលេខ៣៦របស់ក្រុមបៀលប្រាយយូណាយធីត រកបានគ្រាប់បាល់១គ្រាប់សងវិញ នៅនាទីទី៩០+៣ ។ ក្រុមណាហ្គាខប ពេលនេះលេងបាន១៧ប្រកួត ឈ្នះ១១ ស្មើ៤ និងចាញ់២លើក មាន៣៧ពិន្ទុ រីឯក្រុមបៀលប្រាយយូណាយធីត លេងបាន១៧ប្រកួតដូចគ្នាឈ្នះ៧ ស្មើ៣ និងចាញ់៧លើក មាន២៤ពិន្ទុ ។ ពេលនេះក្រុមណាហ្គាខប ស្ថិតនៅលេខរៀងទី១នៃតារាងដដែល ខណៈក្រុមបៀលប្រាយយូណាយធីត ស្ថិតនៅលេខរៀងទី៦នៃតារាង ។
នៅថ្ងៃដដែលក្រុមចំការកៅស៊ូបឹងកេត ប្រកួតឈ្នះក្រុមគិរីវង់សុខសែនជ័យ ក្នុងលទ្ធផល 3-2 ។ ក្រុមចំការកៅស៊ូបឹងកេត ពេលនេះលេងបាន១៧ប្រកួត ក្នុងនោះឈ្នះ១០ ស្មើ៣ និងចាញ់៤លើក មាន៣៣ពិន្ទុ ឡើងមកឈរនៅលេខរៀងទី៣ក្នុងតារាង ។ ចំណែកក្រុមគិរីវង់សុខសែនជ័យ វិញ លេងបាន១៨ប្រកួតក្នុងនោះឈ្នះ៤ ស្មើ៥ និងចាញ់៩លើក មានតែ១៧ពិន្ទុប៉ុណ្ណោះ ទោះបីជាយ៉ាងណា ក្រុមគិរីវង់សុខសែនជ័យ មានវាសនាអាចគេចផុតពីតំបន់ដែលត្រូវកាត់ចោល ៕
ចែករំលែកព័តមាននេះ