រុស្ស៊ីដែលជាប្រទេសនិយមកីឡាហុកគីលើទឹកកក និងស្គីកាលពីថ្ងៃពុធសប្តាហ៍នេះបានដាក់ចេញនូវគោលដៅដ៏ពិបាកនិងមិនគួរឱ្យជឿលើខ្លួនឯងសម្រាប់ព្រឹត្តិការណ៍កីឡាអូឡាំពិករដូវរងារឆ្នាំ ២០១៤ដែលខ្លួនធ្វើជាម្ចាស់ផ្ទះ។ ក្នុងខណៈដែលកាលពី២ឆ្នាំមុន ខ្លួនបញ្ចប់ក្នុងលំដាប់ទី១១ ដូច្នេះការប្រកួតនៅឆ្នាំ២០១៤រុស្ស៊ីប្តេជ្ញាថា នឹងដណ្តើមយកចំណាត់ថ្នាក់កំពូលឱ្យខាងតែបាន ។
គេនៅចាំបានថា កាលពីអូឡាំពិករដូវរងារឆ្នាំ២០១០នៅក្រុងវែនខូវ័រ ប្រទេសកាណាដា រុស្ស៊ីរងការអាម៉ាស់យ៉ាងធ្ងន់ធ្ងរខណៈអត្តពលិករបស់ខ្លួនឈ្នះមេដាយមាសតែ៣គ្រឿងប៉ុណ្ណោះធៀបនឹងប្រទេសម្ចាស់ផ្ទះកាណាដាគឺខុសគ្នាដល់ទៅ ១១គ្រឿង ។
ប្រធានគណៈកម្មាធិការអូឡាំពិករុស្ស៊ីបានថ្លែងថា ការដណ្តើមយកចំណាត់ថ្នាក់លើគេលើតារាងមេដាយសរុបគឺជារឿងដែលមិនអាចតថ្លៃបាន បើទោះណាវាជាកិច្ចការយ៉ាងលំបាកក៏ដោយ ។ លោក Alexander Zhukovបានបន្តថា៖« យើងមានគោលដៅមួយគឺដណ្តើមយកលំដាប់ទី១ ។ និយាយដោយស្មោះត្រង់ នេះជាកិច្ចការដែលមិនងាយធ្វើបាន តែយើងជាក្រុមដែលមានសក្តានុពលមួយ »។
ស្មារតីរបស់រុស្ស៊ីបានស្ទុះងើបឡើងក្រោយពីក្រុមអត្តពលិករបស់គេទទួលបានលទ្ធផលល្អក្នុងព្រឹត្តិការណ៍អូឡាំពិករដូវក្តៅក្រុងឡុងឆ្នាំ ២០១២។ បន្ទាប់ពីបញ្ចប់ការប្រកួតដែលមានរយៈពេល១៦ថ្ងៃ ក្រុមនេះដណ្តើមបានមេដាយសរុបដល់ទៅ៨២គ្រឿង ក្នុងនោះមាស២៤គ្រឿង ប្រាក់២៥និងសំរឹទ្ធិ ៣៣គ្រឿង ស្ថិតនៅលំដាប់ទី៤លើតារាងមេដាយ ។
លោកប្រធានាធិបតីពូទីនបានថ្លែងថា រុស្ស៊ីគួរតែមានមោទនភាពចំពោះលទ្ធផលអូឡាំពិកថ្មីៗរបស់ខ្លួននេះ ។ ថ្លែងក្នុងឱកាសប្រគល់រង្វាន់ពិសេសដល់អត្តពលិកមានស្នាដៃនៅវិមានក្រឹមឡាំង លោកបានបញ្ជាក់ថា ៖«យើងទទួលបានមេដាយមាសច្រើនជាងកាលពីឆ្នាំ២០០៨ដល់ទៅ១០គ្រឿង ។ នេះជាជោគជ័យដែលមិននឹកស្មានដល់»។
បើទោះជាយ៉ាងនេះក្តី លោកពូទីននៅប្រាថ្នាចង់ឱ្យរុស្ស៊ីឈានដល់កម្រិតកំពូលក្នុងវិស័យកីឡាដូចក្នុងសម័យសហភាពសូវៀត ។
លោក Alexander Zhukovបានបន្ថែមថា អត្តពលិកវ័យក្មេងរបស់រុស្ស៊ីមានសមត្ថភាពល្អលើសគូប្រកួតដែលពួកគេជួបជាពិសេសក្នុងព្រឹត្តិការណ៍អូឡាំពិកដែលទើបបញ្ចប់ទៅថ្មីៗនេះ ។ លោកកត់សម្គាល់ថា ៖«ឥឡូវនេះជំនាន់ថ្មីកំពុងតែលូតលាស់ហើយ» ៕
ចែករំលែកព័តមាននេះ