ខេត្តកំពង់ចាម ៖ ក្រុមក្មេងទំនើង២ក្រុមទាស់គ្នាបង្កហិង្សាដោយចេតនានៅកន្លែងរាំធុងបាស់ក្នុងពិធីសែនព្រេនកូនកំលោះក្រមុំ១គូ ស្ថិតក្នុងភូមិស្វាយពេក ឃុំមៀន ស្រុកអូររាំងឪ កាលពីវេលាម៉ោង៧និង៣០នាទីយប់ថ្ងៃទី១៥ សីហា ២០១២ បណ្តាលឱ្យយុវជនម្នាក់ឈ្មោះហឿន ជំនោរ អាយុ២១ឆ្នាំ រស់នៅភូមិមេឡូ ឃុំមៀន រងរបួសធ្ងន់ធ្ងរ ក្រោយមកបានស្លាប់ពេលបញ្ជូនទៅសង្គ្រោះនៅមន្ទីរបង្អែកស្រុកអូររាំងឪ ។
លោកញ៉ែម សុខុម អធិការនគរបាលស្រុកអូររាំងឪ ប្រាប់ឱ្យដឹងថា នៅថ្ងៃខាងលើក្នុងភូមិមានរៀបចំពិធីសែនព្រេន គូស្វាមីវ័យចំណាស់១គូ តាមប្រពៃណីខ្មែរ ហើយពេលយប់មានដាក់ធុងបាស់រាំលេងកម្សាន្ត ដោយមានអ្នកភូមិផងរបងជាមួយចូលរាំលេងយ៉ាងសប្បាយផងដែរ ។
លោកអធិការនគរបាលស្រុកអូររាំងឪ ប្រាប់បន្តថា ខណៈពេលកំពុងតែរាំងលេងនោះ ស្រាប់តែមានក្រុមក្មេងទំនើង២ក្រុមឈ្លោះប្រកែកគ្នាទៅវិញទៅមក រហូតឈានទៅប្រើហិង្សាយកអាវុធចុងស្រួចចាក់ចំពោះយុវជនម្នាក់ឈ្មោះជំនោរ រងរបួសធ្ងន់ហើយបានស្លាប់តែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ