រាជធានីភ្នំពេញ ៖ តាមប្រភពព័ត៌មានពី មន្ត្រីប៉ូលិសស្នងការដ្ឋានរាជធានី បានឱ្យដឹងថា មេខ្លោងផលិត-ជួញដូរគ្រឿងញៀនឈ្មោះហុង អេនឌី និងបក្សពួក២នាក់ ដែលទើបចាប់ខ្លួនបានល្បីកក្រើករាជធានីភ្នំពេញ នាពេលថ្មីៗនេះ នឹងត្រូវបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់នាវេលាព្រឹកថ្ងៃទី៤ មីនា ២០១១ នេះ ។ ទីតាំងផលិតគ្រឿងញៀនដ៏ធំមួយកន្លែងដែលពួកគេប្រព្រឹត្តនោះស្ថិតនៅដីឡូត៍ គ្មានលេខក្នុងភូមិសាស្រ្តភូមិស្វាយតាអុក សង្កាត់វាលស្បូវ ខណ្ឌមានជ័យ ត្រូវបានឡោមព័ទ្ធកាលពីវេលាម៉ោង១១និង៣០នាទីយប់ថ្ងៃទី២៨ កុម្ភៈ ។
ជន៣នាក់ដែលត្រូវបានឃាត់ខ្លួនឈ្មោះហុង អេនឌី ភេទប្រុស អាយុ៥១ឆ្នាំ ២-ឈ្មោះណៃ ស្រីនី ភេទស្រី អាយុ១៩ឆ្នាំ និង៣-ឈ្មោះណៃ វ៉ាន់ណែត ភេទប្រុស អាយុ១៦ឆ្នាំ ។ ជនទាំង៣នាក់នេះមានឈ្មោះហុង អេនឌី ជាមេខ្លោងផលិត និងជាម្ចាស់ទីតាំងផលិតថ្នាំញៀនចំតួ តែម្តង ។ ក្នុងការរុករកវត្ថុតាង និងឧបករណ៍ផលិតថ្នាំញៀនខាងលើនេះ សមត្ថកិច្ចចម្រុះបានដកហូតរថយន្ត២គ្រឿង ម៉ាកទួរីស១២កៅអី ១គ្រឿង ម៉ាកមែរសឺដែស១គ្រឿង ។ លើសពីនេះទៅទៀត ដកហូតបានឧបករណ៍ផលិតថ្នាំញៀនមួយកំប្ល៉េ ។ ដោយឡែក សារធាតុផ្សំដែលសមត្ថកិច្ចដកហូតបានមាន Pseudo ethed Zine 210ក្រាម Hydro Chloricacid ៥០កេស ស្មើនឹង១.១០០ដប Sodium Chloride ៥កេសស្មើ៦២ដប Sulfuri acide ១៥២កេស ស្មើ១៥២០ដប អាវុធខ្លីម៉ាកប្រាហា១ដើម បង់១មាន៣គ្រាប់ ។ ម៉ូតូម៉ាកអាយខនមួយគ្រឿង ម្សៅខ្មៅលាយរួចមួយធុង ព្រមទាំងសំភារៈប្រើប្រាស់មួយចំនួនធំទៀត។
លោកឧត្តមសេនីយ៍ត្រីបែន រ័ត្ន ស្នងការរងនគរបាលរាជធានីភ្នំពេញ បានមានប្រសាសន៍ដល់ក្រុមអ្នកកាសែតខណៈពេលចុះប្រតិបត្តិការឆែកឆេរទីតាំងផលិតថ្នាំញៀនខាងលើនេះនាព្រឹកថ្ងៃទី១ មីនា ថា សមត្ថកិច្ចជំនាញបានសហការគ្នាជាសម្ងាត់តាមដានទីតាំងខាងលើនេះ អស់រយៈពេល៤ថ្ងៃកន្លងមកហើយ មុនឈានដល់ការចាប់មេខ្លោងឈ្មោះហុង អេនឌី នេះបានជាក់ស្តែងនៅក្នុងទីតាំងផលិត ។ លោកបែន រ័ត្ន បានបន្តថា ព័ត៌មានដែលសមត្ថកិច្ចឈានទៅដល់ការបង្ក្រាបទីតាំងខាងលើនេះគឺដោយមានបណ្តាញព័ត៌មានពិសេសផ្តល់ដល់សមត្ថកិច្ចអំពីការប្រទះឃើញទិដ្ឋភាពប្លែកគួរឱ្យសង្ស័យនៅក្នុងដីឡូត៍ខាងលើ ដូចជាមានរថយន្តទំនើបៗចេញចូលតែវេលារំលងអធ្រាត្រ ។ ជាងនេះ ទៅទៀត គឺការបង្ហូរកាកសំណល់ចេញមកក្រៅបានជះក្លឹនស្អុយ ហើយការបង្ហូរកាកសំណល់នេះបានធ្វើឱ្យប៉ះពាល់ដល់លំនៅដ្ឋានដាំដុះរបស់ប្រជាពលរដ្ឋជិតខាងទៀតផង ។
ចំពោះការបង្ក្រាបបានទីតាំងផលិតថ្នាំញៀននៅចំណុចខាងលើនេះគឺមានទ្រង់ទ្រាយធំមួយនៅក្នុងរាជធានីភ្នំពេញ ហើយក៏ជាការកាត់ផ្តាច់បំពង់កអ្នកជួញដូរថ្នាំញៀនផងដែរ ។ បច្ចុប្បន្នទាំងវត្ថុតាងនិងមនុស្ស៣នាក់ដែលឃាត់ខ្លួននិងឧបករណ៍ដកហូតបាននាំយកមកកាន់ការិយាល័យជំនាញដើម្បីចាត់ការតាមច្បាប់ ហើយព្រឹកថ្ងៃទី៤ មីនា ២០១១ នេះ នឹងត្រូវបញ្ជូនទៅតុលាការចាត់ការតាមច្បាប់ហើយ ។ ចំពោះទីតាំងត្រូវបានតុលាការចេញដីកាបិទចោលមួយរយៈសិន ៕
ចែករំលែកព័តមាននេះ