រាជធានីភ្នំពេញ ៖ កាលពីព្រឹកថ្ងៃទី១៦ សីហា ម្សិលមិញ កីឡាករវ័យក្មេង ដែលល្បីល្បាញខាងវាយកូនបាល់ ឡុង សំនៀង បានចាកចេញពីប្រទេសកម្ពុជាហើយតាមរថយន្ត ទៅប្រកួតនៅប្រទេសវៀតណាម ក្នុងគម្រោងដណ្ដើមយកពានយុវជនអាយុក្រោម១៨ឆ្នាំ ។ ដំណើរចាកចេញនេះ ថ្វីដ្បិតមានតែលោកម្នាក់ និងគ្រូបង្វឹកម្នាក់ តែឡុង សំនៀង អះអាងថា ខ្លួននឹងមានសង្ឃឹមច្រើនក្នុងការដណ្ដើមយកស្នាដៃមួយជូនប្រទេសកំណើតវិញ ។
ចាប់តាំងពីថ្ងៃ១៣ សីហា កន្លងមកបណ្ដាប្រទេសនៅលើពិភពលោក ដែលមានកីឡាករជើងខ្លាំងក្រោមអាយុ១៨ឆ្នាំ បានបញ្ជូនកីឡាករវាយកូនបាល់ទៅកាន់ប្រទេសវៀតណាម ជាបណ្ដើរៗហើយដើម្បីធ្វើការប្រកួតគ្នាដណ្ដើមពានរង្វាន់ Junior Future ប្រចាំឆ្នាំ២០១២ នៅទីក្រុង An Cuu ប្រទេសវៀតណាម ។ នេះជាការប្រកួតធំមួយដែលធ្វើឡើងសម្រាប់តែវិញ្ញាសាវាយកូនបាល់យុវជនអាយុក្រោម១៨ឆ្នាំប៉ុណ្ណោះ ទើបម្ចាស់មេដាយសំរឹទ្ធិនៅស៊ីហ្គេម ឥណ្ឌូណេស៊ី ឆ្នាំ២០១១ លោកឡុង សំនៀង បានក្លាយជាបេក្ខភាពតែម្នាក់គត់សម្រាប់តំណាងឲ្យជាតិ ក្នុងគម្រោងចេញទៅប្រកួតនេះ ។
លោកជា ពៅ គ្រូបង្វឹក និងជាអ្នកដឹកនាំកីឡាករឡុង សំនៀង ចេញទៅប្រកួតបានប្រាប់នៅមុនថ្ងៃចេញដំណើរថា ការប្រកួតនេះគេធ្វើឡើងជារៀងរាល់ឆ្នាំ ដោយឆ្នាំខ្លះគេធ្វើនៅអឺរ៉ុប និងឆ្នាំខ្លះគេធ្វើនៅតាមបណ្ដាប្រទេសផ្សេងទៀត ។ ទោះយ៉ាងណា ខាងសហព័ន្ធរបស់លោកមានលទ្ធភាពដឹកនាំកីឡាករជើងខ្លាំងតែម្នាក់ ឬពីរនាក់ប៉ុណ្ណោះឲ្យចេញទៅប្រកួតនៅពេលព្រឹត្តិការណ៍នេះប្រារព្ធធ្វើឡើងនៅក្នុងបណ្ដាប្រទេសជិតៗ ដូចជាវៀតណាមនាឆ្នាំនេះ។ ការប្រកួតកីឡាវាយកូនបាល់នេះភាគីវៀតណាមអត់មានកំណត់ឲ្យកម្ពុជាបញ្ជូនតែកីឡាករម្នាក់បែបនេះ ឲ្យចេញប្រកួតនោះទេ ពោលគឺប៉ុន្មាននាក់ក៏បានដែរឲ្យតែជាកីឡាករវ័យក្រោម១៨ឆ្នាំ ហើយស្ថិតក្នុងវិញ្ញាសាវាយកូនបាល់តែមួយមុខ ។
ប៉ុន្តែមកពីកម្ពុជាខ្វះធនធានកីឡាករជើងខ្លាំងអាយុក្រោម១៨ឆ្នាំ និងម្យ៉ាងមិនមានថវិកាបញ្ជូនកីឡាករបានច្រើននាក់ផង ទើបសម្រេចបញ្ជូនតែកីឡាករឡុង សំនៀង ឲ្យចេញប្រកួតសម្រាប់ឆ្នាំនេះ ។ លោក និងកូនសិស្សបានចាកចេញពីប្រទេសកម្ពុជា តាមរថយន្តតាំងពីព្រឹកថ្ងៃទី១៦ សីហា ម្សិលមិញម៉្លេះដោយធ្វើដំណើរឆ្លងកាត់ទីក្រុងហូជីមិញឆ្ពោះទៅកាន់ទីក្រុង An Cuu ដែលជាទីតាំងប្រារព្ធពិធី ។ ការប្រកួតនេះ លោកមិនទាន់ច្បាស់ថានឹងមានការចូលរួមប៉ុន្មានប្រទេសនៅឡើយទេ ប៉ុន្តែយោងតាមព្រឹត្តិការណ៍នេះបានធ្វើឡើងមុនៗ គឺមានសឹងតែគ្រប់ប្រទេសហ្នឹង ពិសេសប្រទេសដែលមានបំណងបញ្ជូនកីឡាករអាយុក្រោម១៨ឆ្នាំរបស់ខ្លួនឲ្យមកប្រកួត ។
ព្រឹត្តិការណ៍ប្រកួតនេះមានរយៈពេល៧ថ្ងៃ ប៉ុន្តែបើកម្ពុជាស៊យត្រូវធ្លាក់មុនប្រកួតចប់នោះនឹងត្រូវវិលត្រឡប់មុនកាលកំណត់ក៏ថាបាន ។ ផ្ទុយទៅវិញ បើការប្រកួតរបស់ឡុង សំនៀង បែរជាមានលទ្ធផលឈ្នះៗរហូតនោះគឺរហូតដល់ថ្ងៃ២៣ សីហា ដែលជាថ្ងៃចែកមេដាយឯណោះ ទើបពួកលោកអាចវិលវិញ ។ លោកជា ពៅ ឲ្យដឹងថា ទោះជាលទ្ធផលបែបណា ក៏កីឡាករឡុង សំនៀង នឹងក្លាយជាបេក្ខភាពតែម្នាក់គត់ ដែលខាងសហព័ន្ធបានជ្រើសឲ្យចេញប្រកួតក្នុងព្រឹត្តិការណ៍វាយកូនបាល់មួយផ្សេងទៀត ដែលធ្វើឡើងនៅក្នុងប្រទេសវៀតណាមដូចគ្នាចាប់ពីថ្ងៃទី២៦ សីហា រហូតដល់ថ្ងៃទី៩ កញ្ញា សម្រាប់តែយុវជនអាស៊ាន វ័យក្រោម១៨ឆ្នាំ ។ ម៉្លោះហើយទើបលោកមិនទាន់ច្បាស់ថា តើត្រូវវិលមកកាន់កម្ពុជាមួយសាសិន ឬបន្តចេញទៅប្រកួតនៅទីក្រុង Mind Doung តែម្ដង ក្រោយបញ្ចប់ការប្រកួតនៅទីក្រុង An Cuu នោះ ។
ដោយឡែក កីឡាករឡុង សំនៀង ដែលអះអាងថា ទើបតែមានវ័យ១៦ឆ្នាំ បានប្រាប់កោះសន្តិភាពនៅមុនថ្ងៃចេញដំណើរថា ការប្រកួតនៅប្រទេសវៀតណាមលើកនេះ លោកហាក់មានសង្ឃឹមច្រើន ដោយសារមុនពេលចាកចេញលោកបានហ្វឹកហាត់ច្រើន ដែលអាចទុកចិត្តបានពីសមត្ថភាពរបស់ខ្លួន ។ គាប់ជួនជាការប្រកួតនេះ តម្រូវសម្រាប់តែកីឡាករក្មេងៗអាយុក្រោម១៨ឆ្នាំផង ទើបលោកគិតថា វាមិនមែនជារឿងតឹងតែងដូចកាលលោកចេញប្រកួតស៊ីហ្គេម និងក្នុងព្រឹត្តិការណ៍ប្រកួតវាយកូនបាល់ជាអន្តរជាតិផ្សេងទៀតនោះឡើយ ។ កីឡាករជម្រើសជាតិដែលទទួលបានមេដាយមាសស្ទើរតែរាល់ឆ្នាំនៅក្នុងស្រុកតាំងពីឆ្នាំ២០០៩រូបនេះ បញ្ជាក់ថា លោកនឹងពុះពារពាំនាំយកលទ្ធផលជាវិជ្ជមានមួយមកកាន់កម្ពុជាវិញ បើទោះជាការរំពឹងនោះ វាមិនអាចធ្វើឲ្យលោកឈានដល់ដណ្ដើមបានមេដាយមាស ពីព្រឹត្តិការណ៍ប្រកួតដ៏ធំទាំងពីរនេះយ៉ាងណាក្ដី ៕
ចែករំលែកព័តមាននេះ