ខេត្តកំពង់ស្ពឺ ៖ ស្ត្រីមានផ្ទៃពោះ៦ខែម្នាក់បានដួលបែកក្បាល និងរលាត់ចង្កេះ ខណៈពេលប្តីឌុបត្រឡប់មកពីពិនិត្យផ្ទៃពោះវិញបានបុកម៉ូតូមួយគ្រឿងទៀតដែលបត់ចូលក្នុងបន្ទាយទាហានដោយអត់ស៊ីញ៉ូបណ្តាលឱ្យដួល កាលពីវេលាម៉ោង៤និង២០នាទីរសៀលថ្ងៃទី១៥ សីហា លើកំណាត់ផ្លូវជាតិលេខ៤ មុខបន្ទាយទាហាន ឃុំត្រែងត្រយឹង ស្រុកភ្នំស្រួច ។ ស្ត្រីរងគ្រោះឈ្មោះ ឆាំ ស្រីលក្ខណ៍ អាយុ២៥ឆ្នាំ និងប្តីឈ្មោះ រី សារិទ្ធិ អាយុ២៦ឆ្នាំ ជាកសិករ ស្នាក់នៅតំបន់អភិវឌ្ឍន៍សម្តេចតេជោយោធិនពិការកោះស្លា៣១៧ ផ្ទះលេខ១៥៦ជួរខ្សែទី១ ស្រុកឈូក ខេត្តកំពត ។
តាមសម្តីឈ្មោះ រី សារិទ្ធិ ជាប្តីបានឱ្យដឹងថា មុនពេលកើតហេតុរូបគេបានជិះម៉ូតូស្មាសស៊េរី២០០៨ ពណ៌ខ្មៅ ឌុបប្រពន្ធទៅពិនិត្យផ្ទៃពោះនៅមណ្ឌលសុខភាពខេត្តកំពង់ស្ពឺ បន្ទាប់ពីពិនិត្យហើយគ្រូពេទ្យបានឱ្យថ្នាំយកទៅទុកលេបរួចក៏ឌុបប្រពន្ធត្រឡប់មកផ្ទះវិញ ។ ពេលកំពុងជិះម៉ូតូស្រាប់តែមានម៉ូតូនាយទាហានម្នាក់បើកខាងមុខបត់ឆ្វេងចូលក្នុងបន្ទាយដោយមិនបានស៊ីញ៉ូទេ ធ្វើឱ្យម៉ូតូរបស់គេជាន់ហ្វ្រាំងមិនទាន់ក៏ជ្រុលទៅបុកម៉ូតូនោះបណ្តាលឱ្យដួលបែកក្បាលប្រពន្ធ និងរលាត់ចង្កេះ ឯគាត់ជាប្តីមិនមានរងរបួសទេ រីឯនាយទាហាននោះបានលើកម៉ូតូជិះចូលទៅក្នុងបន្ទាយទាហានបាត់ បន្ទាប់មកទើបមាននាយទាហានដទៃទៀតមកប្រាប់ថា ចាំគេចាប់អ្នកបើកម៉ូតូបង្កនោះឱ្យទទួលខុសត្រូវ ។
ប្រភពបន្តថា ដោយសារតែភិតភ័យប្រពន្ធមានរបួសមិនបានគិតពីរឿងចាប់អ្នកបង្កទេ ក៏បញ្ជូនប្រពន្ធទៅមន្ទីរពេទ្យខេត្តកំពង់ស្ពឺរួចបញ្ជូនបន្តទៅព្យាបាលនៅមន្ទីរពេទ្យព្រះកុសុមៈរាជធានីភ្នំពេញ ។ ពេលមកដល់មន្ទីរពេទ្យបានថតអេកូពិនិត្យមើលផ្ទៃពោះបានដឹងថា មិនមានប៉ះពាល់ដល់ទារកក្នុងផ្ទៃទេ តែត្រូវថតស្គែនមើលក្បាលដែលបែកនោះទៀត ប៉ុន្តែបុរសជាប្តីមិនមានលុយទេ សូមជំពាក់មន្ទីរពេទ្យសិនរង់ចាំបងប្អូនយកប្រាក់មកតាមក្រោយទើបសង តែមិនមានគ្រូពេទ្យណាហានចេញមុខធានាទេ ដោយសារម៉ាស៊ីនស្គែននោះមិនមែនជារបស់មន្ទីេពទ្យគឺជារបស់ក្រុមហ៊ុន ។ ដោយសារគ្មានលុយសម្រាប់ព្យាបាលរបួសឱ្យប្រពន្ធ បុរសជាប្តីនៅអង្គុយទាំងមិនអស់ចិត្ត ចេះតែនិយាយថា គ្រូពេទ្យមិនជួយព្យាបាលប្រពន្ធរបស់គាត់ ។
គ្រូពេទ្យបានប្រាប់ថា ការចាក់ថ្នាំ និងមើលមុខរបួសខាងក្រៅជួយព្យាបាលរួចរាល់ហើយ ចំណែកពាក់ព័ន្ធនឹងការស្គែនខួរក្បាលមន្ទីរពេទ្យមិនអាចជួយបានទេពីព្រោះម៉ាស៊ីនស្គែននោះជារបស់ក្រុមហ៊ុនមិនអាចជំពាក់បានឡើយ ហើយក៏មិនពាក់ព័ន្ធជាមួយមន្ទីរពេទ្យដែរ៕
ចែករំលែកព័តមាននេះ