រាជធានីភ្នំពេញ ៖ រថយន្តកាមរីបាឡែន ពណ៌ខ្មៅ មួយគ្រឿង បានរងការខូចខាតធ្ងន់ធ្ងរគឺខ្ទេចដំបូលដោយសារគ្រឿងចក្រមួយទម្ងន់រាប់តោនបានរអិលធ្លាក់ពីរថយន្តស្ទូចមកសង្កត់ពីលើ កាលពីវេលាម៉ោង១០ព្រឹកថ្ងៃទី១៥ សីហា នៅមុខយានដ្ឋានមួយកន្លែងតាមផ្លូវលេខ៥៩៨ ក្នុងភូមិទួលគោក សង្កាត់ទួលសង្កែ ខណ្ឌឫស្សីកែវ ។ ទោះបីជាយ៉ាងណា ពុំបង្កឱ្យមនុស្សដែលជិះក្នុងរថយន្តរងរបួសឡើយ ។ បន្ទាប់ពីមានហេតុការណ៍នេះកើតឡើង ម្ចាស់គ្រឿងចក្របានស្ទូចគ្រឿងចក្រចេញពីរថយន្តហើយដោះស្រាយសងការខូចខាត ជាមួយម្ចាស់រថយន្តកាមរីបាឡែន ។
តាមសម្តីបុរសឈ្មោះ វ៉ាន នី អាយុ៤៣ឆ្នាំ ជាអ្នកបើកបររថយន្តស្ទូចមានលំនៅស្រុកកៀនស្វាយ ខេត្តកណ្តាលបានឱ្យដឹងថា មុនពេលកើតហេតុ ខ្លួនបានដឹកគ្រឿងចក្រមួយគ្រឿង មកពីតំបន់ស្រែពក ខេត្តរតនគិរី ក្នុងគោលបំណងយកទៅដាក់នៅយានដ្ឋានមួយកន្លែង ។ នៅពេលបើកមកដល់មុខយានដ្ឋានស្រាប់តែរថយន្តដឹកគ្រឿងចក្រផ្អៀងបណ្តាលឱ្យគ្រឿងចក្រនោះរអិលធ្លាក់ទៅខាងឆ្វេងដៃសង្កត់លើដំបូលរថយន្តកាមរីបាឡែនដែលកំពុងបើកបរក្បែរគ្នា បណ្តាលឱ្យរងការខូចខាតស្រុញដំបូលតែម្តង ។ បន្ទាប់ពីមានគ្រោះថ្នាក់ម្ចាស់យានយន្តបាននាំគ្នាស្ទូចគ្រឿងចក្រចេញរួចដោះស្រាយសងការខូចខាតទៅខាងរថយន្តបាឡែនតែពុំដឹងថា សងប៉ុន្មានឡើយ ។
នេះជាមេរៀនមួយ ចំពោះយានយន្តគ្រប់ប្រភេទដែលផ្ទុកសម្ភារធ្ងន់ៗ គប្បីត្រូវមានការប្រុងប្រយ័ត្នខ្ពស់ពេលធ្វើចរាចរណ៍ ព្រោះបើយើងធ្វេសប្រហែសតែបន្តិចបញ្ហានឹងកើតមានភ្លាម ។ ជាក់ស្តែងដូចករណីខាងលើដែលចាត់ថា ជាការធ្វេសប្រហែសមួយក្នុងការផ្ទុកគ្រឿងចក្រដែលមានទម្ងន់រាប់តោនរអិលធ្លាក់មកដែលករណីនេះកម្រនឹងកើតមានណាស់។ សំណាងដែរ គ្រឿងចក្រនោះរអិលធ្លាក់មកត្រូវរថយន្តមិនបណ្តាលឱ្យមនុស្សស្លាប់ តែបើធ្លាក់មកចំហ្វូងមនុស្សវិញ ច្បាស់ជាមានអ្នកសោកសង្រេងមិនតិចទេ ។ ចំណែកអ្នកបង្កក៏ត្រូវមានទោសផងដែរ ៕
ចែករំលែកព័តមាននេះ