រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍អំពាវនាវ ដល់និស្សិត និងប្រជាពលរដ្ឋនៅទូទាំងប្រទេសសូមអញ្ជើញទៅចុះឈ្មោះបោះឆ្នោតតាមកាលបរិច្ឆេទកំណត់របស់គណៈកម្មាធិការជាតិរៀបចំការបោះឆ្នោត ដែលនឹងចាប់ផ្តើមពីថ្ងៃទី១ កញ្ញា រហូតដល់ថ្ងៃទី១០ តុលា ឆ្នាំ២០១២ ។
សម្តេចអគ្គមហាសេនាបតីតេជោ ហ៊ុន សែន បានអំពាវនាវបែបនេះ នាព្រឹកថ្ងៃទី១៥ សីហា នៅមជ្ឈមណ្ឌលសន្និបាត និងពិព័រណ៍កោះពេជ្រក្នុងឱកាសអញ្ជើញជាអធិតីភាពដ៏ខ្ពង់ខ្ពស់ក្នុងពិធីប្រគល់ញ្ញាបត្រដល់និស្សិតជ័យលាភី ថ្នាក់បរិញ្ញាបត្ររង ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត នៃសាកលវិទ្យាល័យបៀលប្រាយចំនួន ៥.៥៥៩នាក់ ។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា យុវជន និស្សិតដែលត្រូវដល់អាយុបោះឆ្នោតត្រូវទៅចុះឈ្មោះ ។ សូមអំពាវនាវដល់យុវជន ដែលដល់អាយុបោះឆ្នោត យុវជនដែលមិនទាន់មានឈ្មោះបោះឆ្នោត ទៅចុះឈ្មោះបោះឆ្នោតនៅទីកន្លែងណាដែលខ្លួនរស់នៅ ។ សូមមេត្តាចុះឈ្មោះតែមួយបានហើយ កុំចុះឈ្មោះច្រើនកន្លែងផ្ទួនគ្នា ដែលធ្វើឱ្យបញ្ជីឈ្មោះបោះឆ្នោតមានការលំបាកក្នុងរឿង ឈ្មោះ ។ បើយើងទៅចុះឈ្មោះនៅកន្លែងថ្មី យើងត្រូវលុបឈ្មោះនៅកន្លែងចាស់ ហើយសូមទៅផ្ទៀងផ្ទាត់មើលឈ្មោះរបស់ខ្លួនផងដែរ ដើម្បីយើងសំអាង និងជួយសម្រួលដល់ការបោះឆ្នោត ។ សូមកុំបន្ទោសគណៈកម្មាធិការជាតិរៀបចំការបោះឆ្នោត(គ.ជ.ប) ព្រោះមនុស្សរាប់លាននាក់ ហើយយើងតែម្នាក់ឯង គ្រាន់តែទៅផ្ទៀងឈ្មោះមិនព្រមទៅ បែរជាបន្ទោស គ.ជ.ប ដែលត្រូវទទួលបន្ទុកខុសត្រូវមនុស្សរាប់លាននាក់ ។
សូមប្រយ័ត្នឈ្មោះក្នុងអត្តសញ្ញាណប័ណ្ណ និងឈ្មោះ នៅក្នុងបញ្ជី គ.ជ.ប ហើយសំឡេងសូរសៀងដូចគ្នា តែសរសេរខុសគ្នា ក៏មានការពិបាកផងដែរ ។ ឧទាហរណ៍ ដូចជា ឈ្មោះ សំណាង ក្នុងអត្តសញ្ញាណប័ណ្ណសរសេរ សំណាង ប៉ុន្តែស្រាប់ តែបញ្ជីរបស់គ.ជ.ប ចេញសំនៀងសូររបស់លោកកេង វា៉ាន់ សាក់ សរសេរទៅជា(សំនាង) ទៅ វិញ ។ ដូច្នេះហើយនៅពេលចូលទៅបោះឆ្នោតមានការពិបាកហើយ។ ទោះបីមានឈ្មោះហើយក៏ដោយគឺយើងត្រូវទៅផ្ទៀងមើលរវាងអត្តសញ្ញាណប័ណ្ណរបស់ខ្លួនជាមួយឈ្មោះនៅក្នុងបញ្ជី ។
សម្តេចតេជោនាយករដ្ឋមន្ត្រីមានប្រសាសន៍ថា ទង្វើបែបនេះ គឺជាការចូលរួមនៃដំណើរការប្រជាធិបតេយ្យនៅកម្ពុជា តាមរយៈការចុះឈ្មោះបោះឆ្នោត ការផ្ទៀងផ្ទាត់ ដោយត្រឹមត្រូវរវាងអត្តសញ្ញាណប័ណ្ណជាមួយឈ្មោះនៅក្នុងបញ្ជីបោះឆ្នោតនិងឈ្មោះមានតែមួយ ដើម្បីចៀសវាងកុំឱ្យមនុស្សម្នាក់មានឈ្មោះរហូតដល់ទៅពីរកន្លែង ឬបីកន្លែងដោយមិនបានលុបឈ្មោះចោល ដែលធ្វើឱ្យការបោះឆ្នោតមានផលលំបាក ។ ដូច្នេះ សូមអំពាវនាវឱ្យមានការចូលរួមពីប្រជាពលរដ្ឋ ជាពិសេសក្មួយៗជាយុវជនដែលត្រូវដល់អាយុចុះឈ្មោះបោះឆ្នោតហើយ អ្នកដែលមានឈ្មោះហើយទៅផ្ទៀងផ្ទាត់ដើម្បីធានាភាពទៀងទាត់របស់យើងនៃការបោះឆ្នោតដែលនឹងប្រព្រឹត្តទៅនៅថ្ងៃទី២៨ កក្កដា ឆ្នាំ២០១៣ ខាងមុខនេះ ។
ទាក់ទិននឹងនិស្សិតស្ម័គ្រចិត្តចុះវាស់វែងដីធ្លី ជូនប្រជាពលរដ្ឋ សម្តេចតេជោនាយករដ្ឋមន្ត្រីមានប្រសាសន៍ថា នៅពេលចុះឈ្មោះបោះឆ្នោតគួរតែត្រូវបន្ថែមមួយថ្ងៃទៀត ក្នុងការចុះឈ្មោះ និងមានឱកាសផ្ទៀងផ្ទាត់ឈ្មោះ ។ និស្សិតទាំងនោះគួរតែត្រូវបានផ្ទេរឈ្មោះមកកាន់ទីក្រុងភ្នំពេញតែម្តងទៅ ដើម្បីកុំឱ្យមានការលំបាកពេលបោះឆ្នោត ប៉ុន្តែត្រូវលុបឈ្មោះតាមខេត្ត ទាំងព្រះសង្ឃក៏ចុះឈ្មោះដែរ ព្រោះគេអត់បានហាមឃាត់ព្រះសង្ឃមិនឱ្យបោះឆ្នោតឯណា ។
សម្តេចតេជោ នាយករដ្ឋមន្ត្រីក៏បានអំពាវនាវផងដែរ ចំពោះប្រជាពលរដ្ឋថា នៅក្នុងដំណាក់កាលនៃការរាំងស្ងួតនៅតំបន់មួយចំនួននេះ កុំអាលអស់សង្ឃឹមជាមួយនឹងការខ្វះទឹក ។ឆ្នាំនេះគឺបាតុភូតធម្មជាតិចម្លែកណាស់ មិនថាតែក្នុងប្រទេសយើងទេ សូម្បីតែប្រទេសហ្វ៊ីលីពីនទឹកជំនន់លិច នៅប្រទេសចិន ទីក្រុងប៉េកាំង៦០ឆ្នាំ ហើយមិនដែលមានទឹកជំនន់ទេ ស្រាប់តែមានទឹកជំនន់ ។ ឯកម្ពុជាយើងមានតំបន់មួយចំនួនមានទឹកច្រើន តំបន់មួយចំនួនខ្វះទឹក ។ ក្រសួងធនធានទឹក និងឧតុនិយម និងមន្ទីរធនធានទឹកកំពុងតែប្រឹងប្រែងអន្តរាគមន៍ជាមួយនឹងផ្នែកកសិកម្មទៅលើតំបន់ដែលមានប្រភពទឹក ។ សម្តេចតេជោបានអំពាវនាវដល់អាជ្ញាធរគ្រប់លំដាប់ថ្នាក់ សូមចូលរួមគ្រប់សកម្មភាពដើម្បីបូមទឹកនៅតំបន់ដែលមានប្រភពទឹក ត្រូវយកម៉ាស៊ីនទៅជួយអន្តរាគមន៍ មិនត្រូវឱ្យស្រូវ ឬសំណាបងាប់ ដោយទីកន្លែងដែលមានប្រភពទឹកហើយ យើងមិនបានបូមទឹកជួយនោះទេ ។
តាមការព្យាករណ៍នៅឆ្នាំនេះ ចិនលើកខែកម្ពុជាក៏លើកខែដែរ ដូច្នេះរដូវវស្សាឆ្នាំនេះ អាចអូសបន្លាយរហូតដល់ចុងឆ្នាំគឺខែធ្នូឯណោះ ឯព្យុះដែលឆ្លងកាត់កម្ពុជាយើងមានព្យុះបី ដែលអាចមានឥទ្ធិពលមកកម្ពុជាបែរជាទាញទៅភាគខាងជើងទៅវិញ ។ ប៉ុន្តែកម្ពុជាយើងនៅប៉ះព្យុះប្រមាណជាង២០ទៀត ដែលព្យុះទាំងនោះនឹងមានឥទ្ធិពលមកដល់កម្ពុជា ។ ដូច្នេះឱកាសនៅមានពេលវែង ទោះបីជាយ៉ាងណា ក៏យើងអាចបង្កើតសំណាបថ្មីបាន ។ ប៉ុន្តែយើងមិនចង់ឱ្យមានការរងគ្រោះនៅតំបន់ដែលមានប្រភពទឹក បែរជាមិនបានដាក់ម៉ាស៊ីនបូមទឹកទៅអន្តរាគមន៍ដើម្បីសង្គ្រោះសំណាប និងសន្ទូងរបស់ប្រជាពលរដ្ឋ ។
ការចូលព្រះវស្សាបានមកដល់ហើយ សម្តេចតេជោ មានប្រសាសន៍សូមឱ្យប្រព័ន្ធផ្សព្វផ្សាយចាក់ផ្សាយទំនួញប្រេតពេលភ្ជុំ ដើម្បីរំលឹកដាស់តឿនកូនចៅឱ្យប្រឹងធ្វើបុណ្យ ។ ពិតមែនតែអ្នកស្មូតបានធ្វើមរណកាលទៅហើយ តែសំឡេងរបស់គាត់ដាស់តឿនពីឥឡូវ…៕
ចែករំលែកព័តមាននេះ