អាជ្ញាធរនិងម៉ាស៊ីនឃោសនាជប៉ុនរាយការណ៍ថា សកម្មជនស្និទ្ធចិន១៤នាក់បានត្រូវប៉ូលិសជប៉ុនចាប់ខ្លួនកាលពីថ្ងៃទី១៥ សីហា ក្រោយពីពួកគេចុះទូកមកលើកោះមានជម្លោះមួយរវាងចិននិងជប៉ុននៅសមុទ្រចិនខាងកើត ។អ្នកទទួលខុសត្រូវនៃកងឆ្មាំឆ្នេរសមុទ្រនៅកោះអូគីណាវ៉ា គូសបញ្ជាក់ថា យើងបានចាប់ខ្លួនមនុស្ស៩នាក់ថែមទៀតពីបទចូលក្នុងដែនដីជប៉ុនដោយខុសច្បាប់ ។ មុននេះប៉ូលិសជប៉ុនរាយការណ៍ពីការចាប់ខ្លួនពួកសកម្មជនចិន៥នាក់រួចហើយ ។
យោងតាមទូរទស្សន៍រដ្ឋជប៉ុន NHKថា កងឆ្មាំឆ្នេរសមុទ្រក៏បានចាប់ផងដែរនូវនាវានេសាទមួយគ្រឿងដោតទង់ជាតិចិន ហើយត្រូវបញ្ជូនបណ្តាមនុស្សដែលចាប់ខ្លួនមកកាន់កោះអូគីណាវ៉ា ដើម្បីធ្វើការស៊ើបអង្កេត ។នាយករដ្ឋមន្ត្រីជប៉ុនលោកយ៉ូស៊ីហុីកូ ណូដា ដកស្រង់សំដីដោយទីភ្នាក់ងារព័ត៌មានជប៉ុន JIJI ថ្លែងថាលោកនឹងដោះស្រាយឧប្បត្តិហេតុនេះដោយយោងទៅតាមច្បាប់ ។ ឯកអគ្គរដ្ឋទូតចិន ប្រចាំក្រុងតូក្យូត្រូវបានកោះអញ្ជើញភ្លាមៗដោយក្រសួងការបរទេសជប៉ុនដោយអនុរដ្ឋមន្ត្រីក្រសួងនោះលោកកីនីជីរ៉ូសាសាអឺ បានធ្វើការតវ៉ាយ៉ាងខ្លាំងមួយដំពោះឯកអគ្គរដ្ឋទូតចិនរូបនេះ ។
ចំណែកនៅក្រុងប៉េកាំងវិញ ឯកអគ្គរាជទូតជប៉ុនលោកអ៊ូអុីជីរ៉ូ នីវ៉ា ត្រូវបានអនុរដ្ឋមន្ត្រីការបរទេសចិនមួយរូបកោះអញ្ជើញដោយអះអាងជាថ្មីពីអធិបតេយ្យភាពរបស់ក្រុងប៉េកាំងលើប្រជុំកោះមានជម្លោះនេះ ហើយទាមទារឱ្យដោះលែងជាបន្ទាន់នូវមនុស្សទាំងអស់ដែលជប៉ុនចាប់ខ្លួន ។
ពួកសកម្មជនទាំងនេះដែលជាអ្នកជាតិនិយមមកពីក្រុងហុងកុងនិងម៉ាកាវ ជាសមាជិកគណៈកម្មាធិការសកម្មភាពដើម្បីការពារប្រជុំកោះ DIAOYU បានធ្វើសកម្មភាពនេះកាលពីថ្ងៃទី១៥ សីហា ជាថ្ងៃខួបនៃការសុំចុះចាញ់របស់ជប៉ុនកាលពីឆ្នាំ១៩៤៥ ។ គោលបំណងពួកគេគឺ ប្រឆាំងគម្រោងទស្សនកិច្ចរបស់បណ្តាសមាជិកសភាជប៉ុននៅប្រជុំកោះនោះ ។ ចាកចេញពីក្រុងហុងកុងពួកគេអាចទៅដល់កោះមួយក្នុងប្រជុំកោះនោះហើយក៏ត្រូវជប៉ុនចាប់ខ្លួន ៕
ចែករំលែកព័តមាននេះ