រាជធានីភ្នំពេញ ៖ អាចារ្យ-អាចារិនីខែ្មរចំនួន៣៩៧អង្គ-នាក់បានមកជួបជុំគ្នានៅក្រសួងធម្មការ និងសាសនា ដើម្បីទទួលចំណេះដឹងបន្ថែមក៏ដូចជាការតម្រង់ទិសអាចារ្យទាំងនោះឲ្យឯកភាពគ្នាក្នុងការដឹកនាំប្រជាពលរដ្ឋនៅតាមមូលដ្ឋានឲ្យយល់ដឹងពីតម្លៃវប្បធម៌ដ៏ល្អផូរផង់របស់ខ្មែរយើង កាលពីរសៀលថ្ងៃទី១៥ សីហា ២០១២ នៅក្រសួងធម្មការនិងសាសនា។
លោកមិន ឃិន រដ្ឋមន្ត្រីក្រសួងធម្មការ និងសាសនាមានប្រសាសន៍ថា ការបើកវគ្គបណ្តុះបណ្តាលនេះពិតជាផ្តល់ឱកាសយ៉ាងល្អចំពោះអាចារ្យ-អាចារិនីទាំងអស់បានជួបជុំផ្លាស់ប្តូរយោបល់ពីគ្នាទៅវិញទៅមក និងបានយល់ដឹងពីវិធីសាស្ត្រក្នុងការដឹកនាំការងារមង្គលបុណ្យទាន និងពិធីបុណ្យផ្សេងៗ។ លោកមិន ឃិន ក៏បានកោតសរសើរដល់លោកអាចារ្យ និងអាចារិនីដែលបានលះបង់ពេលវេលាដ៏មមាញឹកក្នុងរដូវវស្សាមកសិក្សានូវចំណេះដឹងបន្ថែម ហើយបានជំរុញឲ្យលោកឧទ្ទេសាចារ្យទាំងអស់ខិតខំពន្យល់ឲ្យបានពិស្តារនូវរាល់មេរៀននីមួយៗ។
លោកឧទ្ទេសាចារ្យ ប៉ុក វណ្ណធីរ មានប្រសាសន៍ថា ក្រសួងធម្មការ និងសាសនាបានបើកវគ្គបណ្តុះបណ្តាលនេះបានចំនួន១០វគ្គ រួចមកហើយសរុបអាចារ្យទាំងអស់ចំនួន៣.០៨៩នាក់។ តាមរយៈការបណ្តុះបណ្តាលចំនួន១០វគ្គរួចមកហើយនោះឃើញថា អាចារ្យទាំងអស់ចេះសាមគ្គីគ្នា ស្រលាញ់គ្នា និងរាប់អានគ្នា និងបានចងក្រងជាសមាគមអាចារ្យខ្មែរផងដែរ។
តាមរយៈការផ្តល់កិច្ចសំភាសន៍លោកតាអាចារ្យនៅវត្តស្អំ ស្ថិតនៅស្រុកពញាក្រែក ខេត្តកំពង់ចាម បានមានចំណាប់អារម្មណ៍ថា រូបគាត់មានសេចក្តីរីករាយណាស់ ដោយបានក្រសួងធម្មការ និងសាសនាបានបើកវគ្គបណ្តុះបណ្តាលនេះឡើង គឺដើម្បីឲ្យអាចារ្យគ្រប់រូបត្រូវយកចិត្តទុកដាក់ដឹកនាំការងារនេះឲ្យបានឯកភាពគ្នាក្នុងការបំពេញតួនាទីរបស់ខ្លួន។
លោកអំ ជាសុផាន អាចារ្យវត្តត្រពាំង ស្ថិតនៅស្រុកពញាក្រែក ខេត្តកំពង់ចាម មានចំណាប់អារម្មណ៍ដោយទឹកមុខរីករាយថា ការបណ្តុះបណ្តាលនេះ គឺស្ថិតនៅក្រោមការបង្ហាត់បង្រៀនពីព្រះឧទ្ទេសាចារ្យ និងឧទេសាចារ្យទាំងអស់ ហើយនៅពេលដែលលោកអំ ជាសុផាន ត្រលប់ទៅកាន់មូលដ្ឋានវិញនោះលោកអំនឹងយកទៅដឹកនាំប្រជាពុទ្ធបរិស័ទលើការងារទាក់ទង និងប្រពៃណីដ៏ល្អផូរផង់របស់បុព្វបុរសយើងឲ្យសមស្របទៅតាមច្បាប់៕
ចែករំលែកព័តមាននេះ