រាជធានីភ្នំពេញ ៖ មេតំហ្វេតាមីនជាង៥គីឡូក្រាមត្រូវគយសហការជាមួយនគរបាលអន្តោប្រវេសន៍ចាប់បាននៅអាកាសយានដ្ឋានសៀមរាបនិងភ្នំពេញកាលពីល្ងាចថ្ងៃទី១៥ សីហា ២០១២ និងឃាត់ខ្លួនស្រ្តីពីរនាក់ម្នាក់ជាជនជាតិវៀតណាមនិងម្នាក់ទៀតជនជាតិថៃដែលពួកគេធ្វើដំណើរពីប្រទេសសឹង្ហបុរី។
នគរបាលក្រសួងមហាផ្ទៃមួយរូបបានឲ្យដឹងថា នៅល្ងាចថ្ងៃទី១៥ សីហា ២០១២ វេលាម៉ោង៥និង២២នាទីការិយាល័យគយនិងរដ្ឋាករអាកាសយានដ្ឋានអន្តរជាតិភ្នំពេញសហការជាមួយនគរបាលអន្តោប្រវេសន៍បានឃាត់ខ្លួនស្រ្តីម្នាក់ឈ្មោះPHANH THI THANH HANG ជនជាតិវៀតណាម អាយុ២០ឆ្នាំ លិខិតឆ្លងដែនលេខបេ៦៨៦៣១៤១ ស្ត្រីនេះធ្វើដំណើរតាមជើងយន្តហោះMI ៦០៨ សឹង្ហបុរី-ភ្នំពេញបន្ទាប់ពីសមត្ថកិច្ចគយបានរកឃើញម្សៅពណ៌សសង្ស័យជាគ្រឿងញៀនដែលលាក់ទុកក្នុងកន្រ្តកជ័រឆ្នៃជារបស់វត្ថុអនុស្សាវរីយ៍ ។
ស្រ្តីជាប់ចោទខាងលើបានសារភាពប្រាប់សមត្ថកិច្ចថារូបគេមិនបានដឹងថាមានគ្រឿងញៀនលាក់ទុកក្នុងកន្រ្តកជ័រនោះទេហើយកន្ត្រកនេះត្រូវបានបងស្រីនាងដែលរស់នៅប្រទេសនីការ៉ាហ្គ័ជូននាងជាកាដូឆ្នាំថ្មី។សមត្ថកិច្ចជំនាញបានបញ្ជាក់ថា ម្សៅពណ៌សដែលសមត្ថកិច្ចដកហូតពីស្រ្តីវៀតណាមខាងលើជាប្រភេទគ្រឿងញៀនមេតំហ្វេតាមីនមានទំងន់១គីឡូ៩១៩,៩ក្រាម។
ដោយឡែកនៅល្ងាចថ្ងៃដដែលក្រោយពីបង្រ្កាបគ្រឿងញៀននៅអាកាសយានដ្ឋានអន្តរជាតិភ្នំពេញបាន១៣នាទីកម្លាំងគយសហការជាមួយនគរបាលអន្តោប្រវេសន៍ប្រចាំអាកាសយានដ្ឋានសៀមរាបបានបង្រ្កាបការជួញដូរគ្រឿងញៀនឆ្លងប្រទេសនិងឃាត់ខ្លួនស្រ្តីជនជាតិថៃម្នាក់ឈ្មោះKOTAMM MISS NAPAPHON អាយុ២៩ឆ្នាំ លិខិតឆ្លងដែនលេខវេ៩៩០៣៨៦ធ្វើដំណើរតាមជើងយន្តហោះលេខMI៦៣៦សឹង្ហបុរី-សៀមរាប។
សមត្ថកិច្ចឆែកឆេររកឃើញគ្រឿងញៀនប្រភេទមេតំហ្វេតាមីនមានទម្ងន់៣គីឡូ៤២៥ក្រាមដែលស្រ្តីនោះលាក់ទុកក្នុងកាបូបដាក់ខោអាវ។ជាលទ្ធផលក្នុងកិច្ចប្រតិបត្តិការបង្រា្កបការជួញដូរគ្រឿងញៀនឆ្លងប្រទេសនៅអាកាសយានដ្ឋានអន្តរជាតិភ្នំពេញនិងខេត្តសៀមរាបកាលពីល្ងាចថ្ងៃទី១៥ខែសីហានេះដកហូតគ្រឿងញៀនប្រភេទមេតំហ្វេតាមីនមានចំនួន៥គីឡូ៣៤៤,៩ក្រាម។សង្ស័យទាំងពីរនាក់ខាងលើរួមទាំងវត្ថុតាងត្រូវបានការិយាល័យគយនិងរដ្ឋាករអាកាសយានដ្ឋានអន្តរជាតិភ្នំពេញប្រគល់ទៅឲ្យមន្ទីរប្រឆាំងគ្រឿងញៀនក្រសួងមហាផ្ទៃចាត់ការតាមនីតិវិធី៕
ចែករំលែកព័តមាននេះ