ខេត្តកំពង់ស្ពឺ ៖ ស្ត្រីមានផ្ទៃពោះ៦ខែម្នាក់ដួលបែកក្បាល និងរលាត់ចង្កេះ ខណៈពេលប្តីឌុបត្រឡប់មកពីពិនិត្យផ្ទៃពោះវិញ ជិះបុកគ្នាជាមួយម៉ូតូមួយគ្រឿងទៀតបត់ចូលក្នុងបន្ទាយទាហានអត់ស៊ីញ៉ូ បណ្តាលឱ្យដួល កាលពីវេលាម៉ោង៤និង២០នាទីរសៀលថ្ងៃទី១៥ សីហា ២០១២ លើកំណាត់ផ្លូវជាតិលេខ៤ មុខបន្ទាយទាហាន ឃុំត្រែងត្រយឹង ស្រុកភ្នំស្រួច ។
ស្ត្រីរងគ្រោះឈ្មោះឆាំ ស្រីលក្ខណ៍ អាយុ២៥ឆ្នាំ មានប្តីឈ្មោះរី សារិទ្ធិ អាយុ២៦ឆ្នាំ ជាកសិករ ស្នាក់នៅតំបន់អភិវឌ្ឍន៍សម្តេចតេជោយោធិនពិការត្រកើនកោះស្លា៣១៧ ផ្ទះលេខ១៥៦ ជួរខ្សែទី១ ស្រុកឈូក ខេត្តកំពត ។
បើតាមសម្តីឈ្មោះរី សារិទ្ធិ ជាប្តីឱ្យដឹងថា មុនពេលកើតហេតុរូបគេបានជិះម៉ូតូម៉ាកស្មាស់ស៊េរី២០០៨ ពណ៌ខ្មៅ ឌុបប្រពន្ធទៅពិនិត្យផ្ទៃពោះនៅមណ្ឌលសុខភាពខេត្តកំពង់ស្ពឺ បន្ទាប់ពីពិនិត្យរួចរាល់អស់ហើយ ក៏ឌុបប្រពន្ធត្រឡប់មកផ្ទះវិញ ។ លុះពេលកំពុងតែជិះម៉ូតូស្រាប់តែមានម៉ូតូនាយទាហានម្នាក់បើកមកពីមុខបត់ឆ្វេងចូលទៅក្នុងបន្ទាយមិនបានស៊ីញ៉ូទេ ធ្វើឱ្យរូបគេជាន់ហ្វ្រាំងមិនទាន់ជ្រុលទៅបុកម៉ូតូនោះដួលបែកក្បាលប្រពន្ធ និងរលាត់ចង្កេះ រីឯប្តីមិនមានរងរបួសទេ ចំណែកនាយទាហាននោះបានលើកម៉ូតូជិះចូលទៅក្នុងបន្ទាយបាត់ បន្ទាប់មកទើបមាននាយទាហានដទៃទៀតមកប្រាប់ថា ចាំគេចាប់អ្នកបើកម៉ូតូបង្កនោះឱ្យ ។ ប្រភពដដែលបានបន្តទៀតថា ដោយសារតែមានការភិតភ័យនឹងប្រពន្ធមានរបួសមិនគិតពីរឿងចាប់អ្នកបង្កទេ ប្រញាប់បញ្ជូនប្រពន្ធទៅសង្គ្រោះនៅមន្ទីរពេទ្យខេត្ត រួចក៏បញ្ជូនបន្តទៅព្យាបាលនៅមន្ទីរពេទ្យព្រះកុសុមៈ រាជធានីភ្នំពេញ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ