ខេត្តតាកែវ ៖ ក្រុមចោរប្លន់៥នាក់ជិះរថយន្ត១គ្រឿងប្រដាប់ដោយកាំភ្លើង AK ១ដើម និងកាំភ្លើងខ្លី១ដើម បានចូលធ្វើសកម្មភាពប្លន់ផ្ទះថៅកែគោយកទ្រព្យសម្បត្តិបានដោយសុវត្ថិភាពកាលពីវេលាម៉ោង៦និង៤០នាទីល្ងាចថ្ងៃទី១៥ សីហា ២០១២ ស្ថិតក្នុងភូមិប្រឹស ឃុំខ្វាវ ស្រុកទ្រាំង ។
ថៅកែគោដែលត្រូវក្រុមចោរប្លន់ដល់ក្នុងផ្ទះយកទ្រព្យសម្បត្តិនេះប្តីឈ្មោះលឹម វន អាយុ៤៩ឆ្នាំ និងប្រពន្ធឈ្មោះអ៊ុយ ញ៉ី អាយុ៥២ឆ្នាំ ហើយទ្រព្យសម្បត្តិដែលបាត់បង់មានលុយខ្មែរចំនួន១០០លានរៀល លុយដុល្លារជាង២.០០០ដុល្លារ មាស១តម្លឹង៨ជី ផ្លាទីន១តម្លឹង៧ជី និងម៉ូតូ២គ្រឿង ១គ្រឿងម៉ាកគ្លីក ស៊េរី២០១២ និងមួយគ្រឿងទៀតម៉ាកឌ្រីមសេ១២៥ ស៊េរី២០១២ ។ ប៉ុន្តែម៉ូតូទាំងពីរគ្រឿងនេះពួកវាជិះបានប្រហែល៥គីឡូម៉ែត្រក៏ផ្តួលចោល បន្ទាប់ពីដឹងថា សមត្ថកិច្ចតាមស្ទាក់ចាប់នោះ ហើយនាំគ្នាឡើងជិះរថយន្តគេចបាត់ស្រមោល ។ ប្រភពព័ត៌មានឱ្យដឹងថា មុនពេលកើតហេតុម្ចាស់ផ្ទះខាងលើកំពុងរៀបចំហូបបាយពេលល្ងាចស្រាប់តែមានក្រុមចោរ១ក្រុមគ្នា៥នាក់ ប្រដាប់ដោយកាំភ្លើងចូលទៅភ្ជង់បាញ់គំរាម៣ទៅ៤គ្រាប់ និងវាយទៅលើបុរសជាប្តីរងរបួស ហើយគ្នាវាម្នាក់បានចាប់ចងស្ត្រីជាប្រពន្ធ រួចនាំគ្នារើកកាយយកទ្រព្យសម្បត្តិបានហើយគេចខ្លួនបាត់ដោយសុវត្ថិភាព បង្កឱ្យមានការភ្ញាក់ផ្អើលតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ