មនុស្សយ៉ាងតិច២០នាក់ស្លាប់ក្នុងមូលដ្ឋានអាហ្សាសរបស់ពួកឧទ្ទាមស្ថិតនៅភាគខាងជើងស៊ីរីជិតព្រំដែនជាមួយតួកគី ។អង្គការសិទ្ធិមនុស្សស៊ីរីស្និទ្ធពួកឧទ្ទាមOSDH អះអាងថា ការវាយឆ្មក់តាមអាកាសនោះរបស់កងទ័ពអាកាសស៊ីរីបានសម្លាប់មនុស្សជាង២០នាក់កាលពីថ្ងៃទី១៥សីហាក្នុងមូលដ្ឋានអាហ្សាសរបស់ពួកឧទ្ទាមនាភាគខាងជើងប្រទេសជិតព្រំដែនជាមួយតួកគី ។
ការវាយប្រហារនោះក៏ប៉ះពាល់ដល់អ្នកធ្វើធម្មយាត្រាស៊ីអុីត លីបង់ ១១នាក់ដែលត្រូវចាប់ពង្រត់កាលពីថ្ងៃទី២២ឧសភា នៅភាគខាងជើងស៊ីរីដែរ ដោយក្នុងចំណោមពួកនោះមាន៤នាក់ត្រូវរបួសធ្ងន់ ។ យោងតាមអង្គការនោះថា ការវាយប្រហារនេះធ្វើឡើងដោយយន្តហោះមួយគ្រឿងដែលបាញ់គ្រាប់មីស៊ីលសំដៅលើអតីតទីស្នាក់ការគណបក្សបាអាសក្នុងទីក្រុង មានប្រជាជន៧០.០០០នាក់នោះដែលក្លាយជាទីចាត់ការសម្រាប់ពួកក្រុមឧទ្ទាម ។
ក្នុងទីក្រុងដាម៉ាស់រដ្ឋធានីស៊ីរីកាលពីថ្ងៃទី១៥ សីហា មានការវាយប្រហារដោយគ្រាប់បែកមួយបណ្តាលឱ្យមនុស្ស៣នាក់ត្រូវរបួសនៅតំបន់ដែលមានកិច្ចការពារសន្តិសុខខ្ពស់នៃក្រុងដាម៉ាស់រដ្ឋធានីស៊ីរី ។ ការវាយប្រហារដោយគ្រាប់បែកដាក់ក្រោមរថយន្តស៊ីឡែនមួយកើតមាននៅជិតសេនាធិការដ្ឋានកងទ័ពនិងសណ្ឋាគារ DAMA ROSE ជាកន្លែងស្នាក់របស់ពួកអ្នកសង្កេតការណ៍អ.ស.ប ។ ទូរទស្សន៍រដ្ឋស៊ីរីគូសបញ្ជាក់ថា ក្រោយការផ្ទុះមានផ្សែងខ្មៅហុយទៅលើអាកាស ។ ពួកឧទ្ទាមស៊ីរីអះអាងថា ការវាយប្រហារនេះគឺជាស្នាដៃរបស់ពួកគេសំដៅលើកងយោធា ។ ក្នុងចំណោមពួកអ្នកសង្កេតការណ៍អ.ស.បពុំមាននរណាម្នាក់ត្រូវរបួសឡើយ ។
ចំណែកអង្គការកិច្ចសហប្រតិបត្តិការអ៊ិស្លាមOCI ដែលមានប្រទេស៥៧ជាសមាជិកបានប្រកាសកាលពីព្រឹកថ្ងៃទី១៦សីហា ពីការបញ្ឈរជើងស៊ីរីក្នុងអង្គការនោះ ។ ការសម្រេចចិត្តនេះធ្វើឡើងតាមរយៈសេចក្តីប្រកាសមួយចេញផ្សាយពេលបញ្ចប់កិច្ចប្រជុំវិសាមញ្ញរបស់ OCI នៅក្រុងឡាម៉ិច អារ៉ាប៊ីសាអូឌីត ៕
ចែករំលែកព័តមាននេះ