ខេត្តឧត្តរមានជ័យ ៖ ក្រុមសមត្ថកិច្ចថៃដែលបម្រើការងារនៅមាត់ច្រកទ្វារអន្តរជាតិជាំសាងាំ បានទម្លាក់ទង់ជាតិ និងរូបសញ្ញាព្រះរាជវាំងចេញ បន្ទាប់ពីសមត្ថកិច្ចកម្ពុជាធ្វើការរារាំង កាលពីរសៀលថ្ងៃទី១៥ សីហា ២០១២ ស្ថិតក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ។
សមត្ថកិច្ចកម្ពុជាបម្រើការងារនៅមាត់ច្រកទ្វារអន្តរជាតិជាំសាងាំ បានឱ្យកោះសន្តិភាពដឹងថា លោកឧត្តមសេនីយ៍ទោ នួន នៅ មេបញ្ជាការរងយោធភូមិភាគទី៤ ប្រចាំទិសស្រុកអន្លង់វែង និងស្រុកត្រពាំងប្រាសាទបានអញ្ជើញមកជួបសមត្ថកិច្ចថៃនៅមាត់ច្រកទ្វារអន្តរជាតិជាំសាងាំ ហើយបានព្រមានសមត្ថកិច្ចថៃថា រូបសញ្ញារាជវាំង និងទង់ជាតិថៃដែលដាក់ដំឡើងនៅក្បែរមាត់ច្រកទ្វារនោះ គឺសុំឱ្យខាងភាគីថៃទម្លាក់វិញ ព្រោះព្រំដែនមិនទាន់កំណត់ច្បាស់លាស់នៅឡើយ តែបើមិនទម្លាក់ទេនោះ ខាងភាគីកម្ពុជា នឹងសាងសង់កន្លែងបម្រើការងាររឹងមាំ និងដាក់ទង់ជាតិដូចខាងភាគីថៃដែរ។ បន្ទាប់ពីបានព្រមានរួចខាងភាគីថៃក៏យល់ព្រមទម្លាក់រូបសញ្ញារាជវាំង និងទង់ជាតិរបស់ខ្លួនចុះវិញនៅវេលាម៉ោង៣និង២០នាទីរសៀលថ្ងៃទី១៥ សីហា ២០១២ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ