ខេត្តពោធិ៍សាត់ ៖ កាលពីថ្ងៃទី១៥ សីហា ២០១២ លោករដ្ឋមន្ត្រីស៊ុយ សែម ប្រធានក្រុមការងារគណបក្សប្រជាជនកម្ពុជាចុះជួយខេត្តពោធិ៍សាត់ បានអញ្ជើញជាអធិបតីក្នុងពិធីបញ្ចុះបឋមសិលាសាងសង់បណ្ណាល័យចំនួន២ខ្នងនៅ វិទ្យាល័យអូរតាប៉ោង និងវិទ្យាល័យបាកាន ។ ក្នុងឱកាសនោះមានការចូលរួមពីសំណាក់ថ្នាក់រដ្ឋលេខាធិការ អនុរដ្ឋលេខាធិការក្រសួងឧស្សាហកម្មរ៉ែ និងថាមពល អភិបាលរងខេត្ត ក្រុមការងារ សិស្ស គ្រូ និងប្រជាពលរដ្ឋសរុបចំនួន១.០០០នាក់ ។
លោកសៅ ដារឿន អភិបាលស្រុកបាកាន ធ្វើសេចក្តីរាយការណ៍ជូនថា ឆ្នាំនេះនៅស្រុកបាកាន ធ្វើស្រែបានគ្រប់ផែនការ៤៥.០០០ហិកតា ច្រូតកាត់រួច៨.៥០០ហិកតា ប៉ុន្តែត្រូវជួបគ្រោះរាំងស្ងួតប្រមាណ៥.០០០ហិកតា ដែលអាជ្ញាធរ និងជំនាញធនធានទឹកកំពុងតែខិតខំដោះស្រាយផ្តល់ទឹកពីប្រព័ន្ធធារាសាស្ត្រដំណាក់អំពិល ។ លោកឱ្យដឹងថា ឆ្នាំ ២០១២ នេះគ្រឿងចក្ររបស់លោកប្រធានក្រុមការងារ និងលោកឧកញ៉ា វិញ ហួរ កសាងប្រឡាយទឹកបានប្រវែង៦១.៩៨៤ម៉ែត្រ ផ្លូវលំប្រវែង១០៧.០១៧ម៉ែត្រ ស្តារអូរប្រវែង២.៤០០ម៉ែត្រ ជីកស្រះទឹកបាន១.៦១១ស្រះ និងចិញ្ចឹមត្រីបាន៨៣៥ស្រះ។ ចំពោះវិស័យអប់រំក៏មានការរីកចំរើនខ្លាំងក្លាដែរ ក្នុងឆ្នាំសិក្សា២០១១-២០១២ នេះមានសាលាបឋមសិក្សាចំនួន៨២សាលា មត្តេយ្យសិក្សា២៨សាលា អនុវិទ្យាល័យ៨សាលា វិទ្យាល័យ៥សាលា និងអគារសិក្សាសរុបទាំងអស់មាន១៨៤ខ្នង ក្នុងនោះ អគារថ្ម១៤៣ខ្នង ។ ចំណែកការបញ្ចុះបឋមសិលាថ្ងៃនេះសាងសង់បណ្ណាល័យចំនួន២ខ្នង មួយខ្នងនៅក្នុងវិទ្យាល័យអូរតាប៉ោងនេះ និងមួយខ្នងទៀតនៅវិទ្យាល័យបាកាន មានទំហំ១៦ម៉ែត្រគុណ២០ម៉ែត្រ។
លោករដ្ឋមន្ត្រី ស៊ុយ សែម បានថ្លែងថា បណ្ណាល័យទាំង២ខ្នងនេះជាអំណោយរបស់លោកឧកញ៉ា វិញ ហួរ និងលោកជំទាវផ្តល់ជូនជាគុណប្រយោជន៍ដល់កូនចៅយើងទាំងអស់ ដូច្នេះសូមចេះជួយថែរក្សា និងប្រើប្រាស់ឱ្យមានផលប្រយោជន៍ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ