រាជធានីភ្នំពេញ ៖ ថ្មីៗនេះ បន្ទាប់ពីបានចេញលក់នូវទូរស័ព្ទដៃស៊េរីថ្មី HTC One X និង HTC One V របស់ខ្លួនរួចមក ក្រុមហ៊ុន HTC បានចេញលក់នូវទូរស័ព្ទស៊េរីថ្មីមួយទៀត គឺ HTC One S ដើម្បីបំពេញតម្រូវការរបស់អ្នកប្រើប្រាស់ទូរស័ព្ទនៅក្នុងព្រះរាជាណាចក្រកម្ពុជាដែលមានការកើនឡើងឥតឈប់ឈរជាមួយនឹងទូរស័ព្ទប្រភេទស្មាតហ្វូន ។
តាមការបង្ហាញរបស់អ្នកតំណាងផ្នែកទីផ្សាររបស់ក្រុមហ៊ុន Qool (ឃូល) នៅហាង Mtesh ផ្សារសុវណ្ណា បានឱ្យដឹងថា ទូរស័ព្ទដៃ HTC One S ជាប្រភេទទូរស័ព្ទស្មាតហ្វូន មានរូបរាងស្តើង និងបំពាក់នូវបច្ចេកវិទ្យាទំនើបៗជាច្រើន អាចនិយាយបានថា ជាបច្ចេកវិទ្យាចុងក្រោយបំផុត នៃប្រភេទទូរស័ព្ទដៃស្មាតហ្វូន ដែលបច្ចេកវិទ្យាថ្មីនេះ វានឹងជួយបំពេញការងារប្រចាំថ្ងៃ និងការកម្សាន្តរបស់អ្នកប្រើប្រាស់ទាំងអស់ឱ្យកាន់តែមានភាពសម្បូរបែបថែមទៀត ។
HTC One S គឺជាទូរស័ព្ទស្មាតហ្វូនស៊េរីទំនើបត្រូវបានបំពាក់នូវអេក្រង់ Touchscreen ទំហំ៤.៣អុីង ប្រើប្រាស់នូវកញ្ចក់ Super AMOLED Touchscreen ជាប្រភេទកញ្ចក់ដែលផ្តល់នូវពន្លឺភ្លឺច្បាស់ជាងគេបំផុត និងមានកាមេរ៉ាសម្រាប់ថតរូបភាពមានទំហំ៨មេហ្គាភិចសែល អមមកជាមួយនូវមុខងារ Autofocus, LED Smart Flash និង BSI Sensor ហើយនិងសមត្ថភាពអាចថតវីដេអូបានច្បាស់ក្នុងកម្រិត 1080p ។ ក្រៅពីនេះ HTC One S គឺបានបំពាក់នូវអង្គប្រតិបត្តិការ Dual-core 1.7GHz Snapdragon S4 មានសមត្ថភាពអាចធ្វើការគណនាបានលឿនជាងទូរស័ព្ទស្មាតហ្វូនដទៃទៀត ជាពិសេសការប្រើប្រាស់អុីនធើរណេតតែម្តង ។ ចំពោះប្រព័ន្ធប្រតិបត្តិការវិញ គឺដំណើរការដោយប្រព័ន្ធប្រតិបត្តិការ Android OS, Version 4.0 (Ice Cream Sandwich) ។ នៅលើស្មាតហ្វូន HTC One S គឺមានបំពាក់នូវអង្គចងចាំទំហំ 16GB រួចជាស្រេច ។ បន្ថែមពីលើលក្ខណៈពិសេសៗទាំងនេះ វាក៏នៅមានបច្ចេកវិទ្យា GPS, Bluetooth 4.0 និងបច្ចេកវិទ្យា Wi-Fi, Hot Spot សម្រាប់ភ្ជាប់អុីនធើរណេតបានយ៉ាងឆាប់រហ័សផងដែរ ។ រីឯតម្លៃរបស់ទូរស័ព្ទស្មាតហ្វូន HTC One S គឺមានតម្លៃប្រហាក់ប្រហែល៤៨៩ដុល្លារសហរដ្ឋអាមេរិក នឹងការធានាដែលមានរយៈពេល១២ខែ ។
គូសបញ្ជាក់ផងដែរថា ហាង Mtesh ដែលមានទីតាំងនៅជាន់ផ្ទាល់ដីជាប់ Lucky Supermarket នៅផ្សារសុវណ្ណាក៏មានដាក់តាំងបង្ហាញទូរស័ព្ទដៃ HTC One គ្រប់ស៊េរីសម្រាប់អតិថិជនសាកល្បងប្រើប្រាស់ដើម្បីទទួលយកបទពិសោធន៍ដ៏ពិតប្រាកដរបស់ទូរស័ព្ទស្មាតហ្វូន ៕
ចែករំលែកព័តមាននេះ