ខេត្តព្រៃវែង ៖ កាលពីថ្ងៃទី១៣ សីហា នៅសាលាស្រុកពារាំង ការិយាល័យផលិតកម្ម និងបសុព្យាបាលខេត ្តបានបើកកិច្ចប្រជុំផ្សព្វផ្សាយពីសារប្រយោជន៍នៃការបង្កាត់ពូជជ្រូកសិប្បនិម្មិត ក្រោមអធិបតីភាពលោក គង់ នី អភិបាលរងស្រុកពារាំង ។ ចូលរួមក្នុងកិច្ចប្រជុំផ្សព្វផ្សាយនេះមានអ្នកចិញ្ចឹមជ្រូកបាចំនួន៣៥នាក់ ព្រមទាំងមន្ត្រីជំនាញ និងភ្នាក់ងារបម្រើសុខភាពសត្វភូមិចំនួន៧នាក់ ។
លោក វ៉ា វិសិដ្ឋ អនុប្រធានការិយាល័យផលិតកម្មនិងបសុព្យាបាលខេត្តមានប្រសាសន៍ថា កន្លងមកមានផលប៉ះពាល់ជា អវិជ្ជាមានដល់ការចិញ្ចឹមជ្រូក តាមរយៈការបង្កាត់ផ្ទាល់រវាងមេជ្រូក និងបាជ្រូក ទើបពេលនេះធ្វើការអញ្ជើញអ្នកចិញ្ចឹមមេជ្រូក បាជ្រូក និងភ្ញៀវកិត្តិយសមកចូលរួមក្នុងកិច្ចប្រជុំក្នុងគោលបំណងបង្កើនផលិតកម្មជ្រូក កាត់បន្ថយការរីករាលដាលជំងឺរាតត្បាត កាត់បន្ថយការចំណាយទៅលើការចិញ្ចឹមបាជ្រូក និងបង្កើនភាពងាយស្រួលដល់ដំណើរការបង្កាត់ពូជប្រកបដោយសុវត្ថិភាពផ្នែកសុខភាពសត្វជ្រូក ។ លោកបន្តថា គោលបំណងសំខាន់គឺកាត់បន្ថយការបង្កាត់ពូជជ្រូកតាមរយៈការបង្កាត់ដោយផ្ទាល់រវាងបាជ្រូក និងមេជ្រូក សំដៅធ្វើឱ្យផលិតកម្មជ្រូកប្រកបដោយសុខដុមនីយកម្មសេដ្ឋកិច្ចគ្រួសារ រវាងអ្នកចិញ្ចឹម និងតម្រូវការ ។
លោកវ៉ា វិសិដ្ឋបានបន្តថា ចំពោះកម្មវិធីនេះការិយាល័យផលិតកម្ម និងបសុព្យាបាលខេត្តក៏ធ្លាប់បានធ្វើការផ្សព្វផ្សាយជូនទៅដល់សាធារណជន តាមបណ្តាស្រុកនានារួមមាន លើកទី១ ប្រារព្ធធ្វើនៅភូមិទួលខ្ពស់ ឃុំឈើកាច់ ស្រុកបាភ្នំ លើកទី២ធ្វើនៅក្រុងព្រៃវែង និងលើកទី៣ ធ្វើនៅស្រុកពាមរក៍ ។
លោក គង់ នី អភិបាលរងស្រុកពារាំង បានកោតសរសើរការិយាល័យផលិតកម្ម និងបសុព្យាបាលខេត្ត ដែលបើកកិច្ចប្រជុំនេះឡើងសំដៅផ្សព្វផ្សាយទៅដល់សាធារណជនក្នុងស្រុកពារាំង ក៏ដូចជាខេត្តព្រៃវែងទាំងមូល ។ លោកបានផ្តាំផ្ញើដល់សាធារណជន ជាពិសេសបណ្តាអ្នកចិញ្ចឹមជ្រូកទាំងអស់ សូមឱ្យចាប់អារម្មណ៍ងាកមករកការបង្កាត់ពូជជ្រូកដោយសិប្បនិម្មិតវិញ ព្រោះតាមវិធីនេះអាចឱ្យបងប្អូនបញ្ចៀសបានការខាតបង់ថវិកា ពេលវេលាចិញ្ចឹមហើយសត្វមិនឆ្លងជំងឺ ដូចការបង្កាត់ផ្ទាល់រវាងបាជ្រូក និងមេជ្រូក ៕
ចែករំលែកព័តមាននេះ