រាជធានីភ្នំពេញ ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ក្នុងពិធីប្រគល់សញ្ញាបត្រជូននិស្សិតជ័យលាភីកម្រិតបរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិតនៃសាកលវិទ្យាល័យបៀលប្រាយ នាព្រឹកថ្ងៃទី១៥ សីហា ២០១២ នៅមជ្ឈមណ្ឌលពិព័រណ៍ និងសន្និបាតកោះពេជ្រដោយរិះគន់មនុស្សមួយចំនួនយ៉ាងខ្លាំងៗថា គួរឱ្យសោកស្តាយ មានមនុស្សខ្លះគេនិយាយថា គេបានមកមិនមែនដោយសារ៧ មករា ១៩៧៩ នោះទេ ។ មិនចាំបាច់ទទួលស្គាល់ក៏បានដែរ ។ សម្តេចបានរំលឹកឡើងវិញកាលពីមានប្រសាសន៍បំភ្លឺនៅវិមានរដ្ឋសភាថា ព្រោះបញ្ហាធាតុតិរច្ឆាន…ទោះបីជាមេវាក៏ដោយក៏វាមិនគិតដែរ …។
ប៉ុន្តែបានលើកជាសំណួរសួរថា បើសិនជាអ្នកឯងមិនត្រូវបានរំដោះដោយថ្ងៃ៧មករាទេ ឪពុកម្តាយ ជីដូនជីតា របស់អ្នកឯងមិនត្រូវបានរំដោះដោយថ្ងៃ៧មករាទេ តើអ្នកឯងមានជីវិតដែរឬទេ ? ហើយតើអ្នកឯងមានលទ្ធភាពមករៀនសូត្រដូចសព្វថ្ងៃទេ? និយាយឱ្យពិតទៅ លើកលែងទាល់តែអ្នករស់នៅក្រៅប្រទេស មិនស្លាប់ទេ ប៉ុន្តែក្រុមគ្រួសាររបស់ពួកគាត់នៅក្នុងស្រុកគឺស្លាប់អស់ច្រើនដែរ ។ បើទោះបីជាយ៉ាងណា អ្នកនោះគាត់ក៏មានសាច់ឈាមរបស់គាត់ត្រូវគេសម្លាប់ដែរ ។
សម្តេចតេជោ នាយករដ្ឋមន្ត្រីសង្កត់ធ្ងន់ថា នេះជាសច្ចធម៌ប្រវត្តិសាស្ត្រ ហើយបើគ្រាន់តែប៉ុណ្ណឹងអត់ទទួលស្គាល់ទៅហើយ វាមិនអាចនិយាយឬទៅដឹកនាំអ្នកណាបានទៀតទេ ព្រោះសូម្បីតែជីវិតរបស់ខ្លួនឯងដែលត្រូវបានផ្តល់តាមរយៈការរំដោះថ្ងៃ៧ មករា ខ្លួនឯងមិនទទួលស្គាល់ផង តើទទួលស្គាល់អីទៀត ។
ទន្ទឹមនឹងនោះ សម្តេចតេជោ នាយករដ្ឋមន្ត្រីបានលើកមកបង្ហាញជាក់ស្តែងថា ជោគជ័យថ្ងៃនេះតើបានមកពីអ្វី ? ច្បាស់ណាស់ ចម្លើយដំបូង បានមកពីការខិតខំ ដូចខ្ញុំបាននិយាយអីុចឹង ទោះបីនយោបាយល្អ ទោះបីសាលាល្អ គ្រូល្អ ក៏ប៉ុន្តែគ្មានការខិតខំទេ មិនអាចធ្វើកើតទេ ក៏គេមិនអាចចម្លងដោយយកសឺរ៉ាំងទៅចាក់ពីខួរក្បាលលោកគ្រូ ទៅចាក់ខួរក្បាលកូនសិស្សបានទេ ។ ត្រឹមត្រូវ … ។
ប៉ុន្តែបើសួរមួយម៉ាត់ បើសិនជារដ្ឋាភិបាល អតីតរដ្ឋកម្ពុជា និងមកដល់រាជរដ្ឋាភិបាល នៅក្នុងព្រះរាជាណាចក្រកម្ពុជា មិនបង្កលក្ខណៈឱ្យវិស័យឯកជនចូលរួមវិនិយោគ ក្នុងវិស័យអប់រំ ដូចជា បៀលប្រាយ អីុចឹង តើមានបៀលប្រាយរៀន ឬអត់ ? ព្រោះរាជរដ្ឋាភិបាលមិនឱ្យធ្វើ មិនចេញអនុក្រឹត្យឱ្យបង្កើត សួរថាតើមានបៀលប្រាយទេ ? ដូច្នេះបញ្ហានេះ ត្រូវទទួលស្គាល់គួបផ្សំគ្នារវាងការខិតខំខ្លួនឯង ប៉ុន្តែត្រូវចាប់ផ្តើមពីចំណុចមួយ គឺនយោបាយត្រឹមត្រូវរបស់បក្សដឹកនាំរបស់រាជរដ្ឋាភិបាល របស់គណបក្សកាន់អំណាច។
ចំណុចនេះត្រូវមើលឱ្យឃើញនូវភាពចាំបាច់នៃក្របខណ្ឌគោលនយោបាយមួយច្បាស់លាស់។ បើសិនគ្រាន់តែប៉ុណ្ណឹងមិនទទួលស្គាល់ផង តើធ្វើមនុស្សយ៉ាងម៉េច ? រឿងនយោបាយសំខាន់ណាស់ ណាសង្គ្រាមកើតពីឆ្នាំ១៩៧០ដល់១៩៧៥ ក្នុងពេលនោះតំបន់ត្រួតត្រាដោយលន់ នល់ និស្សិតអាចនៅរៀនបានខ្លះ ក៏ប៉ុន្តែនិស្សិតមួយចំនួន និងសាស្ត្រាចារ្យត្រូវចាប់ធ្វើទាហាន ។ បើសិនជារាជរដ្ឋាភិបាលមិនឱ្យវិស័យឯកជនចូលរួម ច្បាស់ណាស់ប្រហែលជាគ្មាននិស្សិតជាង៥ពាន់នាក់ដែលមកទទួលសញ្ញាបត្រនៅថ្ងៃនេះទេ ហើយមិនមានជាង៣ម៉ឺននាក់ចេញបញ្ចប់ការសិក្សារួចហើយ ។
ការប្រកបអាជីវកម្មក៏ដូចគ្នាដែរ បើសិនជារាជរដ្ឋាភិបាលលើកទឹកចិត្តលើផ្នែកនេះត្រឹមត្រូវ ក្នុងនោះមានបញ្ហាពន្ធដារផងដែរ ប្រហែលជាវិស័យសេដ្ឋកិច្ចកម្ពុជាមិនទៅមុខទេ ។ ការដឹកនាំឆ្លងកាត់វិបត្តិសេដ្ឋកិច្ច ហិរញ្ញវត្ថុជាសាកល គឺបើសិនរាជរដ្ឋាភិបាលមិនចាប់អារម្មណ៍ មិនបានប្រុងប្រៀបទុកជាមុន ប្រហែលជាយើងឆ្លងកាត់ការលំបាកលំបិនហើយ ។ ដើម្បីកុំឱ្យមានការដួលរលំនៃវិស័យធនាគារដូចដែលធ្លាប់កើតនៅក្នុងវិស័យហិរញ្ញវត្ថុ រាជរដ្ឋាភិបាលបានបង្កើតទុនបម្រុងកាតព្វកិច្ច ពេលនោះធនាគារមួយចំនួនមិនបានពេញចិត្តផងទេ ។ ប៉ុន្តែទីចុងបំផុត នេះគឺសុវត្ថិភាពក្នុងការជឿជាក់ក្នុងវិស័យធនាគារ ។
បើគ្មានការគ្រប់គ្រងដ៏ត្រឹមត្រូវ រៀបចំច្បាស់លាស់ទេ គ្មានឱកាសទេ សម្រាប់ការទទួលសញ្ញាបត្រនៅថ្ងៃនេះ ។ ឱកាសថ្ងៃនេះ និងឱកាសថ្ងៃមុនខុសគ្នាឆ្ងាយណាស់ទាំងក្នុងប្រទេស និងក្រៅប្រទេស ។ សម្តេចតេជោ នាយករដ្ឋមន្ត្រីបានមានប្រសាសន៍ឱ្យប្រជាពលរដ្ឋកម្ពុជាទាំងអស់ឱ្យយល់ ចាប់ពីក្រោយរំដោះមក ប្រទេសកម្ពុជាត្រូវរងនូវសម្ពាធអន្តរជាតិ ដោយការហ៊ុមព័ទ្ធសេដ្ឋកិច្ច និងទណ្ឌកម្មនយោបាយ ។ នៅពេលនោះនិស្សិតទាំងអស់ពុំមានឱកាសដូចថ្ងៃនេះទេ ។ ថ្ងៃនេះយើងអាចទៅរៀនដោយឯកជនរបស់យើងក៏បានដែរ អត់មានអ្នកណាហាមឃាត់ទេ ចង់ទៅរៀននៅប្រទេសណាក៏បាន អាស្រ័យមានប្រាក់ទេ។
ចំណែកអាហារូបករណ៍ដែលប្រទេសគេឱ្យនោះ គេឱ្យតាមរយៈក្រសួងអប់រំ ហើយប្រឡងធ្វើការជ្រើសរើស ។ ក្នុងអតីតកាលក៏ដូចបច្ចុប្បន្នកាលដែរ សុំឱ្យយល់អំពីបញ្ហាហ្នឹង អាហារូបករណ៍មករដ្ឋាភិបាល ហើយបើរដ្ឋាភិបាលមិនរើសអស់លោក លោកស្រីទេ អស់លោក លោកស្រីគ្មានឱកាសទេ កុំចាំបាច់និយាយពង្វាង ។ មនុស្សធុននេះ ដែលមិនទទួលស្គាល់ថាខ្លួនមកពីត្រង់ណាផង ខ្លួនត្រូវបានបណ្តុះបណ្តាលយ៉ាងម៉េច មនុស្សធុននេះបើសិនជាឱ្យដឹកនាំគឺស្លាប់ឯង ព្រោះគ្រាន់តែរឿងដូច្នេះមិនទទួលស្គាល់ទៅហើយ អាចហ៊ានក្បត់ សហាយស្មន់ ភាពមិនស្មោះត្រង់ជាមួយក្រុមគ្រួសារខ្លួនឯង ។ តើយើងអាចផ្ញើវាសនាបានទេ ? សម្តេចតេជោមានប្រសាសន៍ថា ខ្ញុំមិនថាឱ្យអ្នកណាទេ ប៉ុន្តែចង់សំដៅរួម … គួរឱ្យអាម៉ាស់ ការបោកប្រាស់មនុស្សរាប់លាននាក់ដែលគេស្គាល់រឿង ។ ពាក្យខ្មែរនិយាយថា បើដេញទាន់កុំជាន់កែង ។ ប៉ុន្តែមានមនុស្សមួយចំនួនបើដេញទាន់មិនជាន់កែង មិនរាងទេ ទាល់តែជាន់ឱ្យដួលតែម្តងទៅ ប៉ុន្តែបើដេញទាន់មិនជាន់កែងគេនៅតែមិនរាង ៕
ចែករំលែកព័តមាននេះ