រាជធានីភ្នំពេញ ៖ ការនាំគ្រឿងញៀនឆ្លងកាត់តាមអាកាសយានដ្ឋានអន្តរជាតិភ្នំពេញជាបន្តបន្ទាប់ក្នុងសប្តាហ៍នេះ បានបង្កើតឱ្យមានការភ្ញាក់ផ្អើល និងគួរឱ្យកត់សម្គាល់បំផុត ហើយករណីទី៤ត្រូវបានវែកមុខ ដែលការរឹបអូសគ្រឿងញៀនសរុបមានប្រមាណ៣៣គីឡូក្រាមត្រូវបានការិយាល័យគយ និងរដ្ឋាករអាកាសយានដ្ឋានអន្តរជាតិភ្នំពេញបង្ក្រាបជាបន្តបន្ទាប់ក្នុងខែសីហា ឆ្នាំ២០១២នេះ ។
ចំពោះការបង្ក្រាបគ្រឿងញៀនថ្មីមួយទៀត ដែលជាករណីទី៤ គឺបានបង្ក្រាបនិងឃាត់ខ្លួនស្ត្រីជនជាតិថៃម្នាក់ ដោយដកហូតបានម្សៅកូកាអីុនជិត១៣គីឡូក្រាម នៅចំណុចច្រកអ្នកដំណើរមកដល់កាលពីវេលាម៉ោង១១និង១៨នាទីព្រឹកថ្ងៃទី១៤ សីហា ។ មន្ត្រីនគរបាលប្រចាំការនៅអាកាសយានដ្ឋានអន្តរជាតិភ្នំពេញឱ្យដឹងថា នៅវេលាម៉ោងជាង១១ព្រឹកថ្ងៃនោះមន្ត្រីគយនៃការិយាល័យគយ និងរដ្ឋាករអាកាសយានដ្ឋានអន្តរជាតិភ្នំពេញនៅចំណុចច្រកអ្នកដំណើរមកដល់ បានចាប់ឃាត់ស្ត្រីថៃម្នាក់ឈ្មោះ Bucha Preedaporn អាយុ៣៥ឆ្នាំ កាន់លិខិតឆ្លងដែនលេខB៦០៧៤៨៩ ។ ស្ត្រីរូបនេះធ្វើដំណើរតាមជើងយន្តហោះ MI៦២២ សិង្ហបុរី-ភ្នំពេញ ដែលជាជើងយន្តហោះក្នុងទិសដៅតែមួយចូលមកកម្ពុជា ។
បន្ទាប់ពីឃាត់ខ្លួន សមត្ថកិច្ចគយបាននាំស្ត្រីជនជាតិថៃរូបនេះទៅយកវ៉ាលីស និងធ្វើការឆែកឆេរ ហើយរកឃើញម្សៅពណ៌ស ចំនួន១០ដុំ ដែលលាក់ទុកនៅបាតនិងជញ្ជាំងវ៉ាលីស ។ យោងតាមសមត្ថកិច្ចជំនាញដែលធ្វើការត្រួតពិនិត្យម្សៅពណ៌ស នោះបានបញ្ជាក់ថា ជាម្សៅកូកាអីុនមានទម្ងន់១២គីឡូ៨៩៩,៤ក្រាម ដែលគ្រឿងញៀននេះពួកឧក្រិដ្ឋជនមានគោលបំណងនាំចេញបន្តទៅប្រទេសថៃ ចំណែកកម្ពុជាគ្រាន់តែជាតំបន់ឆ្លងកាត់ប៉ុណ្ណោះ ។
ក្នុងរយៈពេលមួយសប្តាហ៍ គិតចាប់ពីថ្ងៃទី៧ ដល់ថ្ងៃទី១៤ សីហា ការិយាល័យគយនិងរដ្ឋាករអាកាសយានដ្ឋានអន្តរជាតិភ្នំពេញបានឃាត់ខ្លួនជនសង្ស័យជួញដូរគ្រឿងញៀនឆ្លងប្រទេសចំនួន៥នាក់សុទ្ធសឹងជាស្ត្រីថៃ និងដកហូតបានគ្រឿងញៀនប្រភេទមេតំហ្វេតាមីន និងម្សៅកូកាអីុនសរុបជាង៣៣គីឡូក្រាម ។ ស្នាដៃបង្ក្រាបជាបន្តបន្ទាប់ដែលរកឃើញគ្រឿងញៀនរហូតដល់៣៣គីឡូក្រាម ក្នុងរយៈពេល១សប្តាហ៍នេះ ធ្វើឱ្យមានការលើកឡើងថា អាជ្ញាធរជាតិប្រយុទ្ធប្រឆាំងគ្រឿងញៀន និងក្រសួងមហាផ្ទៃគួរផ្តល់រង្វាន់លើកទឹកចិត្តដល់មន្ត្រីដែលខិតខំបង្ក្រាបដែលនេះជាការឆ្លើយតបសម្រាប់សមាគមអាស៊ានគ្មានការជួញដូរគ្រឿងញៀនត្រឹមឆ្នាំ២០១៥ ។
នៅក្នុងកិច្ចពិភាក្សាជាមួយគណៈកម្មាធិការប្រឆាំងគ្រឿងញៀន អេដស៍ និងពេស្យាចាររបស់វៀតណាម កាលពីព្រឹកថ្ងៃទី១៥ សីហា ឆ្នាំ២០១២ នៅវិមានសន្តិភាព លោកកែ គឹមយ៉ាន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀនមានប្រសាសន៍ថា កម្ពុជាមិនមែនជាប្រទេសផលិតគ្រឿងញៀនទេ ប៉ុន្តែជាប្រទេសកំពុងរងគ្រោះដោយសារការធ្វើចរាចរណ៍គ្រឿងញៀនឆ្លងកាត់ និងប៉ុនប៉ងយកប្រទេសកម្ពុជាធ្វើការផលិតគ្រឿងញៀនសំយោគខុសច្បាប់ដើម្បីនាំចេញទៅកាន់ទីផ្សារអន្តរជាតិ ៕
ចែករំលែកព័តមាននេះ