ខេត្តបាត់ដំបង ៖ ក្រុមខ្មាន់កាំភ្លើងវែងខ្លីដែលជិះរថយន្តទំនើបបាញ់ផ្អើលប្រជាពលរដ្ឋទាំងកណ្ដាលអាធ្រាត្រ កាលពីជាង១សប្ដាហ៍មុននេះ លើកំណាត់ផ្លូវជាយក្រុងមួយកន្លែង ស្ថិតក្នុងភូមិសាលាបាឡាត់ សង្កាត់អូរម៉ាល់ ក្រុងបាត់ដំបងនោះ ត្រូវបានប្រភពមួយទម្លាយឲ្យដឹងថា ជាក្រុមមន្រ្តីយោធាស៊ើបការណ៍មកពីខេត្តប៉ៃលិន និងជាក្រុមរកស៊ីកាងរថយន្តដឹកឈើពេលយប់ទៀតផង។
ប្រភពព័ត៌មាននិយាយថា ក្រុមនោះជិះរថយន្ត២គ្រឿងក្នុងនោះមានរថយន្តម៉ាកវីហ្គោ១គ្រឿងផង បានបាញ់បណ្ដាក់គ្នាជាច្រើនគ្រាប់ ដោយកាំភ្លើងធុន M16 និងកាំភ្លើងខ្លីធុន K59។ ប្រភពដដែលបញ្ជាក់ថា ក្រុមនេះមានគេស្គាល់ម្នាក់ឈ្មោះ «ថា» ពួកគេជាយោធាកងស៊ើបការណ៍ តែមិនបានបញ្ជាក់ថា ក្រុមប្រដាប់អាវុធទាំងនេះជាកងស៊ើបការណ៍នៅអង្គភាពណាទេ ដោយគ្រាន់តែប្រាប់ថា នៅខេត្តប៉ៃលិន ហើយសមាសភាពក្រុមនេះក៏ត្រូវបានគេស្គាល់ថា ជាក្រុមរកស៊ីកាងរថយន្តដឹកឈើពេលយប់ផងដែរ។ នៅយប់កើតហេតុនោះ ក្រុមនេះបានជូនរថយន្តដឹកឈើចូលក្នុងខេត្តបាត់ដំបង ក្រោយពីជូនដល់គោលដៅពួកគេបាននាំគ្នាចូលទៅច្រៀងខារ៉ាអូខេ នៅហាងមួយកន្លែង លុះចេញមកវិញ ក៏នាំគ្នាបើករថយន្តត្រឡប់ទៅខេត្តប៉ៃលិនវិញ ខណៈម្នាក់ៗស្រវឹងធ្លាក់ភ្នែកទៅហើយ។
ប្រភពដែលសុំលាក់ឈ្មោះដដែលនេះបន្តថា ពេលដែលក្រុមនេះបើករថយន្តដល់ចំណុចរង្វង់មូលនាងគង្ហីង ក្នុងភូមិសាលាបាឡាត់ បត់ទៅស្ដាំបានប្រហែល៣០០ម៉ែត្រ ក៏នាំគ្នាឈប់រថយន្តចុះដកកាំភ្លើងវែងខ្លីបាញ់តែម្ដង។ ប៉ុន្តែប្រភពនេះបានព្យាយាមលាក់បាំងមិននិយាយពីដំណើររឿងដែលនាំឲ្យមានការបាញ់បោះសេរីនោះទេ គ្រាន់តែប្រាប់ថា ពួកគេបាញ់លេង។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ