មនុស្សជិត៥០នាក់បានត្រូវស្លាប់ក្នុងការវាយប្រហារភេរវកម្មទាំងឡាយក្នុងខេត្ត៣ផ្សេងគ្នារបស់អាហ្វហ្គានីស្ថានដែលធ្វើឱ្យថ្ងៃទី១៤សីហាជាថ្ងៃដែលបង្ហូរឈាមបំផុតប្រចាំឆ្នាំ២០១២ក្នុងប្រទេសនេះ ។ កាលពីថ្ងៃទី១៤ សីហា ការវាយប្រហារកើតមាននៅខេត្តនីមរ៉ូស ខេត្តគុនឌុស និងខេត្តបាដាក់សាន ។ តុល្យការធ្ងន់ធ្ងរបំផុតគឺនៅខេត្តនីមរ៉ូសជាកន្លែងធ្លាប់តែស្ងប់ស្ងាត់ដោយមនុស្សយ៉ាងតិច៣១នាក់ស្លាប់ក្នុងទីប្រជុំខេត្តគឺទីក្រុងហ្សារ៉ានហ៍ ហើយមនុស្សប្រមាណជា១០០នាក់ទៀតត្រូវរបួស ។
ជនអត្តឃាត៣នាក់បានធ្វើឱ្យគ្រាប់បែកដាក់ជាប់ខ្លួនពួកគេផ្ទុះជិតផ្សារដែលមានមនុស្សម្នាពពាក់ពពូនដណ្តើមគ្នាទិញអីវ៉ាន់សម្រាប់បុណ្យបញ្ចប់ខែរ៉ាម៉ាដាន ។ នៅខេត្តគុនឌុន ជាខេត្តមួយដែលតែងកើតមានអំពើហិង្សាស្ថិតនៅភាគខាងជើងប្រទេស មនុស្សយ៉ាងតិច៩នាក់ស្លាប់ហើយ៣០នាក់ទៀតត្រូវរបួស ពេលគ្រាប់បែកមួយគ្រាប់ដាក់ជាប់នឹងម៉ូតូមួយគ្រឿងត្រូវគេបញ្ជាឱ្យផ្ទុះពីចម្ងាយក្នុងផ្សារមួយ ។
ចំណែកអ្នកនាំពាក្យម្នាក់របស់ខេត្តបាដាក់សាននិយាយថា ក្នុងស្រុកអាជី ជាប់ព្រំដែនជាមួយតាហ្ស៊ីគីស្ថានជនស៊ីវិល១០នាក់ស្លាប់ហើយមនុស្ស៣០នាក់ទៀតត្រូវរបួសក្នុងការវាយប្រហារមួយនៅស្រុកនោះ ។ អភិបាលស្រុកក៏ត្រូវសម្លាប់រួមជាមួយអង្គរក្ស៣នាក់និងប៉ូលិសម្នាក់ដែរ ៕
ចែករំលែកព័តមាននេះ