សភាមីយ៉ាន់ម៉ា បានអនុម័តកាលពីថ្ងៃទី១៥ សីហា លើការតែងតាំងឧត្តមនាវី នីយ៉ាន ទុន មេបញ្ជាការកងម៉ារីនជាអនុប្រធានាធិបតី ។ ឧត្តមនាវីរូបនេះត្រូវឡើងជំនួសលោកអ៊ូទីន អ៊ុងមីយីនអូ ដែលបានចាកចេញពីតំណែង ដោយសារហេតុផលសុខភាព។
លោកនីយ៉ានទុន ត្រូវបានជ្រើសតាំងដោយគណៈកម្មការយោធារបស់សភាជាបេក្ខជនសម្រាប់តំណែងដែលនៅទំនេរ ក្រោយការលាលែងរបស់លោកអ៊ូទីន អ៊ុងមីយីនអូ ។យោងតាមរដ្ឋធម្មនុញ្ញ រដ្ឋាភិបាលស៊ីវិលថ្មី មីយ៉ាន់ម៉ា ត្រូវមានអនុប្រធានាធិបតី២រូប ដោយអនុប្រធានាធិបតីមួយរូបទៀតគឺលោកបណ្ឌិតសៃម៉ាអ៊ុកខាម ។ ក្រោយការអនុម័តលើការតែងតាំងរូបលោកដោយសភា លោកនីយ៉ានទុនបានធ្វើសច្ចាប្រណិធានចូលកាន់តំណែងនៅមុខប្រធានសភា ។ លោកជាមេបញ្ជាការកងម៉ារីនភូមា ចាប់តាំងពីឆ្នាំ២០០៨មក ៕
ចែករំលែកព័តមាននេះ