ខេត្តពោធិ៍សាត់ ៖ សមិទ្ធផលជនបទនៅស្រុកបាកាន រួមមានផ្លូវក្រាលក្រួសក្រហម ស្រះទឹក និងប្រឡាយទឹកដែលទើបស្ថាបនារួចជាអំណោយរបស់គណបក្សប្រជាជនកម្ពុជាបានធ្វើពិធីកាត់ខ្សែបូសម្ពោធដាក់ឲ្យប្រើប្រាស់ជាផ្លូវការកាលពីព្រឹកថ្ងៃទី១៤ សីហា ២០១២ ក្រោមអធិបតីភាពលោករដ្ឋមន្ត្រីស៊ុយ សែម ប្រធានក្រុមការងារចុះជួយខេត្តពោធិ៍សាត់។
តាមរបាយការណ៍របស់លោកសៅ ដារឿន អភិបាលស្រុកបាកានឲ្យដឹងថា សមិទ្ធផលដែលធ្វើពិធីកាត់ខ្សែបូសម្ពោធដាក់ឲ្យប្រើប្រាស់ជាផ្លូវការនាពេលនេះមានផ្លូវលំក្រាលក្រួសក្រហមចំនួន២ខ្សែប្រវែង៩២៥ម៉ែត្រនៅភូមិទួលរគាំង និងភូមិព្រៃផ្ដៅ ស្រះទឹក១ និងស្ដារប្រឡាយចាស់ប្រវែង៥.៩០៥ម៉ែត្រ នៅភូមិអូរបត់ ភូមិសំរោងពក ភូមិស្រះរុន ភូមិទួលរគាំង ភូមិឧកញ៉ាមាន់ និងភូមិស្ដុកឃ្លោក ដោយប្រើប្រាស់គ្រឿងចក្រ និងប្រេងរបស់ក្រុមការងារគណបក្សប្រជាជនកម្ពុជា ចុះជួយខេត្តពោធិ៍សាត់ ដែលដឹកនាំដោយលោករដ្ឋមន្ត្រី ស៊ុយ សែម អស់ចំនួន៣.៥១០លីត្រ។ ក្នុងការធ្វើផ្លូវជីកស្រះ និងស្ដារប្រឡាយនេះក៏មានការចូលរួមកម្លាំងពលកម្មយ៉ាងមមាញឹកពីបងប្អូនប្រជាពលរដ្ឋក្នុងភូមិផងដែរ។
លោករដ្ឋមន្ត្រីក៏បានផ្ដាំផ្ញើសូមឲ្យប្រជាពលរដ្ឋប្រើប្រាស់និងថែរក្សាឲ្យបានគង់វង្ស ជំរុញកូនចូលរៀនឲ្យបានគ្រប់គ្នា ដើម្បីចៀសផុតពីគ្រោះអវិជ្ជា សូមកុំប្រើប្រាស់គ្រឿងញៀនកុំធ្វើចំណាកស្រុក កុំខ្ជិលច្រអូស ត្រូវខិតខំធ្វើស្រែ ដាំដំណាំចិញ្ចឹមសត្វឲ្យបានច្រើន ដើម្បីផ្គត់ផ្គង់ជីវភាពគ្រួសារ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ