រាជធានីភ្នំពេញ ៖ បន្ទាប់ពីសមត្ថកិច្ចនគរបាលខណ្ឌចំការមន ចាប់ខ្លួនឈ្មោះសាន្ត តុងអ៊ាង អាយុ២៦ឆ្នាំ ជាជំនួយការនាយកក្រុមហ៊ុនយូខេវីន មានទីលំនៅផ្ទះជួលភូមិសន្សំកុសល សង្កាត់បឹងទំពុន ខណ្ឌមានជ័យ កាលពីថ្ងៃទី១១ សីហា ២០១២ ដើម្បីកសាងសំណុំរឿងបញ្ជូនទៅតុលាការពីបទជាប់ពាក់ព័ន្ធធ្វើសកម្មភាពចាប់បុគ្គលិកក្រុមហ៊ុនយូខេវីនរំលោភកាលពីថ្ងៃទី៤ សីហាថ្មីៗនេះ ស្រាប់តែមានបុគ្គលិកក្រុមហ៊ុនពីរូបផ្សេងទៀតបាននាំគ្នាមកដាក់ពាក្យបណ្តឹងអមទៅតុលាការ ដើម្បីសំណូមពរឱ្យស្ថាប័នតុលាការផ្តន្ទាទោសលើឈ្មោះសាន្ត តុងអ៊ាង ឱ្យបានយូរតាមនីតិវិធី ព្រោះកន្លងមកពួកនាងក៏ធ្លាប់រងគ្រោះដោយសារជនល្មើសនេះ លួងលោមប៉ុនប៉ងរំលោភតែមិនបានសម្រេច។
យោងតាមប្រភពព័ត៌មានពីនាងហ.វ.ណ បានរៀបរាប់ថា កាលពីថ្ងៃទី១៩ មិថុនា ២០១២ វេលាម៉ោង៥ល្ងាចឈ្មោះសាន្ត តុងអ៊ាង បាននាំរូបនាងទៅផ្ទះជួលរបស់គាត់ ដោយឱ្យរូបនាងជួយបោសសម្អាតផ្ទះ និងបន្ទប់ស្នាក់នៅ។ ខណៈពេលដែលនាងសម្អាតបន្ទប់រួចហើយណាមួយជិតយប់ផងក៏សុំលោកសាន្ត តុងអ៊ាង មកផ្ទះវិញ ។ ប៉ុន្តែលោកបានប្រាប់ទៅនាង ថា មុជទឹកឱ្យហើយទៅចាំទៅវិញ ព្រោះនាងធ្វើការហត់ហើយបែកញើសទៀតផង តែនាងបានបដិសេធថា នាងមិនធ្លាប់មុជទឹកផ្ទះគេទេ ។
ប្រភពបន្តទៀតថា ដោយល្បិចថោកទាបក្នុងបំណងចង់ឱ្យនាងទន់ចិត្តប្រគល់ខ្លួនប្រាណឱ្យនោះឈ្មោះសាន្ត តុងអ៊ាង បានធ្វើល្បិចជាឈឺ ហើយពឹងឱ្យរូបនាងកោសខ្យល់ និងធ្វើសរសៃឱ្យរួចចាប់ឱបរឹតរាងកាយនាង ប៉ុន្តែទីបំផុតឈ្មោះសាន្ត តុងអ៊ាង នៅតែពុំអាចធ្វើអ្វីនាងបានឡើយ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ