រាជធានីភ្នំពេញ ៖ នៅថ្ងៃសុក្រទី១៧ សីហា សប្តាហ៍នេះ កីឡាករជើងខ្លាំងចំនួន៣គូនឹងជួបសងសឹកគ្នាយ៉ាងកក្រើកសង្វៀនបាយ័នតែម្ដង ប៉ុន្តែក្នុងចំណោមការប្រកួតសងសឹកទាំងបីគូនោះ ជំនួបសងសឹករវាងជើងខ្លាំងខាងប្រើកណ្ដាប់ដៃកីឡាករ ពេជ្រ សម្បត្តិ និងកីឡាករអ៊ុង វិរៈ កំពុងទទួលការចាប់អារម្មណ៍ខ្លាំងជាងគេ ខណៈដែល២លើកមុនកីឡាករពេជ្រ សម្បត្តិ ធ្លាប់រងការអាម៉ាស់ចាញ់ក្រោមកណ្តាប់ដៃសិស្សប្អូនគឺ អ៊ុង វិរៈ រួចទៅហើយនោះ ។ អញ្ចឹងហើយទើបម្នាក់ៗជឿថា ជំនួបលើកទី៣រវាងកីឡាករទាំងពីរសម្រាប់លើកនេះ គឺពេជ្រ សម្បត្តិ ពិតជាការពារមុខមាត់របស់ខ្លួនក្នុងការសងសឹកបានសម្រេច ដោយមិនឲ្យរងការបាក់មុខជាលើកទី៣ឡើយ ។
ទើបតែលេចលទ្ធផលចាញ់ឈ្នះកាលពីប៉ុន្មានសប្ដាហ៍មុនសោះ កីឡាករជើងខ្លាំងបីគូស្រាប់តែប្រកាសឡើងសងសឹកគ្នាក្នុងជំនួបលើសង្វៀនបាយ័នសាជាថ្មី នៅរសៀលថ្ងៃសុក្រសប្តាហ៍នេះ ។ ការប្រកួតសងសឹកទាំងបីគូនោះ ជំនួបរវាងកីឡាករ ពេជ្រ សម្បត្តិ មកពីក្លិបសមាគមកីឡាប្រដាល់ក្រសួងការពារជាតិ និងកីឡាករអ៊ុង វិរៈ មកពីក្លិបកងពលតូចឆត្រយោង៩១១ បានធ្វើឱ្យមហាជនចាប់អារម្មណ៍ខ្លាំងជាងគេបន្ទាប់ពីកីឡាករ ពេជ្រ សម្បត្តិ ដែលទើបតែចាញ់ដោយពិន្ទុ ក្រោមដៃរបស់កីឡាករអ៊ុង វិរៈ លើកចុងក្រោយក្នុងជំនួបប្រកួតជាមួយគ្នាកាលពីដើមខែមិថុនា មុននេះសោះ ស្រាប់តែសុំឡើងរេញប្រកួតសងសឹកកីឡាករអ៊ុង វិរៈ ជាថ្មីម្ដងទៀតនៅសង្វៀនបាយ័នដដែលនាថ្ងៃសុក្រនេះ ។ លោកនាង ស៊ីវត្ថា អ្នកដឹកនាំកម្មវិធីប្រដាល់ប្រចាំនៅស្ថានីយទូរទស្សន៍បាយ័នបានប្រាប់កាលពីថ្ងៃអាទិត្យថា ជំនួបជាថ្មីរវាងកីឡាករទាំងពីរនេះនឹងធ្វើឲ្យមានការភ្ញាក់ផ្អើលមិនតិចឡើយ ដោយសារតែមុនពេលធ្វើការផ្គូផ្គងទាំងកីឡាករពេជ្រ សម្បត្តិ និងគ្រូបង្វឹករបស់លោកសុទ្ធតែបង្ហាញពីសុទិដ្ឋិនិយមធំមួយថានឹងអាចសងសឹកកីឡាករអ៊ុង វិរៈ បានសម្រេចក្នុងការប្រកួតលើកទី៣នេះ។
ដោយឡែកសម្រាប់កីឡាករអ៊ុង វិរៈ វិញក៏បង្ហាញឆន្ទៈដូចគ្នាថា នឹងរក្សាតំណែងឈ្នះមិនឲ្យចាញ់កីឡាករពេជ្រ សម្បត្តិ ក្នុងជំនួបសងសឹកមួយនេះទេ ទើបលោករំពឹងថាការប្រកួតរវាងអ្នកទាំងពីរនឹងធ្វើឲ្យរញ្ជួយពេញសង្វៀនទូរទស្សន៍បាយ័ននៅល្ងាចថ្ងៃសុក្រនោះមិនខាន ។ ទោះយ៉ាងណា លោកមិនហ៊ានទស្សន៍ទាយថា កីឡាករទាំងពីរតើអ្នកណានឹងទទួលជ័យជម្នះលើអ្នកណានៅឡើយទេ ក្នុងពេលដែលកីឡាករ អ៊ុង វិរៈ និងពេជ្រ សម្បត្តិ សុទ្ធតែមានបច្ចេកទេសក្នុងការប្រកួត និងភាពប៉ិនប្រសប់ខ្ពស់ដោយឡែកៗពីគ្នាធ្វើឲ្យមានការពិបាកកំណត់ពីលទ្ធផលចាញ់-ឈ្នះ ។
តាមការកត់សម្គាល់កីឡាករអ៊ុង វិរៈ ថ្វីដ្បិតតែមានដៃវែងជើងវែង ហើយពូកែវាយបកបានរហ័ស តែកីឡាកររូបនេះហាក់នៅស្ទើរខាងតិចនិកក្នុងការប្រកួតនៅឡើយ ខណៈដែលកីឡាករពេជ្រ សម្បត្តិ ក៏មានជំនាញខាងប្រើកែងបានរហ័ស និងអាចប្រើជើងបានលឿនដែលពិបាកឲ្យកីឡាករអ៊ុង វិរៈ មើលស្រាលក្នុងជំនួបសងសឹកមួយនេះខ្លាំងណាស់។ អុីចឹងហើយ ទើបអ្នកស្នេហាកីឡាប្រដាល់កាន់តែច្រើនបានផ្ដោតការចាប់អារម្មណ៍ចំពោះជំនួបសងសឹកជាលើកទី៣ រវាងកីឡាករជើងខ្លាំងទាំងពីរនេះ ដើម្បីកំណត់ឲ្យដឹងថា តើអ្នកណាខ្លាំងពិតប្រាកដក្នុងការប្រកួតសងសឹកនៅថ្ងៃសុក្រនោះ ។ យ៉ាងណាមិញ កីឡាករពេជ្រ សម្បត្តិ ធ្លាប់ចាញ់ក្រោមដៃ កីឡាករអ៊ុង វិរៈ ដោយពិន្ទុចំនួនពីរលើករួចមកហើយ ពិសេសក្នុងជំនួបប្រកួតដណ្តើមពានរង្វាន់អនុស្សាវរីយ៍របស់ស្ថានីយទូរទស្សន៍បាយ័ន ដែលទើបតែបញ្ចប់កាលពីប៉ុន្មានសប្ដាហ៍មុននោះ ។
ដូច្នេះហើយទើបការប្រកួតក្នុងជំនួបលើកនេះ មានអ្នកស្នេហាកីឡាប្រដាល់ជាច្រើនបង្ហាញទំនោរលម្អៀងទុកជាមុនថា កីឡាករអ៊ុង វិរៈ ពិតជាឈ្នះ ។ គាប់ជួនការប្រកួតលើកនេះមានលក្ខណៈជាការប្រកួតកម្ដៅសាច់ដុំរបស់កីឡាករអ៊ុង វិរៈ មុននឹងឡើងទៅជួបប្រកួតជាមួយកីឡាករវ៉ែន សុវណ្ណ មកពីក្លិបកងកេងខេត្តបាត់ដំបង ក្នុងគម្រោងដណ្ដើមឈ្នះពិន្ទុដើម្បីទៅជួបប្រកួតជាមួយកីឡាករអូត ភូថង ក្នុងគម្រោងដណ្ដើមខ្សែក្រវាត់អាជ្ញាធរជាតិប្រឆាំងគ្រឿងញៀនផងនោះ ទើបគេជឿថា ការប្រកួតនៅថ្ងៃសុក្រនេះ គឺកីឡាករអ៊ុង វិរៈ មិនអាចបរាជ័យបានឡើយ ។ ចាំមើលតើកីឡាករណាម្នាក់ក្នុងចំណោមពួកគេអាចទទួលជ័យជម្នះលើសង្វៀនប្រដាល់ក្នុងជំនួបសងសឹងជាលើកទី៣នេះ បើកីឡាករពេជ្រ សម្បត្តិ ក៏អះអាងថានឹងឡើងសងសឹកឲ្យបានសម្រេច ឯកីឡាករអ៊ុង វិរៈ ក៏បញ្ជាក់ពីឆន្ទៈតាំងពីមុនធ្វើការផ្គូផ្គងថា នឹងរក្សាតំណែងឈ្នះឲ្យខាងតែបាន ដើម្បីបង្កើនក្រេឌីតមុនដំណើរឆ្ពោះទៅប្រកួតជាមួយកីឡាករ វ៉ែន សុវណ្ណ ក្នុងអំឡុងសប្ដាហ៍ខាងមុខៗមិនឲ្យអ្នកគាំទ្រខកបំណងដែរនោះ ។
ក្រៅពីគូឯកមួយគូនេះ ការប្រកួតស៊ីសាច់ហុតឈាមសាជាថ្មីរវាងកីឡាករ ថុល មករា មកពីក្លិបឃ្លាំងមឿងកីឡា និងកីឡាករ កែវ វិរៈ មកពីក្លិបគជសារកីឡាក៏ត្រូវគេរំពឹងថា នឹងធ្វើឲ្យរញ្ជួយពេញសង្វៀនប្រដាល់នៅវេលាថ្ងៃសុក្រនោះដែរ ។ គូខ្លាំងទាំងពីរនេះធ្លាប់ធ្វើឲ្យអ្នកទស្សនាស្រែកហ៊ោកញ្ជ្រៀវរួចមកម្ដងហើយក្នុងជំនួបជាមួយគ្នា កាលពីថ្ងៃទី១៦ មិថុនា កន្លងទៅដោយពេលនោះ កីឡាករកែវ វិរៈ បានឈ្នះពិន្ទុកីឡាករ ថុល មករា ហើយធ្វើឲ្យអ្នកទស្សនា និងសាមីខ្លួនកីឡាកររូបនេះ ចាញ់ទាំងមិនអស់ចិត្ត ។ ដូច្នេះហើយទើបគេម្នាក់ៗកំពុងទន្ទឹងរង់ចាំមើលថា តើកីឡាករថុល មករា អាចឈ្នះកីឡាករកែវ វិរៈ ក្នុងជំនួបសងសឹកដែលមានន័យមិនខុសពីការប្រកួតស៊ីសាច់ហុតឈាម នាថ្ងៃសុក្រនេះបានឬមិនបាន?
ដោយឡែកជំនួបសងសឹកមួយគូទៀត ក៏មិនជាអន់ជាងការប្រកួតរបស់កីឡាករទាំងពីរគូខាងលើផងដែរ នោះគឺការប្រកួតសងសឹកគ្នារវាងកីឡាករ ឃឹម បូរ៉ា មកពីក្លិបភូមិគាបខេត្តបន្ទាយមានជ័យ និងកីឡាករម៉ន ភារម្យ មកពីក្លិបព្រែកឯង ដែលក្នុងជំនួបលើកទី១កាលពីថ្ងៃទី៥ សីហា កន្លងទៅនោះគឺកីឡាករឃឹម បូរ៉ា បានចាញ់ពិន្ទុកីឡាករម៉ន ភារម្យ ដោយមិនអស់ចិត្តដូចគ្នាដែរ ។
បន្ថែមពីលើការប្រកួតសងសឹកគ្នានៅសង្វៀនទូរទស្សន៍បាយ័ន នាថ្ងៃសុក្រសប្ដាហ៍នេះ ក៏មានការប្រកួតរវាងកីឡាកររឹត កៅ បង្គោលក្រហមមកពីក្លិបខេមរភូមិន្ទ និងកីឡាករបង្គោលខៀវខន វិចិត្រ មកពីក្លិបរតនៈគិរី ក្នុងទម្ងន់៤៨គីឡូក្រាម ។ ការប្រកួតរវាង កីឡាករ សួស សិលា មកពីក្លិបរការខ្នុរគ្រឿងញៀន និងកីឡាករស៊ិន សារ៉េត មកពីក្លិបកងពលតូចឆត្រយោង៩១១ ក្នុងទម្ងន់៦៣គីឡូក្រាម និងមួយគូចុងក្រោយ គឺជំនួបរវាងកីឡាករបង្គោលក្រហមចាន់ សាឡុង មកពីក្លិបនិរោធមានជ័យ និងកីឡាករកែវ លីហូរ បង្គោលខៀវមកពីក្លិបដំបងគ្រញូងខេត្តបាត់ដំបង ៕
ចែករំលែកព័តមាននេះ